14. März 2023 00:29
Lat: 25.254, Long: 55.351
Iz wär i dinne, mit Fänschterplatz. Schöni Ussicht, i tuschet gäge die eifachi Erreichbarkeit vom WC. Isch es das derwärt? I ha da miner Zwifel.
Discofarbe am Abe: mer verlöh Dubai mitts i der Nacht. D Signalisation vom Flughafe het si ganz eiget Zouber. D Nachtgeischter vo der Dienschtbarkeit si unermüedlech ungerwäg’s.
U ne Liechtblick am Morge. Mer flüge em 14. März etgäge, dä Sunneufgang vorne muess ganz toll sii. (Notiz a mi sälber: Im nächschte Läbe probiere Pilot z wärde.)
Über Indie het es Wulche. Un es schüttlet, -läck, das forderet der Mage. B’sundersch, wil d Verpflegig süess u chläberig isch. Toll!
Ds Zmittag, oder so, isch nid so wahnsinnig. Der Fruchtdalat isch no ds Beschte. D Zyt vergeit- u irgendeinisch isch de Hanoi i der Nechi.
Hanoi zum Ersten
19B Trần Hưng Đạo, Phan Chu Trinh, Hoàn Kiếm, Hà Nội, Vietnam | 22°C
Üse erscht Kontakt mit Vietnam u Hanoi füehrt üs i die Grossstadt. Töffe u Strassehändler präge ds Strassebild. -bunt-wild- lut u seeehr schnäll!
Der Herr Buc isch der i heimisch Frömdefüehrer. Der Herr Nam isch der Fahrer vom Car i däm G,wusel. Bi n ig froh hei mer die.
Am Nami göh mer no chley i d Stadt. Nach ere Tämpelbesichtigung fahre mer i ds Hotäl.
Zum Znacht göh mer i d Stadt i nes typisch vietnamesisches Restaurant. Es isch alles toll und fein. Sehr schnäll … u d VISA Charte kenne si nid.
Nach Muetters Chuchi si mer riif für ds Bett.
