Schlagwort-Archive: Edi

Argentina Tag 24


Mittwoch, 30 Juli 2025

1 Antwort

 

 

Datum:      30.07.2025
Ufenthalt:  Palmira

 

Umgäbig:

Erläbnis:

So, itz het der letscht Tag also a g’fange. Wo mer ufstöh, isch der Valentin scho lang am Wärkle. Scho geschter het er g’seit, dass er es Abschiedsässe wöll mache. Geschter het er de o Härdöpfu g’chochet u so.blankMer zmörgele u churz dernah chunnt e Cousin mit sire Fründin verby. Mer wärde ‹argentinisch› begrüesst. Das git eis Hallo, u si höckle de zäme.
Heinze muess hüt wieder i ne Wärchstatt. Der Tank isch ja no gäng undicht. Er verschwindet.

I nime mer no einisch Zyt zum düschele u dernah probier i no n es Mal, i mire Täsche Ornig z mache. Irgendeinisch düecht mi, es wär schön, no chley z pfüsele. I richte mi uf em Bett i u – wusch, bi n i wäg!
Am Nami, halbi zwöi, chlopfet’s u Heinze rüeft. Wo n i de i d Chuchi chume, si die drü Argentinier u Heinze scho voll am Ässe u Trinke. Der Valentin het e Tischgrill ufg’stellt, si brätle Fleisch u für mi het er vegetareschi Empanadas g’macht. (Zum Glück isch er mal Beck g’sy.)blankVerschlafe, wie n ig bi, probier i, bi däm Fescht mit z halte.
Die Empanadas si sehr guet u der Härdöpfusalat o. I bi mer aber eifach nid so g’wanet, us em Bett z cho u diräkt z ässe. Da i am Vormittag g’meint ha, das Ässe sig ersch am Abe, ha mer wäg em Schlafe o nid so Gedanke g’macht.
Es wärde unzählegi Salut’s g’macht, es wird sehr viel Fleisch g’gässe, u d Wyfläsche wärde fasch läär. Vo de G’spräch berchum i nume e Teil mit. We Argentinier unter sich si, wird sehr schnäll g’redt.
Em halbi vieri isch dä B’suech wieder wäg, mer wäsche ab u nachhär isch «Siesta».

Um die sächse si mer de wieder z dritt i der Chuchi. Es git no viel z b’richte, ab z rächne u z veribare. Derzue git es e Kafi us Peru, wo n ig nümmi ds Gepäck cha näh.
Speter wird ds Kamel no g’reicht. I mache der B’richt.
Morn bringt mi der Valentin zum Flughafe.

Argentina Tag 16


Dienstag, 22 Juli 2025

Hinterlassen Sie eine Antwort

blank

 

 

Datum:      22.07.2025
Ufenthalt:  Palmira

 

 

Erläbnis:

Es isch e graue Tag, wo üs hüt erwartet. Es isch total bedeckt u irgendwie wott üs der Winter in Argentinie zeige, dass er o no andersch chah. D Tämperature dusse si so um die zäh Grad. I bi i der Nacht froh, brönnt ds Gasöfeli im Zimmer. (Obwohl eim mit so eim o g’schmuech chah wärde.)

Heinze rochlet zwar no, aber es schynt ihm besser z gah. Nach em Zmorge heisst es packe. Mer zieh hüt us em Hotäl Edian us. Das brucht wieder e par Vorbreitige, bis mer us em Hof sy. Es geit de aber tifig. Wieder pumpe, Gepäck ilade, verabschiede, furt si mer. Nach eme B’suech i re Apothek mache mer is uf d Suechi nach Toyota Ersatzteile. Ds Kamel brucht e nöie Ölfilter. Da geit d Zyt ume.

Für ds Kamel i z lagere, brucht Heinze no es Stromkabel. Da mer ir Nechi vo me grosse Carrefour si, göh mer dert gah luege. Leider ohni grosse Erfolg. Ds richtige Kabel hei si nid.

Heinze kämpft geng no mit sire Ercheltig, er chah eim leid tue. Mer beschliesse, Zmittag z ässe u finge, nach Sueche, e Art vo Café, wo me o Pizza macht. Woby, es isch meh e Fertigpizza, wo üs da serviert wird. Nu, i der Not…

Nach anderthalb Stunde Fahrt si mer i me Vorort vo Mendoza. In Palmira wird ds Kamel uf si Wyterfahrt nach Patagonie und uf e Heinze warte.

