31. März 2023 14:24

Nhà bảo tàng Cảng nhà Rồng, 1 Nguyễn Tất Thành, Phường 12, Quận 4, Thành phố Hồ Chí Minh, Vietnam | 29°C

So, es isch mer g’lunge, der Server wieder zum loufe z bringe. (Ha g’rad chley Schweisströpf g’ha.) Es tuet mer leid, «öppis» isch passiert…

Die letschte Täg wärde de natürli nahg’lieferet. Nach ere unändlech länge Fahrt si mer nach Saigon cho u vo dert i ds Mekongdelta g’fahre. I dere Zyt ha n i weni chönne im Internet mache. Hüt Morge isch no mis vietnamesische Telefona abg’lüffe, i der Zwüschezyt ha n i aber es nöis. Morn fahre mer mo in Saigon ume u de isch es leider wieder Zyt, während zwene Nacht/Tag i d Schwiz z reise.
Die räschtleche Reparature am Server mache n i daheim.

Uf em Plan wär, der schwümmend Märit in Cai Be z b’sueche. Allerdings g’seht me da dervo nümm der Hufe. Ds Läbe u der Handel hei sech uf fescht’s Land verlageret. Laschtwäge si schnäller als Kähn.

Mer si aber mit Boot ungerwäg’s, b’sueche Iwohner u bewundere landwirtschaftlechi Erzügnis.

Näbebii, es het immer no Lüt, wo durhaft uf em Mekong i Huusboot läbe. Ganzi Dörfer g’seht me, wo irgendwo, a güschtige Orte, ihrer Boot feschtg’macht hei. Allerdings muess me säge, dass es gäng wie schwieriger wird für se. Wie i angerne Länder, wärde die Flussnomade i ihrer Läbeswys vom Staat nid ungerstützt.

Der Wäg zrügg, us em Delta bis Saigon, isch läng. Gäge Mittag mache mer is mit em Bus uf e Wäg. Churz nach Cai Be het der Reiseleiter aber d Idee, me chönnt no e Tämpel gah b’sueche (Vo der glyche farbefrohe Sekte, wo mer scho eine g’seh hei.)

He nu so de; – i blibe bim Bus. Bi müed, chley übersättiged, nid so interessiert …

Hie faht es b’sungersch Kapitel a:

Zrügg in Ho-Chi-Minh-Stadt b’sueche mer verschiedeni Sehenswürdigkeite. Mir si im Cineseviertel Cholon ungerwägs,  D G’schicht vo däm Gebiet isch dürzoge.  G’schäft mit Riis, Droge, Prostitution u die chineseschi Mafia hei langi Zyt ds G’scheh prägt.

Hüt cha me das Gebiet ohni problemlos b’sueche. I re ehemalige Opiumchocherei chehre mer i u ässe ganz fein Zmittag.

Zmittag im Vietnamrestaurant, Opiumchocherei

Anschliessend loufe mer zrügg zum Hotäl. Gäge Abe mache mer is de wieder uf e Wäg. Mit Txi fahre mer zu re Hafealag. Mir mache e Bootsfahrt uf em Saigon-River. Derzue wird es wunderbar’s Ässe särviert, mit vietnamesischer Begleitmusig.

Ds Farbespiel i der Stadt schiint wie g’macht für üs. Es g’seht ganz toll us em River nah.

Abschlussässe uf em Boot

I ds Hotäl fahre mer mit em Bus u der Verchehr dusse isch grandios. D Lüt si all im Usgang!