Schlagwort-Archive: B’suech

Argentina Tag 24


Mittwoch, 30 Juli 2025

1 Antwort

 

 

Datum:      30.07.2025
Ufenthalt:  Palmira

 

Umgäbig:

Erläbnis:

So, itz het der letscht Tag also a g’fange. Wo mer ufstöh, isch der Valentin scho lang am Wärkle. Scho geschter het er g’seit, dass er es Abschiedsässe wöll mache. Geschter het er de o Härdöpfu g’chochet u so.blankMer zmörgele u churz dernah chunnt e Cousin mit sire Fründin verby. Mer wärde ‹argentinisch› begrüesst. Das git eis Hallo, u si höckle de zäme.
Heinze muess hüt wieder i ne Wärchstatt. Der Tank isch ja no gäng undicht. Er verschwindet.

I nime mer no einisch Zyt zum düschele u dernah probier i no n es Mal, i mire Täsche Ornig z mache. Irgendeinisch düecht mi, es wär schön, no chley z pfüsele. I richte mi uf em Bett i u – wusch, bi n i wäg!
Am Nami, halbi zwöi, chlopfet’s u Heinze rüeft. Wo n i de i d Chuchi chume, si die drü Argentinier u Heinze scho voll am Ässe u Trinke. Der Valentin het e Tischgrill ufg’stellt, si brätle Fleisch u für mi het er vegetareschi Empanadas g’macht. (Zum Glück isch er mal Beck g’sy.)blankVerschlafe, wie n ig bi, probier i, bi däm Fescht mit z halte.
Die Empanadas si sehr guet u der Härdöpfusalat o. I bi mer aber eifach nid so g’wanet, us em Bett z cho u diräkt z ässe. Da i am Vormittag g’meint ha, das Ässe sig ersch am Abe, ha mer wäg em Schlafe o nid so Gedanke g’macht.
Es wärde unzählegi Salut’s g’macht, es wird sehr viel Fleisch g’gässe, u d Wyfläsche wärde fasch läär. Vo de G’spräch berchum i nume e Teil mit. We Argentinier unter sich si, wird sehr schnäll g’redt.
Em halbi vieri isch dä B’suech wieder wäg, mer wäsche ab u nachhär isch «Siesta».

Um die sächse si mer de wieder z dritt i der Chuchi. Es git no viel z b’richte, ab z rächne u z veribare. Derzue git es e Kafi us Peru, wo n ig nümmi ds Gepäck cha näh.
Speter wird ds Kamel no g’reicht. I mache der B’richt.
Morn bringt mi der Valentin zum Flughafe.

Argentina Tag 16


Dienstag, 22 Juli 2025

Hinterlassen Sie eine Antwort

blank

 

 

Datum:      22.07.2025
Ufenthalt:  Palmira

 

 

Erläbnis:

Es isch e graue Tag, wo üs hüt erwartet. Es isch total bedeckt u irgendwie wott üs der Winter in Argentinie zeige, dass er o no andersch chah. D Tämperature dusse si so um die zäh Grad. I bi i der Nacht froh, brönnt ds Gasöfeli im Zimmer. (Obwohl eim mit so eim o g’schmuech chah wärde.)

Heinze rochlet zwar no, aber es schynt ihm besser z gah. Nach em Zmorge heisst es packe. Mer zieh hüt us em Hotäl Edian us. Das brucht wieder e par Vorbreitige, bis mer us em Hof sy. Es geit de aber tifig. Wieder pumpe, Gepäck ilade, verabschiede, furt si mer. Nach eme B’suech i re Apothek mache mer is uf d Suechi nach Toyota Ersatzteile. Ds Kamel brucht e nöie Ölfilter. Da geit d Zyt ume.

Für ds Kamel i z lagere, brucht Heinze no es Stromkabel. Da mer ir Nechi vo me grosse Carrefour si, göh mer dert gah luege. Leider ohni grosse Erfolg. Ds richtige Kabel hei si nid.

Heinze kämpft geng no mit sire Ercheltig, er chah eim leid tue. Mer beschliesse, Zmittag z ässe u finge, nach Sueche, e Art vo Café, wo me o Pizza macht. Woby, es isch meh e Fertigpizza, wo üs da serviert wird. Nu, i der Not…

Nach anderthalb Stunde Fahrt si mer i me Vorort vo Mendoza. In Palmira wird ds Kamel uf si Wyterfahrt nach Patagonie und uf e Heinze warte.

Bevor das aber sowyt isch, müesse mer i de nächschte Tage no e rächti Putzaktion mache.

Für hüt git es zersch Rueh, de e Tee u de es Bett.

Argentina Tag 15


Montag, 21 Juli 2025

Hinterlassen Sie eine Antwort

blank

 

 

 

 

 

 

Datum:      21.07.2025
Ufenthalt:  Mendoza

 

Umgäbig:

blank blank
blank blank
blank blank
blank blank

Erläbnis:

Heinze probiert g’sung z wärde u ig der Tag z g’stalte.
Zmorge ässe mer zäme, – er isch gäng no nid hundert.

Der Tagesablouf isch hüt vo Zuefälligkeite prägt. Am Morge Wösch i d Lavanderia bringe, de zum Coiffeur u chley dür d Stadt schlürme.
Zmittag isse n i e Vegi-Lasagne bi der Anna gägenüber. Isch total fein, aber nid nume billig.

