17. Juli 2024

Der hütig Tag g’seht viel versprächend us. Weni Wulche! Aber das änderet scho im Louf vom Vormittag.

Mer göh em achti gah zmörgele. Das isch qieder guet u mit grosser Uswahl.

Vorhär bi n i scho chlei im Wald gah loufe (quasi zum Vorwärme). Vo der Pension us isch me schnäll um Wald. Am Wäg liegt der Ischweiher. Das isch es Seeli im Wald.

Idyllisch, schön, mit länger G’schicht.

So um die zähne göh mer uf e See. E Rundfahrt, mer gondele um e See, u na ja, z g’seh git es nid wahnsinnig viel.

Aber ds Kafi dernah hei mer is verdienet.

I ga de uf mis Märschli um e See. Der Wäg füehrt zwar i witem nid em See nah. Vielne Orte isch abg’sperrt, weil privat. E Useforderig isch es o nid, i loufe uf re «Wanderoutobahn». Mir chöme zbiemli Lüt etgäge u i vermuete scho, es chönnt e vorg’schri ni Marschrichtig gäh. Bi me Halt merki de aber, dass i doch nid der Einzig bi, wo im Uhrzeigersinn louft.

Grüesse chöi die Dütsche bim Wandere nid. Da luegt me i Himmu, oder uf e Bode. Nu, e paar grüesse. Öbs ächt d Tourischte si?

Bim erschte Campingplatz chouf i es Brötli zum Zmittag u ne Kafi.

Bis itze isch ds Strässli mehrheitlech dür e Wald u der See het me o hie und da g’seh.

Vom Campingplatz eis bis zum zweite isch nid b’sungersch wyt. Nume isch der Wäg itz e Strass. Vom ungere Seeändi a isch es de gäng wie strüber. Der Seerundwäg verlouft itz uf em Trottoir vo der Outostrass. Zuegang zum See git es kene meh. Unzählegi Hotäl versperre mit ihrne Grundstück u Verbot «jeglicher Zugang» die Müglechkeit. Witi Gebiet si mit Züün i-g’mürelet. Es het Hotäl, Pensione, Seminarhotäl, e Jugedherbärg u gäge Titisee zue no e grossi, öffentlechi Badi.

Fötele tue n i nümm gross. I schuehne, dass i mit der Umrundig fertig wirde. Em Vertel nah de zwöi bi n i wieder uf mim Bett.

D Barbara u der Loränz si irgendwo em Bähnli fahre. Öb die ächt o wieder zrügg sii?