1. April 2023 02:15
22-00 Đ. Đồng Khởi, Bến Nghé, Quận 1, Thành phố Hồ Chí Minh, Vietnam | 27°C
Morge am sibni. I bi scho meh als e Stund wach. Saigon brummt. Es isch öppis los hie. Alli wei öpp verdiene u tüe alles derfür. Ig bi im achte Stock u d Ussicht isch nume begränzt toll.
Der Präsidäntepalascht g’hört zum Programm, wie o ds Chriegsmuseum.
Nu de, mer besichtige die Ho-Chi-Minh-Stadt. Alti Hüser hei näb em total moderne Platz. Mir si mit em Bus ungerwägs u ig’chlemmt i all dene Töffe, wo hie ungerwäg’s sy. Es het unwahrschynlech viel Lüt, wo irgendwo häre müesse, Pflichte hei, eme Job nagöh….
Die alti Poscht isch idrücklech u gäng no i Betrieb. Im Innere, i der grosse Halle, si öppe driissg Schalter. Eine für Margge, eine für Päckli, eine für Briefe … zum Glück het da nid d schwizer Poscht ‹das Sagen›; – süsch wär scho lang zue.
Dusse, uf em Trottoir, spile Vietnamese alti Popsongs vo de Beatles u vo de Rolling Stones…
E tolle Abschied vo dere Stadt.
Wieder im Hotäl ‹blöterle mer ume› u warte. Gäge Abe fahre mer zum Flughafe. Ds übleche Prozedere faht a.
Fasch um Mitternacht Flügt de üse Flüger i Richtig Dubai ab, wo mer am früeche Morge a-chöme. Vo dert geit es de wyter bis Züri. Nachem Mittag, am Sunntig, 2. April si mer in Züri.
U de geit es no bis Rappi.
