Datum:      30.06.2025
Ufenthalt:  San Pedro, Chile

 

Umgäbig:

Erläbnis:

Mäntig Morge, fasch e Wuche si mer blockiert. D Bolivianer meine d Chilene heige zue tah, so im Sinn vo, mir si de nid tschuld.

Vom Refugio bis zur Passkontrolle hei mer g’schafft. Ds Übernachte da isch für mi müehsam g’si. I ha schlächt g’schlafe. Zum Zmorge git es e n Art Überläbensbrei u Tee vo geschter. Viel Uswahl isch nümm i der Läbesmittelchischte.

Es isch öppe nüni, wo n ig afah, mit der Toiletteschufle e Wäg für d Outo z schufle. Bim ordentleche Gränzübergang geit das nid. Wyter der Bärg düruf liegt aber weniger Schnee. Mit vereinte Chräft u zwene Schufle g’lingt es üs, bis am eis e Wäg z schufle bis uf d Strass nach Chile. Vo Bolivie berchöme mer ke Hilf. «Me heig ke Disel meh für d Schneeruummaschine». Was söll’s!

Heinz het Schneechöttine druf u schnützt dür üse Wäg. O Pascal u Bettina chöme mit eim Absetzer düre.

Nu, ir Passkontrolle berchöme mer der Stämpu vo me erstunte Zöllner. De fahre mer los i Richtig Chile. Heinz fahrt geng no mit Chöttine. Irgendeinisch chöme mer bim chilenische Gränzposchte a. Die hei würkli eigetli zue u stune dass mer chöme. Der Chef vom Poschte organisiert de aber, dass mer abg’fertiget wärde. Tolli Büez mache die hie. D Strass bis San Pedro isch g’ruumt. Mer fahre g’müetlech vo 4600m bis 2500m. Für dä Usbruch us Bolivie z fiire fahre mer zu re Pizzeria u lö’s üs la guet gah.

Anschliessend trenne mer is, Bettina u Pascal fahre uf ne Camping. Nachhär wärde si ihrer eigete Route folge. Alles Guete!  Heinz u n ig lande i me Hostel für n is z erhole.

 

 

Datum:      29.06.2025
Ufenthalt:  Refugio Laguna Blanca (El Alto)

 

Umgäbig:

Erläbnis:

Es isch morge, chalt wie no nie. Ds Fänschter vo üser Bude isch total zueg’frore. So langsam wär Zyt, dass mer chönnte abfahre. Üsi Verpflegig geit langsam us. Was ächt dä Sunntig bringt?

Der B’richt vom Zoll isch nid rosig, d Chilene tüei d Strass nid uf. Rund um ds Refugio, um e Zoll u so het der Schnützemaa mit sire Schnütze der Schnee g’rumt. Wie mer später merke, längt de das. D Passkontrolle isch füf Kilometer wyter. Das wär üses nächschte Ziel. Mer mälde d Outo bim Zoll ab u fahre los.

Der Schnützemaa seit no, mer sölle nid dür d Houptspur fahre. Das mache mer u es geit sowyt guet. Tja, -bis es de i re Wächte a stellt. Die nächschti Zyt vergeit mit grabe, Sandbläch uslege, wieder grabe, stosse…

So öppe am vieri si mer de bi der bolivianische Passkontrolle. D Sandbläch hei mer mehrmals brucht., schufle hei mer x mal müesse, aber itz si mer da.

Nume, zu de Chilene chöi mer nume z Fuess. Zwüsche der Passkontrolle u der teerete, chilenische Strass türmt sech e Riesehufe Schnee. Vom bolivianische Schnützemaa hei mer nümm g’see oder g’hört.

Mir si also o hüt nid nach Chile cho. Bi der Passkontrolle chöi mer übernachte, da choche mer, ja – u warte der mornderig Tag ab. Bolivie wott is no nid lah gah.

Es isch mörserisch chalt u d Läbesmittel schwinde.

 

 

Datum:      28.06.2025
Ufenthalt:  Refugio Laguna Blanca (El Alto)

 

Erläbnis:

Ufstah am nüni, es isch ischig. Der Luft het die ganz Nacht mit em Dach trumelet. Die Iheimische lige zum Teil no im Bett. I der Chuchi isch niemer. Unbestimmbars Fleisch für hüt friert i re Schüssle Wasser. Guet chöi mer es Kafi mache.

Hüt isch der dritt Tag im Refugio el Alto. Für’s churz z mache: mer hocke o hüt fescht. Schnee het es nümm viel g’gäh, aber was da liegt wird vom Luft a alli mügleche Orte blase.Wenn d Strasse ufgöh, wott oder cha niemer säge.

Also, was macht me a me Ort, mit Refugio, Zollstation, Militärposte u Parkverwaltig ohni rächti Heizig u me Luft, wo eim duss fasch umluftet. Internet git es im Refugio nume, wenn es Strom für ds Starlink git. – u dä fählt. Im Zoll isch zwar es offnigs Wifi, aber das darf me nume verusse empfah u es funktioniert fasch nid. Ir Parkverwaltig het es o es Wifi, aber es darf niemer es Passwort usegäh. E verzwickti Sach.

I ha letscht Nacht feschtg’stellt, dass mi Inneschlafsack es Loch het. Mis Projekt hüt: Schlafsack flicke. Will der Heinz ds Kamel laht la loufe, isch das der wärmscht Ort für so n e Büetz. Also, Schlafsack u Nähizüüg packe u ab i s Outo. Dert schnurpfe n i dä Schranz zäme, eifach dass er nid no grösser wird.

Das geit nid ohni Komplikatione, aber am Schluss isch guet.
Itz lige n i im Bett zum das B’richtli schribe, da isch halbwägs warm. Usserhalb im Zimmer isch 2°C, verusse öppe zwöi minus u die Nacht söll minus zäh wärde.

Hinech isch Fondue a g’seit. I fröie mi.

 

 

Datum:      27.06.2025
Ufenthalt:  Refugio Laguna Blanca (El Alto)

 

Umgäbig:

 

Erläbnis:

Hüt isch der zweit Tag im Refugio el Alto. D Sunne schynt, aber der Luft geit starch, was am Hus waggelet, macht o Lärme. Mer nähme’s g’müetlech u göh’s ruehig a. D Hoffnig, hüt nach Chile übere z fahre isch gross. Mer zmörgele z viert u mache de d Outo zwäg. Mer rume ds Zimmer u wäre parat für d Abfahrt. Heinz seit:»Am Viertu vor elfi fahre mer ab»!

Itz isch halbi zwöi u mir warte. Ussert am Himu, wo aus wieder bedeckt isch, geit nüt. Der Zöllner het versproche, är mäldi, wenn d Strecki uf göng, – mer g’höre nüt!

Äs isch längwilig!

De chunnt der B’richt. Weder gäge Bolivie no Chile isch d Strass offe. Also, wieder icherume, i ds alte Zimmer.
Es isch vieri u mer müesse wieder d Zyt überbrücke.
Znacht ässe mer wieder mit Bettina u Pascal.

Hoffentlech wird’s morn besser.

• Location: 22° 49′ 52.536″ S 67° 46′ 43.518″ W