Datum:      22.06.2025
Ufenthalt:  Canyon ???

 

Umgäbig:

Erläbnis:

Mer si geschter zum Laguna Turquin g’fahre zum Übernachte.

I ha scho mänge Luft erläbt, aber dä, wo üs letscht Nacht um d Ohre, respektive um ds Kamel pfiffe het, isch scho b’sungersch g’sy. Zytewys het das mi Empore g’hudlet, i ha g’meint es trag mi furt. Chalt isch o worde, Heinze het drü Mal g’heizt.

Itz isch Morge u mer schlötterle em Sunneufgsng etgäge.
Ds Zmorge geit de vei guet. D Sunne wärmt u mer stöh im Windschschatte. De cha me der Kafi u d Schnitteli g’niesse. Ds Abwäsche git aber so chalti Finger, dass si fasch abg’heie.

Mer fahre de zitig ab. Üsi hütegi Tour geit de Seene entlang. D Flamingos da drin hei nume chlyni Löcher im Isch für z frässe. Über Nacht friere si teilwys i u chöi ersch abflügr wen es touet. Der Aflug u d Landig wärde zu unfteiwillige Turnüebige.
Laguna Cñapa, Smelly Lake, Laguna Honda u d Laguna Ramaditas si uf üse Route, derzue no paar chlyneri Seeli.

Mer si i re Wüeschti u g’seh grandiosi, majestätischi Vulkane.
Scho gly het hüt der Luft wieder ufdrähit. Mer choche Zmittag im Windschatte vom Kamel u o hie isch ds Abwäsche e Tortour.

Derfür si all die Bärge, wo die meischte Vulkane si, e Meischterleischtig vo der Natur. All die Farbe u Forme g’falle mer sehr. Irgendeinisch müesse mer de aber brämse mit fötele.

Zum Übernachte fachte mer i ne Art Canyon . Hinger Steine sueche mer Windschatte. Es isch chalt!
04.30h Duss isch sicher minus 15 Grad, dinn o unger Null. Heinze heizt unzählegi Mal. Ds Wasser i mire Fläsche het Antarktis!.

 

• Location: 21° 46′ 28.3404″ S 68° 0′ 31.6979″ W

Datum:      21.06.2025
Ufenthalt: Laguna Turquin

 

Umgäbig:

Erläbnis:

D Nacht im Hotäl isch no einisch bequem u warm im Bett. Mer warte wieder, bis d Sunne chunnt. De wird o ds Zimmer warm, we me d Tür zum Gang uftuet. Mer göh de wieder im Kamel gah Zmorge mache u ässe.

Üses Zimmer isch im zwöite Stock. Es git veiechli mänge Gang bis zum Kamel ache, bis wieder alles Gepäck dunger isch.
D Wösch, wo mer g’gäh hei, sött o no cho.
Na de zähne verlöh mer ds Cesare u kurve dür Uyuni. Erschte Punkt: mer bruche Disel. Mer hei Glück, bi der erschte Tankstell berchöme mer. Vo dert fahre mer zu me Supermercado. Es hei sech e paar Sache zum Ichoufe a g’sammlet. Ja u de isch es wie gäng, me chouft no dieses u äis.😜
Mer hei geschter beschlosse, no einisch bi de Isebahne z fötele u das mache mer. Es het fasch kener Lüt.

So, u itz isch Uyuni G؟schicht. Mer fahre ungefähr südlech us der Stadt. Hie chunnt mer i Sinn no z warne wäg em Internet. Irgendwie ahne n i, dass mer kes me wärde ha.
Mer fahre dür wüeschteähnlechs Gebiet, i däm erschte Teil isch ds Land flach u mer fahre näb em Salzsee.

Ir Zwüschezyt isch Mittag nache. Die chlyne Örtli wo mer dürquere hei aber kes Reschturant.
D Ortsnäme chöme eim bekannt vor: Julaca, Vila Vila, San Cristobal , Rio Grande usw.
In San Cristobal ässe mer. Es git wieder e G’müessuppe u nachhär Riis mit Ei u Salat.

Sid längerer Zyt si mer itz uf der Höchi vo rund 4000 Meter über Meer. Das isch so i der Höchi zwüsche Hörnlihütte u Matterhorn. I ha d Höchi öppe bim Erwache als Chopfdruck wahr g’no. Aber süsch si mer trotz Höchi guet zwäg.

D Umgäbig isch hügeliger worde. Alota, e grössere Ort umfahre mer. Uf der Strass, wo guet usb’boue isch, fahre mer dür ds «Valle de las rocas». E total frömdi, idrücklech angeri Wält hie, schön, wild, faszinierend u frömd.
Wie das Valle entstande isch, da drüber chöi mer nume spekuliere.

E Schlafplatz muess häre! Nach diverse Strasse u Börtliquerige lande mer a me chlyne Seeli. A der Laguna Turquin geit der Luft wie wild, aber der Heinz fingt es Plätzli hinger me Felse.

