Schlagwort-Archive: Fleisch

Argentina Tag 24


Mittwoch, 30 Juli 2025

1 Antwort

 

 

Datum:      30.07.2025
Ufenthalt:  Palmira

 

Umgäbig:

Erläbnis:

So, itz het der letscht Tag also a g’fange. Wo mer ufstöh, isch der Valentin scho lang am Wärkle. Scho geschter het er g’seit, dass er es Abschiedsässe wöll mache. Geschter het er de o Härdöpfu g’chochet u so.blankMer zmörgele u churz dernah chunnt e Cousin mit sire Fründin verby. Mer wärde ‹argentinisch› begrüesst. Das git eis Hallo, u si höckle de zäme.
Heinze muess hüt wieder i ne Wärchstatt. Der Tank isch ja no gäng undicht. Er verschwindet.

I nime mer no einisch Zyt zum düschele u dernah probier i no n es Mal, i mire Täsche Ornig z mache. Irgendeinisch düecht mi, es wär schön, no chley z pfüsele. I richte mi uf em Bett i u – wusch, bi n i wäg!
Am Nami, halbi zwöi, chlopfet’s u Heinze rüeft. Wo n i de i d Chuchi chume, si die drü Argentinier u Heinze scho voll am Ässe u Trinke. Der Valentin het e Tischgrill ufg’stellt, si brätle Fleisch u für mi het er vegetareschi Empanadas g’macht. (Zum Glück isch er mal Beck g’sy.)blankVerschlafe, wie n ig bi, probier i, bi däm Fescht mit z halte.
Die Empanadas si sehr guet u der Härdöpfusalat o. I bi mer aber eifach nid so g’wanet, us em Bett z cho u diräkt z ässe. Da i am Vormittag g’meint ha, das Ässe sig ersch am Abe, ha mer wäg em Schlafe o nid so Gedanke g’macht.
Es wärde unzählegi Salut’s g’macht, es wird sehr viel Fleisch g’gässe, u d Wyfläsche wärde fasch läär. Vo de G’spräch berchum i nume e Teil mit. We Argentinier unter sich si, wird sehr schnäll g’redt.
Em halbi vieri isch dä B’suech wieder wäg, mer wäsche ab u nachhär isch «Siesta».

Um die sächse si mer de wieder z dritt i der Chuchi. Es git no viel z b’richte, ab z rächne u z veribare. Derzue git es e Kafi us Peru, wo n ig nümmi ds Gepäck cha näh.
Speter wird ds Kamel no g’reicht. I mache der B’richt.
Morn bringt mi der Valentin zum Flughafe.

Argentina Tag 19


Freitag, 25 Juli 2025

Hinterlassen Sie eine Antwort
blank

Palmira, Haus von Valentin

 

Datum:      25.07.2025
Ufenthalt:  Palmira

 

Umgäbig:

blank

blank

Erläbnis:

Me stunet, was da i me Outo alles Platz het u muess putzt si. Aber es guetet.

Hüt morge het es bi mir hert mit erwache. Am nüni isch es sowyt, – u Heinze macht scho Kafi. O hüt git es diversi Sächeli zum abwäsche u o no paar Maschine Wösch.

D Sunne isch hüt g’nädiger mit schyne. Es wird veiechly warm u d Wösch trochnet. Mer wärkle der ganz Vormittag u Mittag. Na de eis fahre mer nach San Martin. Wie gäng isch es schwierig, es offnigs Resturant z finge. Derzue chunnt, dass hüt Firtag isch. Anschinend hei hüt alli frei drum si sie meischte Beize zue, oder hei am früeche Nami zue g’macht.

Dür ne fründlegi Frou i re Konditorei vernäh mer, dass ds Cafe de la Patria offe heig u me dert chönn ässe. Mer göh häre u ässe vorzüglech, – ömu ig. Heinze muess mit der argentinische Grössi vo sim Fleischbitz kämpfe, aber i gloube es isch o guet.

Zrügg i der Konditorei näme mer es Kafi u ig no es Stückli Süesses.
Der Nami isch g’loffe u mer fahre hei. Das heisst nach Palmira, zu Valentins Huus.

I packe de mi Gofere u Heinz pützerlet no e Latärne.
Na me Kafi isch ds Ändi vo däm Tag nach.