Uf e Namittag starte n i zu me Parkb’suech. Der Parque General San Martin schynt e tolle Ort z sy. Zersch steit aber der Wäg dert häre a. I ha die letschte Monet nid übermässig viel müesse loufe, drum gah n i z Fuess i dä Park.

Mir fallt uf, wie schadhaft vieli Sache si. D Fuesswäge si zwar vielfach plättlet, aber de het es Löcher drin, Absätz wo äuä nid sötte si, o d Hüser si schadhaft. Die argentineschi Wirtschaft erholi sech anschynend, in Mendoza isch das no nid überall acho.

D Stadt mit ihrne Aleeä g’fallt mer, der Verchehr konzentriert sech uf Houptachse, i de Sytestrasse het es weniger, aber geng no g’nue.
Im Park acho, stune n i ab der Grössi. Kes Wunder, isch ds Outo o da im Vordergrund als Fortbewegigsmittel.

E wichtige Teil vom Park si all die Stadie. Natürli het es mehreri Fuessballstadie, der Strass nah si mindeschtens es halb Dotze Tennisklüb. Im Park isch e künschtleche See, wo d Ruederer ihre Riesig Klub hei, i stuune.
Sport schynt in Mendoza e ganz grosse Stellewärt z ha. Vielli Fitnetssegge stöh, nid nume im Park, bereit u wärde o g’nutzt. Löifer i allne Altersgruppe si ungerwägs, aber es het o VelofahrerInne u Rollbrättler, – es aktivs Volk hie.

Im Park b’suechi zersch der Wältbrunne. Dä zeigt aber nid die nöischti Sicht uf die Wält 😠. Denn wett i dä See umrunde, was mer wäg em Böötliklub nid g’lingt. Am Schluss möcht i no d Museo de Ciencias gah erkunde. Hüt isch Mänti, den hei si zu 🫤.

Uf em Wäg zrügg fallt mer die offeti Kanalisation uf. Schynt mer gar nid so dumm u schynt o suber. Uf der andere Site vo der Strass fliesst der Aroyo. I wächsle d Strassesite. D Hüser hie si idyllisch g’läge, über n es Brüggli erreichbar; – aber vieli si unbewohnt, zum Verchouf a g’schribe. U der Aroyo isch e Kloake, grauschwarzes Wasser mit allem Mügleche drin.
Da möcht i o nid wohne.blank

So, itz ha n i mi Kafi ustrunke u ds Gipfeli isch g’gässe.
Hinech muess i no gah d Wösch reiche; u denn vieli Idrück verarbeite.

Argentina Tag 11


Donnerstag, 17 Juli 2025

Hinterlassen Sie eine Antwort

blank

 

 

Datum:      17.07.2025
Ufenthalt: Brisa de Huaco

 

Umgäbig:

blank blank blank blank blank blank

Erläbnis:

Ds Erwache uf em Campingplatz geit i Etappe. im Schlafsack isch guet. Use schlüfe, i d Chleider, gah Zmorge mache, zmörgele bis zum Abwäsche isch tämperaturmässig ei Abstieg nach em angere. Es isch chalt; – bis d Sunne am nüni chunnt.

Glücklech,wär e Platz uf em Camping a der Sunne het. Dusse isch um die eis Grad.

Vo Chilecito fahte mer lang na de zähne los. D Sunne wärmt mitlerwile scho rächt. Mer frese dür Äbene mit ‹Struchwüeschi›. Zwüschedüre queere mer grossi, uszröchneti Flusslöif. Ab Sonagasta si mer i re Bärgwält vo luter rote, verwitterete Felse. Vereinzelt het es Äbene wie im Altiplano. In Pagancillo finge mer ds Reschturant El Diego. Hie ässe mer z Mittag. Ig ha Ricottaravioli, wo sehr guet si.

Die errodierende Felse hei zum Teil abetürlechi Forme. Deswäge u o wäg der Tierwält isch hie o e Nationalpark. Will der Itritt tüür isch u will me de e no tüüreri Tour muess bueche (mit em eigete Outo darf me nid fahre), verzichte mer uf ne Parkb’suech. Das o, wil o der Wirt vom El Diego fingt es sig z tüür. Är zeigt de uf, wo’s o schön sig

Ds Agebot i de Reschturant in Argentinie isch, wie bi üs, starch abhängig vom B’sitzer u vom Standort. I de Stedt si vegetareschi Menü meischtens scho uf der Spyscharte. Uf em Land het me da weniger Glück. Es git Lüt, wo sech es Menü ohni Fleisch nid chöi vorstelle. Toll dass es de Wirte wie im El Diego git, wo sehr ufg’schlosse si.

Am Nami fahre mer de die vorg’schlagni Route. Sie füehrt üs dür ne wytere Abschnitt Bärgwält. Nümm so rot, aber nid minder schön. O die Bärge bestöh us Konglomerat i verschiedene Farbe. Schichtwis g’seht me d Ablagerige i de Felswäng.

Chum si d Bärge düre, chah Heinze wieder Gas gäh. Ziel isch der Camping Brisa de Huaco wo mer hüt als einzegi Gescht zum Übernachte iträffe.