23. März 2023 00:57

17 Lý Thường Kiệt, Phú Nhuận, Thành phố Huế, Thừa Thiên Huế, Vietnam | 26°C

Zmorge im Hotel isch e ziemli troschtlosi Sach. Jedi u jede bröselet so öppis vor sech häre. Minger oder meh usg’rüschtet mit Frässalie. Es git wieder die ganzi Palette: Baquettes, Gmües, Frücht, Milchware, Kafi …

Der Morge isch scho ziemli alt. Der Vercher haltet sech i Gränze. Mer fahre wyter gäge Da Nang.

Achti driisg fahrt der Zug, sibni driisg isch Abfahrt im Hotäl, sächsi driisg isch ds Gepäck vor em Zimmer u git es Zmorge das heisst füfi driisg ufstah u dä Tag begrüesse. Huiiii isch das e Fahrplan; – aber er klappet. Es isch zwar wieder chley früech , – aber was wosch. 😉

In Hué müesse mer ziemli uf e Zug warte. Ussert üs si no e ganzi Reihe Iheimeschi u Tourischte, wo o uf dä Zug wei. U de chunnt er de äntlige u ratteret irgendeinisch mit üs los. Es isch e alte Wage, wo mer dri istige. I bi froh, dass der Reisefüehrer e Iheimische isch. Üser Plätz si alli b’setzt u der Bac muess afe einisch Sitzplätz ruume.

Mer fahre mal der Tag dür, uf dere Strecki, wo n ig scho Föteli g’seh ha. Zum Teil fahre mer dür d Wildnis, dür e Dschungel. Aber o dinn im Zug isch teilwys e settige. D Sitze chöi ziemli acheklappet wärde. D Vietnamese fahre viel im Lige u löh sech de vom Verpflegigswägeli lah verwöhne.

Mer lande in Da Nang. E ganz berüehmti Stadt am Meer. Am Mittag fahre mer wieder zu me Resturant u ässe ganz wunderbar. Mer si im Usseberiich, fasch i me Gartehuus. Zringsetum het es Böim, Teiche u Skulpture. Es isch e ganz wunderbare Ort mit wunderbare Lüt.

Vietnamese mache fasch alles mit em Töff. Dämentsprächend g’seht me gäng wieder Sache uf der Strass, wo sech i der Schwiz alli würde b’säügne. Nu de, in Vietnam macht me, was nötig isch. U we me es Fänschter muess transportiere, fingt me e Wäg.

Der B’suech im hinduistisches Cham – Museeum isch e Rückblick i ne Zyt, wo Mittelvietnam es eiget’s Riich isch g’sy. D Cham si Ahne vo de Vietnamese, hinduistisch u vo de Nordvietnamese besigt worde. Ds Chamvolck isch unger g’gange. Aber die hinduistische Überblibsel si de vo französische Forscher g’funge worde. Me het se usg’grabe u i das Museeum b’racht.

Vor em Museeum het es es ‹Ficus Beniamini› Böimli. 🤣Tja, mis daheim würd rot vor Scham, wenn es si Verwandte hie g’siech. Scho wahnsinnig, was d Natur cha mache. Viel ganz grossi Böim g’seht me nid in Vietnam. Der Chrieg vor füfzg Jahr het o Spure i der Natur hingerlah.

Da Nang isch e grossi, moderni Stadt mit vielne Flüss u Seene. D Erschliessig für e Verchehr isch hervorragend. Der Innestadtberiich isch für Verchehrsmittel g’sperrt. Es git viel Rikschafahrer, Velofahrer u Fuessgänger. Zytewiis so viel (dür die viele Tourischte) dass es zu Fuessgängerstous chunnt.

Üse nächchscht B’suech gilt ere Marmor-Skulpture-Manufaktur. Es halb Dotze Manne schliife mit Trennschibe u angere Maschine(li) Skulpture für e in- u usländisch Märit. U wie geng, es het hie nid nume ei Betrieb. Zringsetum si es witersch Dotze wo genau ds Glyche mache.

D SUVA hät ihri hälli Fröid a de Arbeitsbedingige vo dene Manne. D Mehrheit treit Maske, aber da dermit het sech’s de scho. Es isch es ganz müehsam’s u hert’s Tagwärch wo die da mache. U das bi gäg die driisg Grad u re Luftfüechtigkeit zum Förchte.

Ds Lager, wo si hei, isch immäns. I frage mi, wie lang si a all dene Figure g’arbeitet hei. Im Inneberiich isch de der Lade u es het unzählegi Verchöiferinne, wo die Figure u Figürli a d Frou u a Ma bringe. Es het duurend Tourischte, wo choufe. Vo däm erschte Priis, wo si säge, muesch afe füfzg Prozänt abzieh u de chunnsch villicht zu me a nähmbare Chmoufpriis.

Vietnam isch berüehmt für siner Sidestoffe. Aber o d Schnyder si e Qualität für sich. I der Gruppe het es settegi, wo sech Chleider wei lah nähie. D’rum göh mer i so ne Schnyderei. Die produziere Side u verarbeite der Stoff. Es löh sech mehreri us der Gruppe vermässe u b’stelle Chleider. (Näbeby, morn wärde die Chleider i ds Hotäl g’liferet zur Aprob, no einisch apasst u de g’liferet).

Der Rückwäg zum Hotäl mache mer mit eme lokale, offene Taxi. Bim Warte uf das G’fährt begägnet is die G’hüderabfuehr. Scho idrücklech, wie das hie funktioniert. Derby si si no fründlig u lache üs a; – o si verdiene sech der Läbesunterhalt.

Zum Znacht gah n ig am Abe vom Hotäl us diräkt über d Strass. Scho vo wytem wird g’wunke vo de beide Meitschi, der Vater chochet das Znacht u d Muetter isch der Boss. Dernäbe betribe si o no e Wäscherei (ds Kilo für e Dollar) u ne Massagebetrieb. Es isch e ganz ufg’stellti Familie u sehr sehr wärchig. I isse mit eme Kolleg zäme es tolls Znacht (bratne Riis u G’mües).