 

• Location: 21° 23′ 46.1399″ S 67° 43′ 45.1955″ W

Vo Isebahne, Kaktus u Salz

Datum:      20.06.2025
Ufenthalt:  Uyuni

 

Umgäbig:

Erläbnis:

Der hütig Tag isch ziemli frömdbestimmt. Mer hei geschter e Tour uf e Salzsee buechet. Das heisst, uf d Zyt parat si, d Programmg’staltig abgäh u mit frömde Lüt z schlag cho. In Uyuni git es unzählegi Abieter vo Toure, will die wenigschte Tourischte mt ihrem Outo uf ds Salz use wei.

Nu, d Tagesroutine faht im Hotäl mit der Sunne a. Das isch öppis nah de achte.
Das Hotäl Cesare isch eigetli im Momänt gar nid offe. Der B»sitzer renoviert mit me Ag’stellte Zimmer für Zimmer. Üs het er auä nume us Mitleid oder so ufg’no. Drum git es hie ke Verpflegig.
Aber mer chöi ja im Kamel zmörgele u das mache mer.

Viertel nach zähni wärde mer abg’holt u zum Tourbüro bracht. De chöme d Formalitäte. Bal chunnt der Guide mit em Räschte vo üser Gruppe. E Chines, e Dütsche, e Bolivianer u ne Argentinier, i bi positiv überrascht, das git e gueti Gruppe mit üs zwe schwizer Seniore zäme.

Zersch geit es zum Isebahnfriedhof vo Uyuni. Lüt, Lüt, Lüt!

Natürli hei alli ds Rächt, so Sache wie die Isebahne z luege u o z fötele. D Show wo da aber g’macht wird, stosst mi ehnder ab u isch nid miis. D Überräschte vo dene Züg (es isch sehr viel kaputt) si be idruckend.

Vo da geit es i Etappe uf e See use. Ziel isch d Insle Incahuasi. Das isch der nächscht Tourischte Hotspot.
Masse vo Lüt kraxle uf däm Felse im Salz ume.
Ds Spezielle si die tusige vo Kaktee, wo uf däm karge Ungergrund wachse. Das g’fallt mer u beiidruckt mi.

Der Abschluss vo dere Tour wird der Sunneungergang. Wieder fasch in Uyuni, fahrt der Guide (u mit ihm vieli angeri) mit üs i ne Berich, wo überfluetet isch. Dert warte all die Gruppe Tourischte mit meh oder weniger Getöse und Show der Sunneungergang ab.

Am siebni si mer de wieder zrügg.

Nu, d Tour isch nid schlächt g’sy, d Gruppe viel besser als erwartet, d Natur, wie immer, überragend, grandios.

 

Nach em Camping wieder i ds Hotäl mit Internet

Datum:      19.06.2025
Ufenthalt:  Uyuni

Umgäbig:

Erläbnis:

Es bruch lang, bis d Morgeroutine cha afah. D Sunne stigt ersch spät über e Bärgkamm. Bis denn isch d Chelti bissig.

Die Badeanlag, die warmi Quelle besteit us eme Hof mit drüne Becki u Umchleidekabine u me «Itrittshüsli». Hinger däm hei mer ds Kamel parkiert. Dert tüe mer o zmörgele.

Nach em Abwäsche, packe u plane, müesse mer zersch no es wyters Gebäud erkunde
Das g’seht vo wytem wie ne Burg us. Mer loufe die paar hundert Meter. Bim Nächercho g’seh mer de, dass es e Friedhof isch. Nach chley umefötele göh mer zrügg zum Bad. Es isch geng no ke Mönsch ume. Obschon e heisst, vom Morge am achti bis am Nami am vieri.

Ja u de läse mer das Schild ds erschte Mal fertig u g’seh, dass das nume am Wucheändi gilt.

Drum isch ke Mönsch hie.

Mer fahre los, Ziel isch geng no Uyuni.
Ungerwägs fahre mer bi der Mina Pulacayo verby. Enere Silber-, Kupfer- und Zinnmine Es wird o Wärbig für ne B’suech g’macht. Üs düecht, das würd sech lohne. Es isch aber de nume bedingt eso. Es het e Usstellig, vo de alte Gruebezüg. Die si aber nume unger freiem Himmel uf Stumpeg’leis abg’stellt u roschte vor sech häre. Teili, wo me no het chönne bruche, si usbboue. Vo re räschtleche Usstellig g’seht me nüt. Anschynend wird si nume am Wuchenändi zeigt.

Mer fahre wyter u si de bal ds Uyuni. Mer fahre über e Art Pass u de zeigt sech die Stadt i der Äbeni. Der Ablick isch grossartig!

Mer suche e Ungerkunft u finge se i Cesare’s Hotäl.

 

• Location: 20° 27′ 17.4″ S 66° 48′ 54.83″ W