24. März 2023 02:03

V8Q9+M4Q, Nguyễn Tất Thành, Tân An, Hội An, Quảng Nam, Vietnam | 26°C

Tja, es isch so e Sach mit dene Soldatefriedhöf u Dänkmäler. D Erinnerig a dene ihri ‹Heldetate› isch meischtens nid so versöhnlech.

O hie isch dä Friedhof nume für die nordvietnamesische Soldate u ihrer Müettere. Die südvietnamesische si für die faltschi Überzügig g’storbe. Schad!

Hüt si mer scho rächt früech uf em Wäg i ds Landesinnere. Vierzg Kilometer müesse mer fahre, für a dä Ort z cho, wo die Hindu-Überräschte g’funge worde si, wo ds Chamvolk hingerlah het. Es isch ziemli e Fahrt, aber mer hei e grosse Bus u de isch es erträglecher.

Ungerwäg’s isch es grüen u no einisch grüen. Riisfälder, sowit me cha luege. Zwüschedüre begägne mer Wasserbüffle wo am Bade sy.

Mer begägne o no angeri Überräschte: Das Arbeitstier het o die beschte Jahr hinger sech. Er isch äuä im Ruehestand 😉 Wogäge d Töffli wie wild b’rucht wärde.

D Natur spielt mängisch wunderschön mit der Landschaft. Mir g’fallt das!

Du mini Güeti, isch das e Hitzchopf. Agame git es uf der Wält i allne Farbe. Die wo üs i de Ruine erwrtet, het e rote Vorderkörper u macht da dermit veiechly Idruck. I ha nacheg’luegt u es chönnt e Agame Arlequin sy. Aber sicher bi n i nid u si isch äuä no jung.

Ja, es het o no Skulpture i de Ruine. Aber viel het es nümm, der Grossteil isch im Museeum. Aber es isch scho i drücklech, wie n es Volk dür Eroberig eifach verschwindet. Die paar Steine züge vo re Kultur, wo meh als e paar Tag exischtierthet. Aber so isch das, der Stercher g’winnt.

Erstunlech,  wieviel B’suecher die Ruinestadthet. Vieli si Iheimisch. Guet, es isch e UNESCO Kulturstädt, aber das Volch isch vo de Nordvietnamese verinahmt worde (vor gaaaanz langer Zyt.)

G’rad viel isch nümm z g’seh vo dere Stätt. Aber nid nume d Chriegereie um ds zähte Jahrhundert hei de Boute zueg’setzt, o ds Klima u d Natur tuet ihre Anteil für Zivilisatione z tilge.

Der Zmittag isch i re vietnamesische ‹Tourischtebeiz›. Mer ässe guet, aber nid überus speziell.

Hoi An isch e Tourischteort. Mer übernachte im Boutique Hotäl u das isch e gueti Adrässe. Nach üsem Usflug i d Vergangeheit, luege mer d Innestadt vo Hoi An a. Dert b’sueche mer o e buddhistische Andachtsruum, wo ig die einzigartige Röicherstäbli g’seh.

Uuuu het das Lüt hie. Bi re Bootsfahrt uf em Thu Bon River chöi mer chlei ufschnufe. Aber es het o hie Tourischte wo me häreluegt.

So gäge Abe zue näme d Lüt verusse no zue. Es wird chley chüehler u si löh sech veruse. Üsi Gruppe macht sech aber uf e Wäg zum Hotäl, – ömu die meischte.

Bim Hotl acho winke scho wieder die Lüt vom Beizli gägeüber. Mer mache e Termin ab zu re Massage. I ha mer bim Bahnschlafe der Äcke irgendwie verdrähit. E Stund später hocke e Kolleg us St. Galle u ig zur Fuess, Rügge u Nackemassage bereit. Es tuet gut. Nu de, dernah ässe mer no da u de isch dä Tag o scho wieder G’schicht.