21. März 2023 02:28
Lat: 20.853, Long: 107.086
Halbi sibni, ds erschte Zmorge. Dernah göh mer zu re Insle : Ti Top. Si isch wie ne Zuckerhuet u me chha ueche loufe. Isch e guete Istieg i dä hütig Tag. Dernah fahre mer wieder zum Schiff u packe. Ds zweite Zmorge isch o nache.Gäg die elfe wärde mer a Land bracht u dernah chunnt e längeri Busfahrt.
Mer lande uf me Märit. G’mües, Frücht u was ds Härz begährt. B’sungersch isch der gross Fischmärit. Woby, eigetli tüe mer die Vicher leid. Alles wird g’frässe, wo läbt.
Die Schlachtplätz näb de Ständ di wehni amächelig. Für ne Vegetarier mängisch a fer Gränze.
De Iheimische macht das alles nüt. Houptsach si hei Fleisch u Fisch.
Un es het Lüt hie, dä Märit isch guet b’suecht. Allerdings, – es het o schuderhaft vieli wo öppis wei verchoufe. D Chunndschaft besteit o us Verchoufende.
Mir g’fallt natürli b’sungersch der Früchtemärit. I krnne öppe d Hälfti vo dene mit Name.
Der B’suech i re Perlezucht g,hört in Vietnam zu me Muss
O für üs. Vietnam het e ganzi Reihe vo Perlezuchte. Für die z betriibe, müesse d Perle vorbereitet wärde. Das macht me hie u aber vor allem dusse i de Zuchte.
Hie wärde de läbige Muschle Chügeli us Schale u es Stückli Muskel vo re tödte Muschle i pflanzt. So produzieri d Wirtsmuschle meh u stercher Perlmutt.
Die präpärierte Muschle wärde i de Farme jahrlang g’halte und irgendeinisch g’ärntet. Je länger me wartet, desto grösser si d Perle.
Jetz wird d Muschle ufb’broche, d Perle use g’no, sortiert u – d Muschle isch tod. Es git grosssi Usfäll.
Was g’spürt e Muschle?
Da derfür! Schmuck isch e unverzichtbare Teil für d Hälfti vo der Mönschheit. Es isch ja scho schön, wie das glänzt u glitzeret. I stune aber gäng wider, was d Mötscheit alles macht für ds «Usg,seh».
Es git e längi Fahrt mit em Car. In Hanoi göh mer i me Reschturant gah ässe, wo ehemalegi Strasseching beschäftiget wärde. Nach em Chrieg isch die Aktion g’startet worde. Der Ertrag isch zum grosse Teil wieder i ds Projekt investiert worde u chunnt drum immer wieder nöie Ching z guet.
Ds Ässe isch wie geng super. I ha hie no nie schlächt g’gässe. Öppe z süess isch s mer g’si, oder zweni scharf.
So uf die halbe sibne si mer bim Bahnhof vo Hanoi. D Wäge si das Mal weniger alt un es schlaht bim Fahre weniger. Nu de, üs steit e füfstündige (660km) Fahrt bevor.
Da steit üs no es Streckeli bevor. I der Näbeksbine louft es Fescht. Der Kolleg chunnt zrügg u zack, isch üsi Kabinetür kaputt. Also: schlafe mit offenem Loch. 😏
Mit offener Tür d Bahnfahrt hinger is z bringe isch o egal. Es isch nid lüter oder liisliger als süsch..
We me in Asie ungerwäg’s isch wird me ständig vo me G’rüüschpegel begleitet, wo n ig vo daheim nid g’wahnet bi.