Bevor das aber sowyt isch, müesse mer i de nächschte Tage no e rächti Putzaktion mache.

Für hüt git es zersch Rueh, de e Tee u de es Bett.

Argentina Tag 14


Sonntag, 20 Juli 2025

Hinterlassen Sie eine Antwort

blank

 

 

Datum:      20.07.2025
Ufenthalt:  Mendoza

 

Umgäbig:

blank blank blank
blank blank blank

Erläbnis:

Itz bi n i also in Mendoza, im Hotel Edian. Liege uf em Bett u isse Nüssli. Eigetli hätte mer doch zur Stärnwarte wölle… Doch, alles schön der Reihe nah.

I g’höre i der Nacht der Heinze erniesse u hueschte, kes guet› Zeiche. Am Morge stah n i am halbinüni uf, – vo ihm no ke Regig. Wo n er de ufstaht, isch er nid breite. mi düecht, er sig total ercheltet.
Vo i dBärge fahre isch de nümm. Dert isch chelter, der Wäg isch asträngend u nächtlechi Usflüg si o nid so ds Wahre für Heinz. – Mer fahre hüt nach Mendoza.

Es isch Sunnti, i der Stadt hei nume weni Läde offe. Uf em Land usse isch 14°C un es het Verchehr. Mer fahre wieder uf der Nationalstrass 40.

blank

Es isch nid es extrem längs Stück, es strängt ne a, das Fahre. Aber, – er wott sälber. Ungerwägs halte mer, i choufe mer öppis z ässe, Heinze schlaft.

So um die viere si mer ds Mendoza; – e grossi Stadt.

blank

Bim dritte Alouf finge mer es Hotäl. Bis ds Kamel bi der Garageifahrt iche passt, muess i mehrmals uf ds Kamel ueche: Fessli ache näh, Befeschtigungsgurte löse, luege.
Heinze laht no Luft us de Redli. Schlussäntlige passt’s wie mit em Schuehlöffu.

Heinze g’heit im Zimmer uf ds Bett. I tue no Gepäck buggle; – u ha itz fasch e Zuckerschock. Dä ‹Mix Caribe› isch wahnsinnig zuckeret.

Itz drückeni eifach d Düme u warte uf morn.

Argentina Tag 10


Mittwoch, 16 Juli 2025

Hinterlassen Sie eine Antwort
blank

Sandsturm

 

 

Datum:      16.07.2025
Ufenthalt: Chilecito

 

Umgäbig:

blank blank blank

Erläbnis:

Es geit wyter, o we Mendoza scho fasch gryfbar isch. Eigetli passiert hüt nüt Grosses, aber was wott me. Sicherlech isch erwähnenswärt, dass es ds erschte Mal uf dere Reis rägnet. Em Morge, churz nah de füfe schüttet’s für fünf Minute.

I stah hüt echley früecher uf. I muess unbedingt d Byträg bis zum füfzähte bis zu üsere Abreis im Netz ha. Ds lokale Internet het zwar geschter Ussetzer g’ha, isch aber rächt guet.

Usserdäm choufe n i no es nöis Display für mis Handy uf Ricardo.

Em achti göh mer gah zmörgele. Es isch chalt dusse, – wie geschter unger der Duschi! D Chleyder us der Wösch si zrügg u ds Zimmer zahle müesse mer i der Apothek näbena.

Viertel vor elfi fahre mer los. Allerdings nutze mer d G’lägeheit vo der grosse Ortschaft, no i ne Supermercado z gah. Es si scho wieder e paar Sache us der Frässchischte ufb’brucht.

D Fahrt isch unspektakulär. Mer hei gueti Strasse u chöme schnäll vorwärts. Problem git es nume, wo mer am Mittag wei gah ässe. Entwädwr het es kener Restaurant oder si si zue.

Ersch spät fahre mer zu me Italiener-Lokal. Der Chef empfaht üs pärsönlech u bedient is. Mer ässe wunderbar. E Gascht, wo uf ds Kamel isch ufmerksam worde, stellt sech als Bürgermeischter vo Roldán, bi Rosario vor. I dere Ortschaft si Nachfahre vo Schwizer-Uswanderer daheim.
Heinz geit ne de später eventuell gah b’sueche.

Uf der Wyterfahrt sueche mer scho wieder na re Übernachtigsmüglechkeit. In Chilecito finge mer e Camping, wo üsne Vorstellige entspricht.