E wytere Tag ohni Internet u Telefon

Datum:      18.06.2025
Ufenthalt: Vils Kkota

 

Umgäbig:

Erläbnis:

We me sech im bolivianische Altiplano umetribt, het me es schlächts Gwüsse, weil unerreichbar (nix Internet, nix telefon) u de isch die Wält hie änedrann so unwahrschynlech angersch, schön, faszinierend, packend, dass es sech bi wytem lohnt, wäg z sy.

Mer stöh em halbi achti uf. Zmörgele isch hüt toll, mer hei e grosse Vorrat a Frässalie. I ha Schnitteli, Heinz Späck u Ei.😋

Übernachtet hei mer näb heisse Quelle. Es isch kes ‹Bad Zurzach›, aber es längt, für im warme Wasser z plantsche. Das mache mer de o usgiebig.

Ersch öppe um die elfe fahre mer in Rosario wäg

Vo da geit es zersch afe nach Porco. Scho die Strecki isch gebirgig. De si mer wieder uf re Houptstrass u fahre i Richtig Uyuni. Bal si mer i Schluchte, de fahre mer über Päss, oder si i nöie Hochtäler.

We n es de luftet un es luftet fasch gäng, isch’s schwierig, ung’müetlech u o chalt.

Mer fahre dür Täler, mit ung’wohnt eigetümleche Formatione, uffälliger Vegetation u begägne immer wieder südameriksnische Kameli. Möntsche g’seht me nid viel. Vieli Hüser u Siedlige entlang der Strass si läär u verg’heie. Mer vermuete, dss sech d Lüt irgendeinisch i grössere Dörfer zämeg’schlosse hei. Chaquilla isch so es Dorf, em Rand vo re riesige Äbeni. Ir Rägezyt het es hie e See. Itz si unzählegi, grossi Lamaherde hie wo grase.

Allerdings het es o zunähmend viel Sand. Der Luft blast Düne zäme. Es isch fasch e Wüeschti.

In Visigza ässe mer es spät’s Zmittag. Nach unändlechem Fötele föh mer a e Übernachtigsplatz sueche. Nach e paar Fählversueche lande mer in Vils Kkota, wieder näb warme Quelle.

 

Zwe Tag im Nirgendwo in Bolivie! Äxcüsi, aber ds Internet funktioniert nid überall.

Datum:      17.06.2025
Ufenthalt:  Rosario

Umgäbig:

Erläbnis:

Nach däm churze Zwüschehalt in Sucre göh mer hüt wyter. Um due nüne hei mer alles zämepackt. Es wird de glych zähni bis mer fahre.

Nächschti Station isch des SAS Supermärit.Mer müesse wieder einisch Läbermittel choufe.

Vo dert geig es uf Diesel-Entdeckigstour.
Die isch de nid sehr erfolgriich. Bi der erschte Tankstell git es kene, bi der zwöite o nid. Nu, no geit es.

Mer fahre wyter. Um e Mittag ässe mer in Viña Pampa i me Reschturant Zmittag.Es isch wie geng, Fleisch g’hört zu re Mahlzyt hie! D Wirtin het de aber es I seh. Si ersetzt ds Fleisch dür Eier.

So, es geit wieder der Bärg düruf. U obe, obe isch e nöii grossi Äbeni – äbe ds Altiplano.
In Betanzos, eme ziemli grosse Ort, finge mer usgäns e Tankstell wo n is Diesel verchouft (für Tourischte fasch vier Bolivianos meh als üblech, trotzdäm si die Chauffeure alles angere als erfröit, we mir vorne i d Schlange schlüfe).
Blöd isch, dass der Tank wieder a faht rünne. Das macht Sorge.

Potosi isch e grossi Stadt. Wär hie läbt, het ziemli sicher mit Bärgbou z tüe. Die gsnzi Gägend hie isch voll Mine. Verschiedenschti Metall u Mineralie wärde hie abboue. Entsprächend g’seht es in Pogosi o us. Alles isch stoubig u dräckig, d Strasse si verstopft mit Laschtwäge

Mir flüchte.u finge de in Rosalio e Stsndplatz. Ds Znacht wird eifach u nachhär geit es i ds Huli. Internet het es nid.

