18. März 2023 01:55

Phố Xuân Viên, TT. Sa Pa, Sa Pa, Lào Cai, Vietnam | 18°C

Tag drüü in SaPa. I muess ga es Täschli kömerle.das, wo n ih ha g’ha isch ganz unerklärlech verschwunde. I ja der Üutzfrou es Briefli g’schribe. Ja otz haöt.

Mer hei geschter in SaPa richtig Glück g’ha, dass üs d Sunne derewäg verwöhnt het. Hüt isch nid nume am Morge näblig. Vo da geit es uf e Fansispan ueche (über 3000m). Öb mer ächt dere Suppe möge ertrünne?

E vietnameseschi Seilbahn erläbe isch es hutnnach’s Erläbnis. Es isch Wucheändi u seeeeehr viel Vietnamese göh i d Bärge. I der Stadt hei si nid übermässig Platz, also zieht es se use.

Es het se zoge! Mir lehre wieder a stah, i stah u warte. 😉

Es het es paar Lüt. Mit viel Geduld chöme o mir dra. Mer wärde sogar bevorzugt behandlet u chöi de zwüschedüre das Reiheli verlah.

I dere Seilbahn uf e Fansispan het es vieredrissg Gondle. I jedere hei drissg Lüt Platz. Es wird ziemli g’füllt. (Man rechne). -> ei Fahrt duret füfzäh Minute.

Na der Talstation fahre mer über ds Land bo de Hmong vo geschter: idrücklech!

Ja u de chöme mer uf dä Bärg. Wahnsinn, was da alles b’boue worde isch.

Das Sunworld Fansipan Legend Cable Car System wurde mit 02 Weltrekorden ausgezeichnet – das längste 3-Linien-Seilbahnsystem der Welt (6292,5 m lang) und der höchste Höhenunterschied der Welt (1410 m).

Mer stige bis ufe Gipfel ueche. Das isch zwar ziemli a strängend, wil Stäge steil si. Es isch e grandiosi Alag wo da b’boue worde isch.

Und dä Ort wird b’bsuecht! Mit jedem Schritt tschaupet me i n es frömd’s Föteli iche.

U si si stolz uf ihre Bärg. Fahne, wo mel uegt. Jä nu so de, wie geit’s daheim? Nid angersch!

Mit em Näbel isch es es ständig’s uf u ab. Mängis h g’seht me nume paar Meter un es chutet wie wild. Füf Minute später schiint d Sunne.

Nach re guete Stung geit es wieder ache, es isch ja scho Zyt für ds Zmittag g’sy. Es isch e i drückleche Usflug. Die Bahn hie isch es Meischterwärch, d Schwizer hei ja o no chley mitb’boue.

Wie das Land da unger beboue wird isch o sehr interessant. Viel viel Arbeit steckt da i däm Land, d Ärnt u der Ertrag isch nid wahnsinnig u d Ornamentik chunnt (vo obe) o zum Zug. 😃

Es isch zwänzg vor zwöi wo mer dür d Talstation loufe. Die wei alli no uf e Bärg! U vor em Geböide stöh si o no Schlange.

Mer mache üs uf zum Bus u mit däm uf SaPa.

Red Dzao House – Das cha me empfähle! Zum Glück isch der Frömdefüehrer i heimisch u kennt die Reschturant.

Es git wie Sang am Meer Beize hie, aber i bi sicher, me cha lang nid alli empfähle.

Ds Ässe isch wieder wunderbar! Zum Bischpil die Chugle us Süesshärdöpfu hie, e Troum.

Nach em Ässe, es isch scho bal vieri, loufe mer zum Hotäl.

Speter gah n ig no i d Ortschaft u choufe Frücht. Hinech muess i früecher i ds Bett. Morn isch Tagwacht na de füfe.