Datum:      26.07.2025
Ufenthalt:  Palmira

 

Erläbnis:

D Tage wärde ereignisärmer. Mer si scho sehr früech nach Mendoza cho. Allerdings isch das denn, wo Heinze chrank isch worde, fasch nid angersch mügli g’sy.
Itze, wo ds Kamel suber isch, nomal i ds G’länd gah, wär fasch e Sünd. Aber, es geit üs ja guet hie, was wott me.

Mer föh wie g’wohnt a. Duss isch wieder Winter. Vo Sunne isch der ganz Tag nüt. Mer käfele am nüni u luege, wie der Ort erwachet. Es isch Samschtig, aber hüt schaffet me wieder. I ha itz useg’funge, werum geschter e Fiirtag isch g’sy:

In Mendoza ist der 25. Juli ein gesetzlicher Feiertag zu Ehren von Santiago Apóstol, dem Schutzpatron der Provinz. Die Feierlichkeiten beinhalten religiöse Prozessionen und andere kulturelle Veranstaltungen. Es ist ein wichtiger Tag für die Identität und Traditionen der Region. Aus diesem Grund ist der 25. Juli in Mendoza ein freier Tag, an dem viele Menschen an den Feierlichkeiten teilnehmen und die Traditionen pflegen.

I tue o hüt Vormittag pützerle u wösche.

Zum Zmittag fahre mer wieder nach San Martin. Heinze muess no Chüehlerflüssigkeit ha u de isch ds Reschturant vo geschter doch ganz guet g’sy; – es isch es o hüt no.

Uf em Rückwäg göh mer no Verschiednig’s gah choufe. Derzue halte mer im «chango mas».
Der Abe isch g’müetli, ruehig u wie geng schnäll verby.

 

Datum:      25.07.2025
Ufenthalt:  Palmira

 

Umgäbig:

Erläbnis:

Me stunet, was da i me Outo alles Platz het u muess putzt si. Aber es guetet.

Hüt morge het es bi mir hert mit erwache. Am nüni isch es sowyt, – u Heinze macht scho Kafi. O hüt git es diversi Sächeli zum abwäsche u o no paar Maschine Wösch.

D Sunne isch hüt g’nädiger mit schyne. Es wird veiechly warm u d Wösch trochnet. Mer wärkle der ganz Vormittag u Mittag. Na de eis fahre mer nach San Martin. Wie gäng isch es schwierig, es offnigs Resturant z finge. Derzue chunnt, dass hüt Firtag isch. Anschinend hei hüt alli frei drum si sie meischte Beize zue, oder hei am früeche Nami zue g’macht.

Dür ne fründlegi Frou i re Konditorei vernäh mer, dass ds Cafe de la Patria offe heig u me dert chönn ässe. Mer göh häre u ässe vorzüglech, – ömu ig. Heinze muess mit der argentinische Grössi vo sim Fleischbitz kämpfe, aber i gloube es isch o guet.

Zrügg i der Konditorei näme mer es Kafi u ig no es Stückli Süesses.
Der Nami isch g’loffe u mer fahre hei. Das heisst nach Palmira, zu Valentins Huus.

I packe de mi Gofere u Heinz pützerlet no e Latärne.
Na me Kafi isch ds Ändi vo däm Tag nach.

• Location: 33° 3′ 25.9847″ S 68° 32′ 55.4459″ W

 

 

Datum:      24.07.2025
Ufenthalt:  Palmira

 

Umgäbig:

Erläbnis:

Gäge Nami tuet es ziemli uf. Am Vormittag u Morge isch es chalt, grau u unfründlig.

I ha zwar ziemli der Besser g’macht mit abwäsche, das isch dinne. Heinze isch dusse u friert.
Nam Zmorge het er sech dra g’macht, ds Kamel ziemli us z weide. Was nid fescht verschrubt isch, wird use g’no.
Zmittg het er e Tällerete Teigware. I ha no Pizzaräschte vo geschter, die müesse o no vertrückt si.

Am Nami tue n i wäsche. I ha geschter e Versuechswösch g’startet u die bis hüt Morge nümm chönne us der Maschine näh.
Zum Glück het der Valentin d Lösig: uf ds Töri drücke u uftue, schnäll pär Handy düregäh.
Heinze geit mit em Kamel i ne Wärchstatt u de zur Outowösch. So um die sächse chunnt er mit eme subere Kamel zrügg.
Bim Käfele bespräche mer der mornderig Tag. U de git es no disersch u äis.
Heinze isch no am Compi u ig schribe ds B’richtli. Derzue ratteret d Wöschmaschine.

• Location: 33° 3′ 26.4923″ S 68° 32′ 55.8311″ W

 

 

Datum:      23.07.2025
Ufenthalt:  Palmira

 

Umgäbig:

Erläbnis:

Bächerli, Tällerli, Löffeli putze, Gäbeli, Mässerli o.
Abwäsche steit hüt uf em Programm
Nach em Campe geit das eso.
Nach Wuche vo Ässe u mängisch abwäsche
Isch Zyt dass’s richtig passiert
Nid dass’s bim Ässe eim plötzli tuet gruuse
Wil ds B’steck bim Ässe no schmiert.
(Eduard der Verslischuster)

Die letschti Rundi vo der Reis het a g’fange. Der Valentin, wo Heinze ds Kamel cha i si re Schwizerpouse ungerstelle, het üs geschter Abe allei g’lah. Mer si itz Hüeter vo me sehr grosse Hus, mit no grösserem Garte. (Im Garte stöh übrigens e ganzi Reihe vo angerne Reisemobil, wo hie abg’stellt si.)

Hüt Morge, nam Brunche, hei mer a g’fange mit ufrume u putze im Kamel. Es isch erstunlech, was da i Schränk, Trucke u Truhe alles i g’lageret isch.
Mis Tagesprogramm isch g’gäh. Zum Zmittag probiere mer, im Ort öppis z ässe z finge. Resturant si hie rar, u we mer eis g’seh, isch das zue. Wahrschynlech müesste mer öppe am zähni afah sueche, oder de wieder am Nami am vieri. Denn si si de wieder offe.

Nu, mer finge öppis. Es isch de aber scho nah de drü, bis mer is wieder uf e Heiwäg mache. D Dischtanz wo mer da derfür müesse zrügglege, isch gross. Wieder i Valentins Hus hei mer scho fasch wieder Hunger.

Später göh mer no gah kömerle, o na de viere, mer bruche Wöschmittel.
I ha mis Tagesziel «Chuchiutensilie» putze erreicht.

• Location: 33° 3′ 15.4044″ S 68° 33′ 19.0907″ W