Schlagwort-Archive: Luft

Bolivia Tag 119


Freitag, 27 Juni 2025

Hinterlassen Sie eine Antwort

 

Datum:      27.06.2025
Ufenthalt:  Refugio Laguna Blanca (El Alto)

 

Umgäbig:

blank blank

blank

 

Erläbnis:

Hüt isch der zweit Tag im Refugio el Alto. D Sunne schynt, aber der Luft geit starch, was am Hus waggelet, macht o Lärme. Mer nähme’s g’müetlech u göh’s ruehig a. D Hoffnig, hüt nach Chile übere z fahre isch gross. Mer zmörgele z viert u mache de d Outo zwäg. Mer rume ds Zimmer u wäre parat für d Abfahrt. Heinz seit:»Am Viertu vor elfi fahre mer ab»!

Itz isch halbi zwöi u mir warte. Ussert am Himu, wo aus wieder bedeckt isch, geit nüt. Der Zöllner het versproche, är mäldi, wenn d Strecki uf göng, – mer g’höre nüt!

Äs isch längwilig!

De chunnt der B’richt. Weder gäge Bolivie no Chile isch d Strass offe. Also, wieder icherume, i ds alte Zimmer.
Es isch vieri u mer müesse wieder d Zyt überbrücke.
Znacht ässe mer wieder mit Bettina u Pascal.

Hoffentlech wird’s morn besser.

Bolivia Tag 117


Mittwoch, 25 Juni 2025

Hinterlassen Sie eine Antwort

blank

 

Datum:      25.06.2025
Ufenthalt:  Refugio El Alto

 

Umgäbig:

blankblank blankblank

Erläbnis:

Nach ere rächt guete Nacht, es isch gar nid so chalt worde, erwache mer mit eme bedeckte Himmu. Es zieht wieder. Zum Zmorge dörfwe mer i ne Art Spiissaal. Zmorge für üs het es nümm, aber das macht nüt, mir muesse sowieso d Läbermittel bis zur chilenische Gränze brucht ha. Auso git es Müesli mit Joghurt u Kafi derzue.

Mer fahre no einisch rückwärts uf der Route. Öppe zwänzg Kilometer vor üsem Standort sig es Geisirfäld wo me Geisire in Aktion chönn g’seh. Es geit nid so wyt, drum fahre mer häre. Mer si froh, chöi mer i ds Outo stige, da drinn isch wäsentlech wermer.
Das Geisirfäld hei mer bim erschte Dürefare o scho g’seh. Leider hei mer denn z früech ufg’gäh.
Geisire stige kener. O nid nach drüviertel Stung. D Löcher, wo die Vulkanhitz usechunnt, itz nume i Form vo Dampf, si aber o sehr interressant, farbig u i de skurilschte Forme.

So, u itz faht es a schneie. Zersch isch das no fasch schön:Graupel, Näbel, Dampf. Mer mach üs uf e Rückwäg zum letschte Übernachtigsort. Ds Schneie u Lufte wird gäng wie schlimmer. Zytewys g’seht me d Fahrspur ganz schlächt. Wieder bim See unger schneit es zwar no, aber es schint de doch e Bitz besser.

Mer entschliesse üs, no i Desierto Salvador Dali z fahre. Es sig e Ort voll schöner Farbe u Gesteinsforme.
Mer finge der Wäg dert häre – u o wieder uf d Houptstrass zrügg, aber: Der Schneesturm nimmt zue, vo Farbe g’seh mer gar nüt, d Forme ahne mer im Schnee. Mer mache paar Fotos u chehre de um.

Der wyter Wäg isch e Tortur, wo mir zwe no nie erläbt hei.

Schneesturm vom Strübschte. A g’strängt stiere mir zwe dür d Frontschibe. Währed em Fahre g’seh mer mängisch eifach nume no wyss. Der Luft tribt der Schnee i Stübete über ds Land. Am Strasserand git es Wälme un es wird schwierig sech z orientiere. Mer fahre oder düssele, chrütze mehreri Outo u chöme de Irgendeinisch im Refugio el Alto a. Ds Doppuzimmer a 50$ u es Znacht i Ussicht. Ds Uslade vom Nötigschte isch e Tortour. Chalt-chalt-chalt u nass.?

Im Refugio isch es de eifach nume no chalt. Ds Ässe isch guet. Der Luft pfift dür ds Hus u tribt Schnee iche.
Eifach nume no i ds Bett!!