 

• Location: 19° 33′ 4.01″ S 65° 15′ 26.9″ W

• Location: 19° 2′ 35.15″ S 65° 15′ 18.21″ W

---

Es isch vollbracht !!!

Datum:      16.06.2025
Ufenthalt:  Sucre

 

Umgäbig:

Erläbnis:

Scho lang hei mer is g’ergeret, dass me die hingeri Tür nümm rächt het chönne uftue. Ds Türschloss, d Angle, das het funktioniert. Aber Heinze het no e Diebstahlsicherig mit me Rigel u Vorhängeschloss (Hasbe).

D Zyt u unvorsichtegi Lüt hei derzue g’füehrt, dass es geng wie müehsamer worde isch, die rükwärtegi Pforte ufztue.

Also, was tüe mer?  D Niete vo dere Haspe ufbohre u se wägnäh. Heinze het scho e Nöii parat. De g’seh mer aber, dass da drunger, ds Hinterteil vom Kamel rächt idrückt isch. Also, Holz, Pastik oder Hartgummi ungerlege??

Irgendeinisch müesse mer sowieso gah ässe. Vorhär göh mer aber no zu me «Gummilade» gah luege, öb si es Stückli für üs hätte. In erschter Linie verchoufe si Pnöö u das isch es nid, was mer bruche. Aber si hei de doch Stücki wo gienge, – für 10 Bolivianos (1 sFr). Guet, itz isch aber e Pizza nache ( der Eifachheit halber u will si guet isch).

Mer fahre mit em Taxi zur «Plaza 25 de Mayo», wie der zäntral Platz richtig heisst.
Nach em Ässe git es no e Glace u de loufe mer zrügg zur Unterkunft.

Uf me Bank im Park ligt e Bitz vo me Lädergurt. Super, dä Gurt het genau d Breiti, wo mer bruche. A Läder als Material hei mer gar nid dänkt. Mer göh zrügg zum Kamel u boue es Bitzli bolivianische Lädergurt unger die Haspe i.

No chley Entroschter, chley fiele, chley putze u das Kamelhingerteil isch fasch wie nöi.

Ufruume, Znacht u Büro … de chunnt scho wieder d Nacht. Morn geit es wyter i Richtig Potosi!

• Location: 19° 2′ 35.11″ S 65° 15′ 18.3299″ W

• Location: 19° 2′ 49.15″ S 65° 15′ 34.68″ W

---

Fuulheit u Fliss a eim Tag

Datum:      15.06.2025
Ufenthalt:  Sucre

 

Umgäbig:

Erläbnis:

Mer si in Sucre. Es isch wäsentlech wärmer, als höcher obe. D Vercheltig leiht sech e Bitz.

Üse Campingplatz isch e Sächser. D Frou Profässer, d Carolina, wo re der Garte g’hört wo mer druff stöh, isch Ärztin. Ihre Ma isch gägewärtig in Norwege.
Mer si allei i me Garte under schöne Böim, jede het e eigeti Dusche u n es eiget’s WC. Derzue hei mer e Art Ufenthaltsrum wo mer chöi em Compi schaffe.

So um die siebne stöh mer uf, de chunnt d Morgeroutine – u de schaffet jede a Sache, wo sötte si.
Zum späte Zmittag göh mer wieder i d Stadt übere.
Sucre isch o hüt e läbegi Stadt. Uf em zäntrale Platz het es wieder rächt viel Lüt u n es wird Musig g’macht. Schön!

Es isch Sunnti!

Wieder im Camping, vergeit der Nami im Flug, Heinze tuet Bilder u Byträg uf ‹redcamel› u ig grüble am Compi ume.

Am Abe wird es chüehl, aber es geit. Ab de zähne pfuset alles. Weni passiert.

• Location: 19° 2′ 49.15″ S 65° 15′ 34.68″ W