Datum:      23.07.2025
Ufenthalt:  Palmira

 

Umgäbig:

Erläbnis:

Bächerli, Tällerli, Löffeli putze, Gäbeli, Mässerli o.
Abwäsche steit hüt uf em Programm
Nach em Campe geit das eso.
Nach Wuche vo Ässe u mängisch abwäsche
Isch Zyt dass’s richtig passiert
Nid dass’s bim Ässe eim plötzli tuet gruuse
Wil ds B’steck bim Ässe no schmiert.
(Eduard der Verslischuster)

Die letschti Rundi vo der Reis het a g’fange. Der Valentin, wo Heinze ds Kamel cha i si re Schwizerpouse ungerstelle, het üs geschter Abe allei g’lah. Mer si itz Hüeter vo me sehr grosse Hus, mit no grösserem Garte. (Im Garte stöh übrigens e ganzi Reihe vo angerne Reisemobil, wo hie abg’stellt si.)

Hüt Morge, nam Brunche, hei mer a g’fange mit ufrume u putze im Kamel. Es isch erstunlech, was da i Schränk, Trucke u Truhe alles i g’lageret isch.
Mis Tagesprogramm isch g’gäh. Zum Zmittag probiere mer, im Ort öppis z ässe z finge. Resturant si hie rar, u we mer eis g’seh, isch das zue. Wahrschynlech müesste mer öppe am zähni afah sueche, oder de wieder am Nami am vieri. Denn si si de wieder offe.

Nu, mer finge öppis. Es isch de aber scho nah de drü, bis mer is wieder uf e Heiwäg mache. D Dischtanz wo mer da derfür müesse zrügglege, isch gross. Wieder i Valentins Hus hei mer scho fasch wieder Hunger.

Später göh mer no gah kömerle, o na de viere, mer bruche Wöschmittel.
I ha mis Tagesziel «Chuchiutensilie» putze erreicht.

• Location: 33° 3′ 15.4044″ S 68° 33′ 19.0907″ W

 

 

Datum:      22.07.2025
Ufenthalt:  Palmira

 

 

Erläbnis:

Es isch e graue Tag, wo üs hüt erwartet. Es isch total bedeckt u irgendwie wott üs der Winter in Argentinie zeige, dass er o no andersch chah. D Tämperature dusse si so um die zäh Grad. I bi i der Nacht froh, brönnt ds Gasöfeli im Zimmer. (Obwohl eim mit so eim o g’schmuech chah wärde.)

Heinze rochlet zwar no, aber es schynt ihm besser z gah. Nach em Zmorge heisst es packe. Mer zieh hüt us em Hotäl Edian us. Das brucht wieder e par Vorbreitige, bis mer us em Hof sy. Es geit de aber tifig. Wieder pumpe, Gepäck ilade, verabschiede, furt si mer. Nach eme B’suech i re Apothek mache mer is uf d Suechi nach Toyota Ersatzteile. Ds Kamel brucht e nöie Ölfilter. Da geit d Zyt ume.

Für ds Kamel i z lagere, brucht Heinze no es Stromkabel. Da mer ir Nechi vo me grosse Carrefour si, göh mer dert gah luege. Leider ohni grosse Erfolg. Ds richtige Kabel hei si nid.

Heinze kämpft geng no mit sire Ercheltig, er chah eim leid tue. Mer beschliesse, Zmittag z ässe u finge, nach Sueche, e Art vo Café, wo me o Pizza macht. Woby, es isch meh e Fertigpizza, wo üs da serviert wird. Nu, i der Not…

Nach anderthalb Stunde Fahrt si mer i me Vorort vo Mendoza. In Palmira wird ds Kamel uf si Wyterfahrt nach Patagonie und uf e Heinze warte.

Bevor das aber sowyt isch, müesse mer i de nächschte Tage no e rächti Putzaktion mache.

Für hüt git es zersch Rueh, de e Tee u de es Bett.

 

 

 

 

 

 

Datum:      21.07.2025
Ufenthalt:  Mendoza

 

Umgäbig:

Erläbnis:

Heinze probiert g’sung z wärde u ig der Tag z g’stalte.
Zmorge ässe mer zäme, – er isch gäng no nid hundert.

Der Tagesablouf isch hüt vo Zuefälligkeite prägt. Am Morge Wösch i d Lavanderia bringe, de zum Coiffeur u chley dür d Stadt schlürme.
Zmittag isse n i e Vegi-Lasagne bi der Anna gägenüber. Isch total fein, aber nid nume billig.

