Datum:      7.07.2025
Ufenthalt: Pastos Chicos

 

Umgäbig:

Erläbnis:

Uszug us San Pedro: D Regenerationszyt isch verby mer starte hüt i Richtig Argentina.

Tagwach git es früech, düschele, packe, zmörgele u de si mer zytig parat. Am nüni fahre mer ab i Richtig chilenische Zoll. Wo dä isch wüsse mer gar nid so rächt. Es git in San Pedro es Gebäude, wo so ag’schribe isch, es chönnt aber o e Station uf em Pass gäh.

Mer fahre i Richtig Jama (Chama). Wahrschinlech isch der Zoll dert. Jama isch es Dörfli im Norde vo Argentinie.

Mit de Bärge het ds Kamel veiechli z kämpfe. Zytewys si mer fasch uf der Höchi vom Mont Blanc. Nachdäm mer der chilenisch-bolivianisch Gränzübergang erreicht hei, geit es de no lang dür grossi Hochäbene. D Strass da düre isch sehr guet usb’boue u teeret u mer chöme schnäll vorwärts. Daderby überquere mer o der Paso de Jama.

In Jama isch de würkli so. Der chilenisch u der argentinisch Gränzübergang liege uf argentinischem Bode im Dörfli Jama.

Der Gränzübertritt isch zwar mit vielne Fragezeiche verseh, vieles im Ablouf isch unklar, irgendwie geit es de aber doch total eifach. Nach ere Stämperete vo Schalterb’süech u Stämple chunnt no d Fahrzügkontrolle. Dä Zollbeamte wott hinger iche luege, – e Skunde u guet isch!

Itz si mer also in Argentinie.

Na me Kafi fahre mer wyter bis Susques. E tolli Strecki hei mer bis hie zrüg gleit, knapp 280km si’s vo San Pedro bis hie. O hie si mer no im Altiplano un es het unändlech grossi Äbene. I dene mönschelääre Täler falle d Mine b’sungersch uf. Industrieboute wo nid rächt i d Landschaft passe.

In Susques beschliesse mer, uf der N40 nach Pastos Chicos z fahre. Das wird e stoubegi u g’schüttleti Sach.

Näb em Polizeiposchte schlöh mer ds Lager uf, mache Znacht u ässe. Nam Abwäsche geit es gly i Schlafsack.