Datum:      26.06.2025
Ufenthalt:  Refugio Laguna Blanca (El Alto)

 

Umgäbig:

Erläbnis:

Der hütig Tag isch eigetli schnäll verzellt.Mer hei Ouo usg’grabe u si nid vorwärts cho.

Geschter si mer i ds Refugio cho, churz vor em Gränzübertritt nach Chile un es het ta wie ne Sou. Mer hei ds Camel näb em Igang zu de angere Chärre g’stellt u si ine. G’schlafe hei mer rächt guet.
Wo mer hüt Morge use chöme si da rund um d Outo grossi Wächtene..

Mir si übrigens nid die einzige Schwizer hie. D Bettina u der Pascal si mit ihrem GMC o hie g’strandet. Gmeinsam loche mer die Chäre us em Schnee. Das duret de g»rad vom Vormittag bis am Nami em zwöi. Chalt, nass- nass chalt!

Vorhär gäb’s no es Zmorge: leider wird die boliivianeschi Billigversion uftischet. Heiss Wasser Teebüteli u Instantkafi u derzue e Art Kräcker.  – Aber es gäb ja hüt no Znacht.

Zwüschedüre hei mer Kontalt mit em bolivianische Zoll,  wo seit, dass o hüt nüt isch mit abefahre.

Also, es trochnigs, warms Plätzli sueche u dürehalte bis morn Morge. I wähle em Nami em halbi vieri ds Bett. E nöie Schneesturm isch ufzoge. Was wott me süsch, warte.

 

• Location: 22° 49′ 52.41″ S 67° 46′ 43.93″ W

 

Datum:      25.06.2025
Ufenthalt:  Refugio El Alto

 

Umgäbig:

Erläbnis:

Nach ere rächt guete Nacht, es isch gar nid so chalt worde, erwache mer mit eme bedeckte Himmu. Es zieht wieder. Zum Zmorge dörfwe mer i ne Art Spiissaal. Zmorge für üs het es nümm, aber das macht nüt, mir muesse sowieso d Läbermittel bis zur chilenische Gränze brucht ha. Auso git es Müesli mit Joghurt u Kafi derzue.

Mer fahre no einisch rückwärts uf der Route. Öppe zwänzg Kilometer vor üsem Standort sig es Geisirfäld wo me Geisire in Aktion chönn g’seh. Es geit nid so wyt, drum fahre mer häre. Mer si froh, chöi mer i ds Outo stige, da drinn isch wäsentlech wermer.
Das Geisirfäld hei mer bim erschte Dürefare o scho g’seh. Leider hei mer denn z früech ufg’gäh.
Geisire stige kener. O nid nach drüviertel Stung. D Löcher, wo die Vulkanhitz usechunnt, itz nume i Form vo Dampf, si aber o sehr interressant, farbig u i de skurilschte Forme.

So, u itz faht es a schneie. Zersch isch das no fasch schön:Graupel, Näbel, Dampf. Mer mach üs uf e Rückwäg zum letschte Übernachtigsort. Ds Schneie u Lufte wird gäng wie schlimmer. Zytewys g’seht me d Fahrspur ganz schlächt. Wieder bim See unger schneit es zwar no, aber es schint de doch e Bitz besser.

Mer entschliesse üs, no i Desierto Salvador Dali z fahre. Es sig e Ort voll schöner Farbe u Gesteinsforme.
Mer finge der Wäg dert häre – u o wieder uf d Houptstrass zrügg, aber: Der Schneesturm nimmt zue, vo Farbe g’seh mer gar nüt, d Forme ahne mer im Schnee. Mer mache paar Fotos u chehre de um.

Der wyter Wäg isch e Tortur, wo mir zwe no nie erläbt hei.

Schneesturm vom Strübschte. A g’strängt stiere mir zwe dür d Frontschibe. Währed em Fahre g’seh mer mängisch eifach nume no wyss. Der Luft tribt der Schnee i Stübete über ds Land. Am Strasserand git es Wälme un es wird schwierig sech z orientiere. Mer fahre oder düssele, chrütze mehreri Outo u chöme de Irgendeinisch im Refugio el Alto a. Ds Doppuzimmer a 50$ u es Znacht i Ussicht. Ds Uslade vom Nötigschte isch e Tortour. Chalt-chalt-chalt u nass.?

Im Refugio isch es de eifach nume no chalt. Ds Ässe isch guet. Der Luft pfift dür ds Hus u tribt Schnee iche.
Eifach nume no i ds Bett!!

 

• Location: 22° 49′ 52.536″ S 67° 46′ 43.5144″ W

 

Datum:      24.06.2025
Ufenthalt: Chalviri

 

Umgäbig:

Erläbnis:

D Nacht im Hostal isch wenigschtens warm g’sy, ömu unger der Dechi. Dass mer d Chuchi dörfe bruche isch o guet.
Mer fahre vor de Zähne ab u de chunnt; – Wüeschti.

