15. Juli 2024

Titisee, wo isch itz o nune dä cheibe Titi u äbe nid der Titicacasee?

Im Schwarzwald isch er. Barbara, Loränz u ig göh das Titisee-Neustadt gah erkunde. Wo mer e Ort g’suecht hei, für ne Usflug z mache, isch mer dä Titisee i Sinn cho. Werum, weiss i nid.

Nu de, vorhär muess me Zug fahre. Zersch BLS, de d Südoschtschtbahn, dernah wyter mit der DB. Ruehig, g’müetlech schoukle mer gäge Dütschland zue.

Ds Basu chehrt dä Zug u itz si mer plötzli hingertsi ungerwägs. Wie isch itz das mit em Omen? I wirde’s überläbe, mein i.

Basu isch scho e Industriemoloch. Das fallt eim uf, we me mit em Zug dürefahrt. Ei Fabrigg ar angere anne.

Die dütschi Bahn gondlet üs dür ds Rhital (ache oder ueche) bis Freiburg. Dert stige mer um u fahre i dä «schwarz Waud».

D Landschaft mahnt eim chly a ds Ämmitau. Was hie als Bärg a-g’schribe isch, muess no ke Bärg sy. … u wär in Himmuriich isch, isch no nid im Himmuriich.

Mer si de pünktlech in Titisee u sueche üsi Ungernunft. Zersch tüe mer afe einisch trinke, de ässe, de chley loufe u Beeri schnouse.

Churz derna si mer de aber bir Pension Bergseeblick; alles het funktioniert mit der Reservation. Mer finge d Schlüssle u bezieh d Zimmer.

Nach me Schläfli mache mer e Spaziergang, trinke Kafi, fahre mit em Rieserad u göh dernah gah Znacht ässe.

So um die Achte si mer wieder bi der Ungerkunft.

Churz dernah chunnt es Rägeli.

I mache Büro.