Argentina Tag 12


Freitag, 18 Juli 2025

Hinterlassen Sie eine Antwort

blank

 

 

Datum:      18.07.2025
Ufenthalt: Cranja Tia Nora

 

Umgäbig:

blank blank blank blank
blank blank blank blank

Erläbnis:

Der Ufbruch vom Camping isch g’müetli. Mer si hie di einzige Gescht g’sy u si bewacht worde vo zwöne Hüngli, wo die ganzi Nacht näb em Kamel g’läge si. – Natürli i der Erwartig, dass bim Zmorge e Belohnig useluegt.

Mer befolge gäng no d Ratschläg vom Wirt vo geschter. Drum fahre mer i d Área Natural de Cieñaga. Der Wäg dert häre isch o scho spektskulär. Dä Ort, La Ciénaga, am Rio Huaco g’läge, isch einisch ziemli gross g’sy. Hüt si die meischte Hüser umboue i Ferie- u Wuchenändihüsli. Einzelni, wie zum Bispiel d Schuel, verg’heie.

blank

Mal e Schuel g’sy.

D Landschaft u d Natur g’falle mer. Mer mache e chlyni Wanderig (rund 4.5 km) i re rächt frömde Wält. Nach soviel im Outo hocke tuet das üs beidne sehr guet.

Der wyter Wäg füehrt is dür ne Bärgchetti i ne nöii Äbeni iche. Chum chöme mer dür ne Schlucht, isch e Stousee vor is. Der Embalse los cauquenès isch sicher es Vogelparadies, aber o e Energiespycher u ne tolle Usflugsort. In San Josè de Jachál ässe mer. Ds Reschturant isch wieder sehr guet u nüt vo Fleisch für mi.

Der wyter Wäg wird fasch zu me Renne. Einersits si mer chley spät dranne, angerrsits isch der Wäg wyt. Die nächschti Station isch San Juan. Bis dert git es ke sinnvolli Müglechkeit zum Übernachte. Drum muess Heinz die 145km dürefrese.

Der Camping Cranja Tia Nora, isch de aber sehr guet. Es het, was mer bruche. Was wott me me?

Argentina Tag 11


Donnerstag, 17 Juli 2025

Hinterlassen Sie eine Antwort

blank

 

 

Datum:      17.07.2025
Ufenthalt: Brisa de Huaco

 

Umgäbig:

blank blank blank blank blank blank

Erläbnis:

Ds Erwache uf em Campingplatz geit i Etappe. im Schlafsack isch guet. Use schlüfe, i d Chleider, gah Zmorge mache, zmörgele bis zum Abwäsche isch tämperaturmässig ei Abstieg nach em angere. Es isch chalt; – bis d Sunne am nüni chunnt.

Glücklech,wär e Platz uf em Camping a der Sunne het. Dusse isch um die eis Grad.

Vo Chilecito fahte mer lang na de zähne los. D Sunne wärmt mitlerwile scho rächt. Mer frese dür Äbene mit ‹Struchwüeschi›. Zwüschedüre queere mer grossi, uszröchneti Flusslöif. Ab Sonagasta si mer i re Bärgwält vo luter rote, verwitterete Felse. Vereinzelt het es Äbene wie im Altiplano. In Pagancillo finge mer ds Reschturant El Diego. Hie ässe mer z Mittag. Ig ha Ricottaravioli, wo sehr guet si.

Die errodierende Felse hei zum Teil abetürlechi Forme. Deswäge u o wäg der Tierwält isch hie o e Nationalpark. Will der Itritt tüür isch u will me de e no tüüreri Tour muess bueche (mit em eigete Outo darf me nid fahre), verzichte mer uf ne Parkb’suech. Das o, wil o der Wirt vom El Diego fingt es sig z tüür. Är zeigt de uf, wo’s o schön sig

Ds Agebot i de Reschturant in Argentinie isch, wie bi üs, starch abhängig vom B’sitzer u vom Standort. I de Stedt si vegetareschi Menü meischtens scho uf der Spyscharte. Uf em Land het me da weniger Glück. Es git Lüt, wo sech es Menü ohni Fleisch nid chöi vorstelle. Toll dass es de Wirte wie im El Diego git, wo sehr ufg’schlosse si.

Am Nami fahre mer de die vorg’schlagni Route. Sie füehrt üs dür ne wytere Abschnitt Bärgwält. Nümm so rot, aber nid minder schön. O die Bärge bestöh us Konglomerat i verschiedene Farbe. Schichtwis g’seht me d Ablagerige i de Felswäng.

Chum si d Bärge düre, chah Heinze wieder Gas gäh. Ziel isch der Camping Brisa de Huaco wo mer hüt als einzegi Gescht zum Übernachte iträffe.