Schlagwort-Archive: bolivia

Bolivia Tag 104


Donnerstag, 12 Juni 2025

Hinterlassen Sie eine Antwort

Diesel z finge isch e Kunscht.

Datum:      12.06.2025
Ufenthalt:  Oruro

 

Umgäbig:

blank

blank

blank

Erläbnis:

In Totora si mer rund 500 Meter töifer u bi üser Akunft isch es a g’nähm. D Nacht wird de aber je länger je chälter. So ab de viere isch de wieder alles schichalt.

Mer stöh so um die siebne uf, de wird zmörgelet. Nachär git es viel ufzrume, mer hei geschter gaaanz viel eifach i d Fahrerkabine g’schmisse.
De isch o no ds ganze G’schirr vo geschter Abe abzwäsche…
Es isch nah de zähne wo mer is vom Polizischt verabschiede und us em Dorf fahre.

Üses Ziel isch der Huacanapisee. Gar nid wyt vo Totora entfernt. U Huacanapi isch de o nid diräkt am See. Mer löh ds Kamel lah stah u wandere über gueti u schlächti Wägli, Pfade u z acherg’fahrnigem. Verbi a zwene Stiere u füf Lama. Abee sie g’rife nid a u spöie nid.
Der See isch bezoubernd, rächt suber u es het Wasservögel.
Schad het e Buur am Ufer fasch bis a ds Wasser zueche g’fahre u schad dass es gäng no Lüd git, wo der Ghüder löh lah lige.

Ds nächschte Ziel isch in Oruro. Mer fahre uf grössere u grosse Strasse dür chlyni Dörfli.
Dass Bolivie esTriebstoffproblem het, isch bekannt. Zytewys fählt Bänzin,de fählt Diesel.
Scho früech föh mer a z luege, öfter isch d Dieseltankstell gsperrt oder es heisst ‹ke Disel!›

Mer hoffe uf Oruro. Chum si mer ir Stadt, faht d Suechi a, aber ohni Erfolg.
So um die Siebne finge mer es passends Hotäl u checke dert i.

I hoffe, hüt wird ds Schlafe wärmer si.

 

Bolivia Tag 103


Mittwoch, 11 Juni 2025

Hinterlassen Sie eine Antwort

blank

Im Altiplano, toll!

Datum:      11.06.2025
Ufenthalt:  Totora

 

Umgäbig:

blank

blank

blank

blank

Erläbnis:

G’frore hei mer o die Nacht. Mer hei zwar e tolle Übernachtigsplatz i der Schuel in Sajama. Ideal plaziert, dass der Luft üs müglechscht nid erreicht (dä hört de aber im Louf vom Abe uf). Am Morge erreiche n is d Sunnestrahle o bezite, – aber derzwüsche wird es gruusig chalt. Heinze laht d Heizig zwar no meh a, we aber ds Material, ds Bett, ds Kamel abg’chaltet isch chunnt die Chelti schnäll wieder zrügg. Nu, mer si froh um die erschte Sunnestrahle.

I dere Schuüel hie göh rund 70 Ching i Unterricht. U vo der Grundschuel bis zu de Sekeler si alli verträte. Alli, o d Lehrer, si usgesproche höflech u nätt. Es grüesse alli u probiere eim z hälfe. – Me stell sech vor, zwe alti, bolivianeschi Manne chieme mit me Outo ir Schuelalag vo me schwizerische Dorf cho cämpe …

Öppe um die zähne fahre mer ab u mit üsere Vulkanumrundig wyter. Scho churz nachhär mache mer e Usflug i d Botanik:

Eine Besonderheit sind die Queñua-Krüppelbäume (Polylepis tarapacana) an den Bergflanken, die bis in rund 5000 m Höhe wachsen. Die Einwohner des Sajama-Nationalparks sind stolz auf diese am höchsten wachsende Baumart der Welt. Meist wird der Baum als weltweit einziger über 5000 m Meereshöhe wachsender Baum bezeichnet.

Dür n es chlyses Strässli fahre mer bis i d Boumzone ueche vom Vulkan Sajama. Mittelhöchi Böim, mit zeichnete Stämm widerstöh hie däm Klima. Iidrücklech!

Uf der Wyterfahrt wette mer no i heisse Quelle gah bade. Will mer aber no dür ne Flusslouf sötte loufe u Heinze das no nid cha, verzichte mer.

Üsi Vulkanumrundig geit wyter dür ne wunderbari Natur. Es het hie zwar überall Lama-Bure, aber es si nid si, wo d Landschaft g’stalte.

I hoffe, dass das so blibt. Mer fahre dür riiesegi Äbene, g’seh wyteri, tolli Vulkane u begägne bezoubernde Wasserlöif. Äbe, ds Altiplano!

In Tomarpi, ere chlyne Siedlig, b’sueche mer e Chilche us em siebzähte Jahrhundert. Sehr interressant.

Wieder uf der grosse Strass chrüze mer e «Zona aerchologica». Natürli zieht es üs häre u gah fötele.

Nachhär müesse mer gah ne Schlafplatz sueche u ne Tankstell, wo Diesel hätt.

