Datum:      21.02.2025
Ufenthalt:  San Pedro de Atacama

 

Umgäbig:

 

 

Erläbnis:

Ds Ufstah isch relativ müehsam. Ds warme Bett, die chüehli Luft, der labil Geischt; – alles spricht dergäge, das Bett z verlah. Irgendeinisch, es isch fasch nüni, raffe mer is uf. Ds Zmorge isch no chley eisitig. I mim Buch gluntschet’s der halb Vormittag vom Joghurt.

Heinze fahrt wyter mit Bilder u Tägschte für redcamel.ch.
I ha g’seh, dass i der Stadt e Beckerei «SUIZA» söll si. Usserdäm wott i no na der Uhr luege.
Also mache mi uf e Wäg i d Stadt. D Strasse si beidsitig mit Muure u Hecke i g’rahmt. Zur Beckerei chum i rächt schnäll. Die sött am nüni uftue, em Viertel ab zähni isch da aber no alles zue. Ja guet, de gah n i na der Uhr gah luege; – aber o dert isch die Verantwortlechi no nid da. I dänke, i sött öppis brotigs mitbringe. Mit chley Sueche finge n i e Beckerei u dert o Brot.

Uf em Rückwäg isch bim Suizo gäng no zue. D Sunne schynt u d Tämperature stige mit em Sunneschyn uf guet zwänzg Grad.
Wieder im Hostal muess o ig luege, dass i d Byträg fertig i ds Netz tue. Am drü bi n i sowyt u gly druf Heinz o.

Mer göh no einisch i d Stadt. I cha mini Uhr mit nöiem Bändeli abhole (Unikaty!). Nachhär göh mer gah ässe u Heinz fötelet no.
Sobal d Sunne achegeit, wird es sofort chüehler. Es isch äbe geng no Winter.

 

• Location: 22° 54′ 41.7024″ S 68° 12′ 3.9924″ W

 

Datum:      1.0272025
Ufenthalt:  San Pedro de Atacama

 

Umgäbig:

 

Erläbnis:

Tja, Ruhetag! So em achti düecht mi de glych ii sött uf. Es guet’s Zimmer, es guet’s Bett, e warmi Dusche, – was wott me meh? Die Ungerkunft hie g’fallt mer. Ds Hostal «Km Zero» isch nid überkandidlet, aber guet.

Zmörgele isch nid so mügli. Es isch äbe würkli so, dass da nümm viel i der Frässchischte isch. Aber Kafi isch no ume.
Mer löh hüt la wösche. Uf die zähne probiere mer, die Fluet a Infos u Bilder i Computer z töggele. Das isch chley e müehsami Büetz. All die Bilder z sichte, uszwähle u z bearbeite.

Uf e Mittsg göh mer i d Stadt. Wahnsinnig, wieviel Tourischte da ungerwägs si. Der Grossteil si aber SüdamerikanerInne. Entsprächend het es de o viel «touristeschi» Lädeli. Extrem vieli biete Toure a, de het es Lädeli für Souveniers, für Handwärch, für Ramsch und und und.
Es het aber o gueti Resturant. Sogar settegi, wo guete Kafi mache. Mer gniesse’s!

Mer ässe ganz guet. Churz dernah het mi Uhr ds G’füehl si müess sech sälbständig mache. Ds Bändeli isch kaputt. E Armbanduhr ohni Band? Mer frage i so me Handwärchslade. Die säge zersch «No», de göh si aber uf d Suechi u i me Nachberlädeli fingt sech de e Frou, wo mit Läder schaffet. Si verspricht, die Sach über Nacht z flicke.

Mer si de rächt lang i däm Lade.

Ersch relativ spät göh mer wieder zum Hostal zrügg u fahre wyter mit der Compibüez. No im Bett tüe mer drann grüble, dass wieder mal öppis nöis z läse u luege isch uf de Websitene.