Datum:      6.07.2025
Ufenthalt:  San Pedro de Atacama

 

Umgäbig:

 

Erläbnis:

Sunntig u früech ufstah -, aber es isch nötig, mer hei e ziemli länge Wäg vor is.
Em halbi nüni stöh mer uf. Relativ schnäll merke n i, dass da eine toll über e Durscht trunke het. Es isch eine vo de Duurmieter, wo ds Maas nid g’funge het. Bis mer de abfahre bemühe sich mehreri Lüt um ne. Es schynt e arme Tüfu z sii.

Geschter Abe, währed mer uf ds subere Kamel g’wartet?hei, si mer bim Beck g’sy u hei es Brot g’chouft. Hüt bim Zmorge besteit das us zwe Teile; – es het bim Heinz nid i Rücksack passt un uf der Strass hei si geschter g’stoubet… 😯

Also, mer zmörgele: aber de müesse mer los.
Üses Ziel hüt isc h ds Geysirfäld vom Vulkan Tatio. Das isch zwar esrächts Stücki z fahre, aber üs interressiert das Vulkänliwäse. Zum Glück isch d Landschaft so interressant, dass der Wäg weniger e Rolle spielt. D Sicht uf d Vulkanchötti gäge Bolivie isch imposant. Es git Chegle, wo genau eme Vesuv entspräche, angeri si explodieet, oder hei der Spitz verlore. Es git aktivi Vulkane u angeri si scho sider Jahrhunderte tod.
Heinze vermisst bi dene d Röichli schmärzlech. 😛

D Besichtigung vo däm Geysirfäld isch natürli nid gratis. Bim Igang wärde eim für e Itritt e Bigete Verhaltensregle ufbrummt. Dass d Geysire nam Mittag nümm höch sprütze isch üs scho ungerwägs g’seit worde. D Tämperatur vo der Luft heig e Ifluss. Drum wärde d Tourischte mit de Bösse o am früeche Morge häre g’charret.

Üsi Erwartige si also nid so wahnsinnig. Es isch nah de eis u mer si witgehend allei i dere Äbeni. Es macht de aber doch Idruck, we’s us jedem Loch im Bode gurglet u dampfet. Einzelni Fontäne erreiche de trotzdäm e Höchi vo über me Meter. Was da im Ungergrund vor sech geit cha me nume ahne. Me tuet guet dra, die Wässerli nid z berüehre, die choche mit meh als hundert Grad.

Der Rückwäg wird nume no ungerbroche vo Fotohalte. Süsch fahre mer aber zügig bis San Pedro u dert uf diräktem Wäg zu der Tankstell.  Dert fülle mer d Tänk vom Kamel. Später göh mer gah ässe u zrügg i ds Hostel.

Morn wei mer probiere, nach Argentinie z cho. Wie das de dert isch, wüsse mer gar nid. I cha nid verspräche, dass i morn Abe Internet ha u ne B’richt cha schicke.

 

 

Datum:      05.07.2025
Ufenthalt: San Pedro de Atacama

 

Umgäbig:

Erläbnis:

Hüt si mer der füft Tag in San Pedro. Un es isch nid so, dass mer is i dä Ort verliebt hätte. Zersch isch es e willkommene Ufenthalsort nach üsere bolivianesche Schneetour g’si. I der Zwüschezyt isch San Pablo o scho wieder zu me chlyne G’fängnis worde. Eigetli hei mer nume chley chileneschi Luft wölle schnuppere u de wyter nach Argentinie. Will aber d Päss nach Argentinie zue si, hocke mer wieder fescht. Am siebete siebete sölle si ufgah. Mal luege…

Heinze het hüt ds Feschtlige. Das heisst, er erwachet ersch nachdäm i düschelet ha, am halbi zähni. Wahrschynlech muess er sech vom geschterige Marsch erhole.
Nam Zmörgele, abwäsche u so, fahre mer wieder i d Innestadt. I muess gah Gäld wächsle u no so chley kömerle. Vo da fahre mer i ds Mars Valley / Death Valley oder Valle de la Muerta. Das isch e total unwürklechi Umgäbig. Läbe z sueche isch hie e schwieregi Ufgab. Es gäb wildi Tier, – die wüsse aber sech z verstecke.
Irgendeinisch isch fertig mit Outofahre. Unger a me Bärg geit es de z Fuess wyter. Dä Ufstieg isch nid so für Heinze. I mache die Strecki allei u stuune wieder einisch ob der Stilli i der Wüeschti. Paar Vögeli si alles wo mi begleitet.