 

Bolivia Tag 116


Dienstag, 24 Juni 2025

Hinterlassen Sie eine Antwort

blank

 

Datum:      24.06.2025
Ufenthalt: Chalviri

 

Umgäbig:

blankblank

blank

Erläbnis:

D Nacht im Hostal isch wenigschtens warm g’sy, ömu unger der Dechi. Dass mer d Chuchi dörfe bruche isch o guet.
Mer fahre vor de Zähne ab u de chunnt; – Wüeschti.

Ungerwägs g’seh mer Fontäne. Heinz isch de Meinig, das sig e Geisir. I bi mer da nid so sicher u g’seh ehnder Rouch. Nu, mer fahre uf dä Bärgrügge ueche.
Dert acho, isch es e Geisir. Dä wird irgendwie industriell usb’bütet. E grosse Zuun geit ringsetum, dinn stöh e Anzahl eigenartegi Geböide. Bewacht wird die Alag vom Militär.

O uf em wytere Wäg finge mer ke Geisir meh. Nu de, ds nächschte Ziel isch es ‹Agua Termales›. Das isch wieder mal e a g’nähmi Abwächslig. Es Becki voll schön warmem Wasser.
Besser als d Dousche hüt am Morge. Das isch de e Leger g’sy! Zwe Häne, eine chalt eine warm, warm ufdrähie: chalt. Füf Minute warte, g’spüre: chley warm. Nu de, Chleider wäg u … i der Zwüschezyt tröpfelet’s nume no u de isch fertig, ke Wasser meh!

Im Warmwasserbecki träffe mer zwöi jungi Lüt us Lyon, die chöme us em Süde u chöi wichtegi Tipps u Infos wytergäh. Heinze isch ganz lang im Wasser. Mi tüecht irggendeinisch e tüeis. Im Outo cha n i no B’richte schribe.

Der pazifisch Fürring isch e Begriff. Uf dere ganze ‹Linie› si Vulkane, wo aktiv si. Bolivie isch zum Teil o da drin i g’schlosse. Mer si i me vulkanisch aktive Gebiet hie.

Zum Übernachte fahre mer de i ds nächsche Dörfli. Chalviri heisst das. Näb me Hus dörfe mer ds Kamel ufstelle. Chley windg’schützt, dass es mi nid furtluftet.

Es git äuä e chalti Nacht!

 

Bolivia Tag 114


Sonntag, 22 Juni 2025

Hinterlassen Sie eine Antwort

blank

 

Datum:      22.06.2025
Ufenthalt:  Canyon ???

 

Umgäbig:

blank blank blank blank

Erläbnis:

Mer si geschter zum Laguna Turquin g’fahre zum Übernachte.

I ha scho mänge Luft erläbt, aber dä, wo üs letscht Nacht um d Ohre, respektive um ds Kamel pfiffe het, isch scho b’sungersch g’sy. Zytewys het das mi Empore g’hudlet, i ha g’meint es trag mi furt. Chalt isch o worde, Heinze het drü Mal g’heizt.

Itz isch Morge u mer schlötterle em Sunneufgsng etgäge.
Ds Zmorge geit de vei guet. D Sunne wärmt u mer stöh im Windschschatte. De cha me der Kafi u d Schnitteli g’niesse. Ds Abwäsche git aber so chalti Finger, dass si fasch abg’heie.

Mer fahre de zitig ab. Üsi hütegi Tour geit de Seene entlang. D Flamingos da drin hei nume chlyni Löcher im Isch für z frässe. Über Nacht friere si teilwys i u chöi ersch abflügr wen es touet. Der Aflug u d Landig wärde zu unfteiwillige Turnüebige.
Laguna Cñapa, Smelly Lake, Laguna Honda u d Laguna Ramaditas si uf üse Route, derzue no paar chlyneri Seeli.

Mer si i re Wüeschti u g’seh grandiosi, majestätischi Vulkane.
Scho gly het hüt der Luft wieder ufdrähit. Mer choche Zmittag im Windschatte vom Kamel u o hie isch ds Abwäsche e Tortour.

Derfür si all die Bärge, wo die meischte Vulkane si, e Meischterleischtig vo der Natur. All die Farbe u Forme g’falle mer sehr. Irgendeinisch müesse mer de aber brämse mit fötele.

Zum Übernachte fachte mer i ne Art Canyon . Hinger Steine sueche mer Windschatte. Es isch chalt!
04.30h Duss isch sicher minus 15 Grad, dinn o unger Null. Heinze heizt unzählegi Mal. Ds Wasser i mire Fläsche het Antarktis!.