Schlagwort-Archive: bolivia

Bolivia Tag 100


Sonntag, 8 Juni 2025

Hinterlassen Sie eine Antwort

Der Kameltriber isch scho vor Ort! Er holt mi bim Flughafe ab.

Datum:      08.06.2025
Ufenthalt:  La Paz

Flugplatz São Paulo

blank

Start in São Paulo

blank

Vom Flughafen El Alto nach La Paz

blank

Seilbahn in El Alto

Erläbnis:
So, das Bodetecheliabentür het genau hundert Tag duuret. Ir Zwüschezyt isch dä Chnoche wieder zäme g’wachse u mer starte zum zweite Teil vo üsere Reis. Judihudi, es geit wyter!

Die letschte zwe Täg bi n  i uf re halbe Wältreis g’sy. Vo Züri bi n i zersch uf Mailand g’floge, vo dert nach São Paulo, de nach Santiago de Chile u äntlige nach La Paz.

Nu, i bi a cho u das isch wichtig g’sy für mi. I ha de hüt no chley am Kamel g’schrüblet, probiert wieder Herr über mi Koffer z wärde u hinech si mer gah ne Pizza ässe.
U itz wird i pfuuse, – i gloube, das git kener Problem.

 

Bolivia Tag 4


Dienstag, 25 Februar 2025

Hinterlassen Sie eine Antwort

blank

So, der erscht Chlupf isch verby. Cool blibe u organisiere isch a g’seit.
Datum: 24.02.2025
Ufenthalt: La Paz

 

Umgäbig:blank

blank

blank
Erläbnis:

Ja, der humpel di rumpel di Kumpel isch rächt handicapiert. Mer warte no immer uf ne B’scheid vo der Versicherig. Si het no nid entschiede, öb Heinz itz i d Schwiz chönn oder nid. Sie entscheidet o, i weles Spital er muess. Si entscheidet o, öb ig der Heinz begleite, oder öb das e frömdi Pärson isch. U wenn der Heinz i d Schwiz flügt, entscheidet si uf welem Wäg u WENN.

Mer hei aber no anders z tüe. Mer müesse e sichere Unterstand für ds Kamel ha. E g’sichereti, wenn mügli deckti Garage. Da git es zum Glück bis itz mehreri Müglechkeite.

Der Vormittag düre tüe mer Gepäck sortiere: was näh mer i d Schwiz, was blibt da. Mer wei ja wyter reise.

Zum Zmittag göh mer zwöi Hüser wyter. Dert louft ds glyche Prozedere wie gäng ab. «Vegetarisches Ässe? «- «Das hei mer nid! «Ris, Härdöpfu, Salat?» – «Ja, das gieng!»

Nam Mittag reiche n ig ds Kamel uf me g’schützte, aber tüüre Parkplatz u fahre dermit vor ds Hotäl. (Bi chley stolz.)

Dert ruume n i d Läbesmittel usw. use u Gepäck iche.
Heinz passt uf, dass nüt vergässe geit u zwüschedüre muess ne brämse. 😠
Am sächsi chunnt eine, wo es Garage het. Mal luege.

I der Zwüschezyt isch dä Termin uf halbi achti useg’schobe worde.
So Zwüschefäll wie dä mit Heinzes Bei zeige eim, wie abhängig, ja mängisch o usg’lieferet me isch.
I dänke nid, dass mer morn flüge. Villicht am Mittwuch oder Donnschti, mal luege.

I schliesse dermit die Serie a B’richtli u fahte de wyter, we dä Bruch verheilt isch. Bis denn, tschüss!

 

Bolivia Tag 3


Montag, 24 Februar 2025

Hinterlassen Sie eine Antwort

blank

Im dritte Stock z logiere bietet Usblicke. I g’seh der Himmel häller wärde u g’höre ds Rägeli uf em Dach.
Datum: 23.02.2025
Ufenthalt: La Paz

Umgäbig:

blank

blank blank

blank
Erläbnis:

Es geit wyter. O we mir La Paz no lang nid erkundet hei (es Jahr würd nid länge); – mer mache e Reis, u nid Ferie.

Viertel vor siebni: Heinze gah wecke für ds Zmorge.

Dä fluechet nume. (Näb üsne Zimmer im dritte Stock vom Bellmond Hotäl isch no es Baño, es WC mit Dusche. Vor der Türe het es es Filzdecheli.) Also, Heinz isch nächti no gsi Bähnli fahre. Är isch em elfi vo sim Usflug zrügg cho. Wo n är na de eis uf d Toilette isch, het das Filzdecheli z G’füehl g’ha, es müess mit ihm Schlitte fahre. (Der Holzbode isch aber o z guet putzt.) Heinz isch uf em Rügge g’landet u het der Fuess g’hörig verknackst.

Er het de d Nacht düre g’wartet u g’litte u nüt g’seit. Hüt Morge göh mer i d Clinic Medica Lausanne, gah luege, was da isch. … u das a me Sunntig! (anschinend heissi ds ganze Viertel Lausanne)

Gäg die halbe nüne bringt is ds Taxi dert häre. D Ungersuechig duret, es git wahnsinnig viel z schribe, z läse u wieder z schribe. De wird das Fuessg’länk g’röntget. (Der Rötgespezialischt macht das ohni Schutz u wislet de mit em Bild ab.)

Heinze wird i ds Zimmer 204 verfrachtet.
Ja, u de chunnt der B’richt.

Ds Wadebei het e Bruch!

U itze?
Loufe cha n er schlächt, fahre cha n er nid.
Mer beratschlage, was z mache wär. Schlussäntli entschliesst sech Heinz, die nötegi Operation i der Schwiz lah z mache. Das bringt e Reihe vo Änderige vo all üsne Plän.

Da mis Spanisch ame chlyne Ort isch u sicher nid längt für allei ungerwägs z sii, wirde n ig d Reis o abbräche u i d Schwiz zrüggcho.
Wenn, isch no offe u chunnt uf d Versicherig vom Heinz a. I wett öppe zur glyche Zyt zrüggcho wie är.

Heinz blibt bis am halbi drü i däm Zimmer. I gah de gah spaziere u isse Zmittag. Wo n i zrüggchume isch no immer glych wyt. Am drü gah n i gah frage, was itz göng. D Ärzti seit, der medizinisch B’richt sig g’macht, itz wart si uf ne Stämpel vo der Administration u – de o no uf passendi Socke. Es göng no e Stund.

Es isch schliessli nah de füfe, wo mer us em Spital chöme u i ds Hotäl fahre.
So, itz bi n i trotzdäm müed. Tschüss bis morn.