Heinze fahrt e Umwäg u wartet uf der angere Syte vom Bärg. Anderthalb Stung später ha n i die rund füf Kilometer der Bärg düruf g’meischteret u triffe ne wieder.
Es isch es guet’s Türli g’si.

Vo dert fahre mer zrügg bis San Pedro de Atacama. I der Ungerkunft mache mer zersch ‹Büro›, später ‹berchunnt ds Kamel e Dusche (u mir es Kafi) u am Schluss göh mer gah ässe. Heinze blibt no chley ir Stadt u ig gah zrügg i ds Hostel.

 

• Location: 22° 54′ 19.728″ S 68° 14′ 44.2247″ W

 

Datum:      4.07.2025
Ufenthalt:  San Pedro de Atacama

 

 

Umgäbig:

Erläbnis:

Der früech Vogu drähit sech no einisch u schlaft no chley. So g’seht das o hüt us.

Es isch e wunderbare Morge. Ds Wätter isch wie geng i de letschte Tage: schön. Dank üsne Ichöif hei mer es Schmarotzer- Zmorge u das duuret o chley.
Heinze mechet no ds Pack mit de Summerchleyder uf ds Kameldach u ig tue abwäsche u dernah no Vanish-Wösch behandle.

Am halbi zähni verlöh mer ds Hotäl. Mer fahre hüt itz i ds Valle de la Luna. Dä Ort wird vo Chile touristisch sehr vermarktet. Eigetli isch es grosses Wüeschtetal. Me muess es Itrittsbilie löse (wird später o mehrfach kontrolliert). Usserdäm isch es e Nationalpark, wo me i bestimmte Beryche darf beträtte. Uf ere Houptroute fahrt me i das Tal. Bi sehenswärte Orte si Parkplätz. Vo dert darf me definierti Wanderige ungernäh. U die Parkangestellte kontrolliere. Bi vierzg Grad si o mir ungerwägs.

D Landschaft isch grandios! Dür die stränge Bestimmige isch garantiert, dass si’s blibt.
Mer si längi Zyt ungerwägs. B’sungersch o der Ort, wo früecher Steisalz isch ab’boue worde interressiert mi. E Teil vo de Idrück wiederholt sech.

Gäg die füfe fahre mer us em Park zu me Mirador mit em Name ‹Kari›. Mer si vo de erschte dert. Bal si Masse vo Tourischte uf däm Ussichtspunkt. Alli warte uf e Sunneungergang.

Bis am Ändi warte mer nid. I me guete Reschturant in San Pedro schliesse mer dä Tag mit me Ässe ab.

 

• Location: 22° 55′ 3.2411″ S 68° 15′ 6.8327″ W

 

 

Datum:      21.02.2025
Ufenthalt:  San Pedro de Atacama

 

Erläbnis:

Der ‹Ein Wort Mensch› meint: .»Heitze!» Es geit de no bis am nüni, de si beid us de Fädere.
Düschele u so, de chunnt zmörgele u so, nachhär ruumt Heinz ds Kamel uf. I grüble im Internet ume wäg mire Chopflampe.

D Zyt vergeit im Flug. Es isch fasch zwöi, wo mer i Richtig Stadt fahre zu me Supermercado. Dä isch am Rand vo der Fuessgängerzone. Google zeigt d Strecki uf. Öb Einbahnstrass oder nid, Google zeigt e Route u blibt derbi.
Irgendeinisch si mer de dert u göh gah ichoufe. Es isch e ganzi Storete a Sache, wo mer müesse ha. Der «Chuchischaft isch fasch lär. D Resäve si ufb’brucht. Drum wird ds Chäreli de scho no gly voll.

Anschliessend hätte mer no i ds Valle de la Luna wölle. D Zyt u d Anzahl Tourischte füehrt derzue, dass mer das ersch morn mache.
Also blibt nume, zrügg i d Unterkunft z gah. Dert grüblet Heinze siner Winterchleider vom Kameldach. Dünni Shirts ueche, Winterchleider ache, är wott ja no bis Patagonie.

E Znacht-Kafi u es Chüechli vom Suizabeck runde der Abe ab. Scho gly isch fischter u duss wird es chelter. E Tag, wo mer viel g’macht hei, aber äbe nid spektakulär…