Ungerwägs g’seh mer Fontäne. Heinz isch de Meinig, das sig e Geisir. I bi mer da nid so sicher u g’seh ehnder Rouch. Nu, mer fahre uf dä Bärgrügge ueche.
Dert acho, isch es e Geisir. Dä wird irgendwie industriell usb’bütet. E grosse Zuun geit ringsetum, dinn stöh e Anzahl eigenartegi Geböide. Bewacht wird die Alag vom Militär.

O uf em wytere Wäg finge mer ke Geisir meh. Nu de, ds nächschte Ziel isch es ‹Agua Termales›. Das isch wieder mal e a g’nähmi Abwächslig. Es Becki voll schön warmem Wasser.
Besser als d Dousche hüt am Morge. Das isch de e Leger g’sy! Zwe Häne, eine chalt eine warm, warm ufdrähie: chalt. Füf Minute warte, g’spüre: chley warm. Nu de, Chleider wäg u … i der Zwüschezyt tröpfelet’s nume no u de isch fertig, ke Wasser meh!

Im Warmwasserbecki träffe mer zwöi jungi Lüt us Lyon, die chöme us em Süde u chöi wichtegi Tipps u Infos wytergäh. Heinze isch ganz lang im Wasser. Mi tüecht irggendeinisch e tüeis. Im Outo cha n i no B’richte schribe.

Der pazifisch Fürring isch e Begriff. Uf dere ganze ‹Linie› si Vulkane, wo aktiv si. Bolivie isch zum Teil o da drin i g’schlosse. Mer si i me vulkanisch aktive Gebiet hie.

Zum Übernachte fahre mer de i ds nächsche Dörfli. Chalviri heisst das. Näb me Hus dörfe mer ds Kamel ufstelle. Chley windg’schützt, dass es mi nid furtluftet.

Es git äuä e chalti Nacht!

 

• Location: 22° 32′ 9.4667″ S 67° 38′ 58.5816″ W

 

Datum:      23.06.2025
Ufenthalt: Huayajaraim

 

Umgäbig:

Erläbnis:

Die hütig Nacht isch, wie scho g’seit, e ziemlegi Prüefig für wärmeverwöhnti alti Manne.
Aber nid nume, o ds Kamel het chalt, ds g’ladne Wasser g’frierti m Tank. Heinz macht e Notoperation. Ds Zmorge isch uf der Sunnsite, de geit es.

Chlyneri Tier g’seht me sälte hie in Bolivie. Während em Irume g’seh n ig es öppe chüngugrosses Tier, zwe Felse wyter. Die Einheimischen säge Viscatcha derzue. Viscatchas si mit Chinchillas verwandt. I opfere üser letschte zwöi Rüebli, (ohni z wüsse, öb si die ässe), lege se uf e Felse u säge tschou. Nach u nach hei mer alles wieder a sim Platz. I der Zwüschezyt isch fasch elfi.

Mer mache n is wieder uf e Wäg. Ir Zwüschezyt isch ziemli alles wieder uftouet. Die Nachttämperature uf dere Höchi si scho chley e Prüefig. I muess zuegäh, dass is so nid erwartet ha. Der ganz hütig Tag isch wieder vo Wüeschti prägt. (Disierto de Siloil) E wahnsinnig interressanti, teilwys eitönegi u steinegi Umgäbig.

Nid lang u mer träffe d Bettina u der Pascal (Schwizer finge sech). Si si mit eme GMC ungerwägs u hei o näb ere Felswand übernachtet. Hie isch anschynen e Träffpunkt für Tourefahrer. Die hei schyns die hie läbende Viscatchas ag’fueteret, drum si die fasch handzahm. Mer chöi wunderbari Föteli mache.

D Wyterfahrt dür d Desierto isch prägt dür d Rennstreckine vo de Tourefahrer. Es git zwar ei Houpt»wäg», aber dä isch voll Querrille, was zu me furchbare Geholper füehrt.
Erklärbar, dass näbe der Houptpischte no unzählegi wyteri Fahrspure si.

Irgendeinisch, nach zahlriche, schöne Vulkane, zeigt sech de e See. Das isch d Laguna Corda. Hie fahtfaht ds Eduardo Avaroa Andean Fauno National Reseve a. Zersch falle üs die viele Flamingos uf, wo hie im Wasser sy. Ds Naturreservat chunnt i de nächschte Tage.

E Ungerkunft finge mer i me chlyne Dörfli, in Huayajaraim Hostal San Bernardo. Zur Feier des Tages mache mer es Fondue!
Mer si hie wyt wäg vom G’wohnte. Heizig het es im Zimmer nid, Strom git es zytlech beschränlt, ds Intermet choschtet separat u isch quälend langsam. I cha miner B’richtli nid uf e Server tue, sorry.

Es isch äbe änedrann.

 

• Location: 22° 10′ 13.24″ S 67° 48′ 17.36″ W