Der Schlafplatz finge mer in Totora, ere Chlynstadt. Der Polizischt laht üs vor em Polizeiposchte lah cämpe. Ichere chöi mer nümm, drum git es Hörndli mit Sosse u Chäs.

Guet Nacht.

 

Bolivia Tag 102


Dienstag, 10 Juni 2025

Hinterlassen Sie eine Antwort

blank

Nach ere souchalte Nacht.

Datum:   10.6 .2025
Ufenthalt:  Sajama

 

Umgäbig:

 

blank

blank

blank

Erläbnis:

Läck isch das chalt g’si letscht Nacht. Mer si verusse g’hocket u es isch rächt a g’nähm g’si. Heinze het Geburi u mer hei das uf absolut niedriger Flamme g’fiiret.

Wo d Sunne de unger isch hei mer is i ds Kamel verzoge. Das isch o no so g’ange. Irgendeinisch het mi d Natur use g’rüeft u n i ha soumässig g’frore. B’sungersch d Füess hei das gar nid luschtig g’funge, die töife Tämparature.

Vo denn a ha n i chalt Füess g’ha, – bis am Morge. Es het nüt g’hulfe. Ufg’stange si mer spät hüt. Ersch wo d Sunne wieder g’wärmt het isch es g’si zum Zmörgele. I der Kafimaschine isch Iisch u ds Wasser für Tee z mache isch e Chlumpe i der Fläsche. 🥶

Mer si hie zmitts im Winter. Wenn in Europa der Herbscht chunnt, wärde d Nächt hie wieder a g’nähmer.

Übernachtet hei mer im Altiplano. Aber eigetli zellt o scho La Paz derzue u mer fahre der ganz Tag dür das eimalige Hochtal.

Scho verruckt, we me sech vorstellt, dass hie alle Räge zu de töifschte Löcher fliesst u dert versickeret oder verdunschtet. Zrügg blibt viel Salz im Bode. Erstunlech, dass d Bure hie e Exischtänz hei.

Flüss füehre kener ache gäge ds Meer zu. Es het zwar g’waltegi Wasserlöif, aber die blibe im Hochland. Im Ougeblick isch es sehr troche, wie gäng im Winter. Schneie tuet es nume uf de höchsche Gipfle. Dass es wyter unger schneit isch ganz sälte.

Üses Ziel hüt isch der Bärg «Sajama» ( usg’sproche Sachama), rund um dä isch Nationalparkgebie u mer wei ne umrunde.

Es git o es Örtli mit em Name Sajama. Mer decke üs da mit em Nötigschte i, ässe i re iheimische Beiz u richte üs de näb em Sportplatz zum Übernachte i.

Der Luft, wo der Tag dür g’gange isch, leit sech. Na de Sächse dämmeret’s un em sibni isch fischter.

Heinze laht im Kamel d Heizig a.

Sorry, das cheibe Internet.

Bolivia Tag 101


Montag, 9 Juni 2025

Hinterlassen Sie eine Antwort

blank

Zrügg in Bolivie, wäg vo La Paz.

Datum:      09.06.2025
Ufenthalt: Damtiago de Callapa,

 

Umgäbig:

blank

blank

blank

blank

Erläbnis:

Es isch der zweit Tag für mi, wieder in Bolivia. Die letscht Nacht si mer no im Hotel Belmont g’sy, wo Heinze si n er Flugversüech g’macht het. Hüt Morge isch ds Zmorgebüffet nid so wahnsinnig g’sy, aber d Pizza vo geschter het no ungerleit. Nachhär hei mer eigetli wölle flüchte vo däm «Unglücksort».

Heinze het aber no es Projekt. Är macht i jedem Land es Interview mit re Uslandschwizere oder me Uslandschwizer.

Drum fahre mer in La Paz no zum Ernesto, wo hie mit ere Outogarage u no angerne Projekt sis bishärige Läbe verbracht het.

Er Mönsch mit ere grosse Läbeserfahrig u re riiche Biografie.

So um e Mittag mache mer is de uf e Wäg i Richtig Patacamaya. Es geit sehr lang bis die Vororte vo La Paz hinger is hei. E unschöni Architektur, wo d Strass söimt. Es het viel Industrie, massehaft ag’fangni B’husige u ne schnuergrsdi Strass.

Die Hochäbeni, wo mer druff lande isch landschaftlech bemerkenswärt. Es het Landwirtschaft, wo hie betribe wird, Viehzucht, aber o Pflanzebou. D Höfli würke aber chley einsam i dere Wyty.

In Patacamaya ässe mer. Fleischlos isch e Wunschtroum, sber me cha die Stückli ja o useläse, de geit es zur Not.

Der wyter Wäg füehrt is i Richtig Curahuara. Aber scho im Louf vom Nami luege mer nach re Übernachtigsmüglechkeit. Ir Nechi vo Damtiago de Callapa, uf freiem Fäld schlöh mer üses Nachtlager uf. E idyllische Ort für z cämpe.

Guet Nacht.

Eh es isch der 9.6. Heinze het hüt Geburi.

.