Uf e Namittag starte n i zu me Parkb’suech. Der Parque General San Martin schynt e tolle Ort z sy. Zersch steit aber der Wäg dert häre a. I ha die letschte Monet nid übermässig viel müesse loufe, drum gah n i z Fuess i dä Park.

Mir fallt uf, wie schadhaft vieli Sache si. D Fuesswäge si zwar vielfach plättlet, aber de het es Löcher drin, Absätz wo äuä nid sötte si, o d Hüser si schadhaft. Die argentineschi Wirtschaft erholi sech anschynend, in Mendoza isch das no nid überall acho.

D Stadt mit ihrne Aleeä g’fallt mer, der Verchehr konzentriert sech uf Houptachse, i de Sytestrasse het es weniger, aber geng no g’nue.
Im Park acho, stune n i ab der Grössi. Kes Wunder, isch ds Outo o da im Vordergrund als Fortbewegigsmittel.

E wichtige Teil vom Park si all die Stadie. Natürli het es mehreri Fuessballstadie, der Strass nah si mindeschtens es halb Dotze Tennisklüb. Im Park isch e künschtleche See, wo d Ruederer ihre Riesig Klub hei, i stuune.
Sport schynt in Mendoza e ganz grosse Stellewärt z ha. Vielli Fitnetssegge stöh, nid nume im Park, bereit u wärde o g’nutzt. Löifer i allne Altersgruppe si ungerwägs, aber es het o VelofahrerInne u Rollbrättler, – es aktivs Volk hie.

Im Park b’suechi zersch der Wältbrunne. Dä zeigt aber nid die nöischti Sicht uf die Wält 😠. Denn wett i dä See umrunde, was mer wäg em Böötliklub nid g’lingt. Am Schluss möcht i no d Museo de Ciencias gah erkunde. Hüt isch Mänti, den hei si zu 🫤.

Uf em Wäg zrügg fallt mer die offeti Kanalisation uf. Schynt mer gar nid so dumm u schynt o suber. Uf der andere Site vo der Strass fliesst der Aroyo. I wächsle d Strassesite. D Hüser hie si idyllisch g’läge, über n es Brüggli erreichbar; – aber vieli si unbewohnt, zum Verchouf a g’schribe. U der Aroyo isch e Kloake, grauschwarzes Wasser mit allem Mügleche drin.
Da möcht i o nid wohne.

So, itz ha n i mi Kafi ustrunke u ds Gipfeli isch g’gässe.
Hinech muess i no gah d Wösch reiche; u denn vieli Idrück verarbeite.

 

 

Datum:      20.07.2025
Ufenthalt:  Mendoza

 

Umgäbig:

Erläbnis:

Itz bi n i also in Mendoza, im Hotel Edian. Liege uf em Bett u isse Nüssli. Eigetli hätte mer doch zur Stärnwarte wölle… Doch, alles schön der Reihe nah.

I g’höre i der Nacht der Heinze erniesse u hueschte, kes guet› Zeiche. Am Morge stah n i am halbinüni uf, – vo ihm no ke Regig. Wo n er de ufstaht, isch er nid breite. mi düecht, er sig total ercheltet.
Vo i dBärge fahre isch de nümm. Dert isch chelter, der Wäg isch asträngend u nächtlechi Usflüg si o nid so ds Wahre für Heinz. – Mer fahre hüt nach Mendoza.

Es isch Sunnti, i der Stadt hei nume weni Läde offe. Uf em Land usse isch 14°C un es het Verchehr. Mer fahre wieder uf der Nationalstrass 40.

Es isch nid es extrem längs Stück, es strängt ne a, das Fahre. Aber, – er wott sälber. Ungerwägs halte mer, i choufe mer öppis z ässe, Heinze schlaft.

So um die viere si mer ds Mendoza; – e grossi Stadt.

Bim dritte Alouf finge mer es Hotäl. Bis ds Kamel bi der Garageifahrt iche passt, muess i mehrmals uf ds Kamel ueche: Fessli ache näh, Befeschtigungsgurte löse, luege.
Heinze laht no Luft us de Redli. Schlussäntlige passt’s wie mit em Schuehlöffu.

Heinze g’heit im Zimmer uf ds Bett. I tue no Gepäck buggle; – u ha itz fasch e Zuckerschock. Dä ‹Mix Caribe› isch wahnsinnig zuckeret.

Itz drückeni eifach d Düme u warte uf morn.

• Location: 32° 53′ 43.8107″ S 68° 50′ 15.0252″ W