So, der erscht Chlupf isch verby. Cool blibe u organisiere isch a g’seit.
Datum: 24.02.2025
Ufenthalt: La Paz

Umgäbig:

Erläbnis:

Ja, der humpel di rumpel di Kumpel isch rächt handicapiert. Mer warte no immer uf ne B’scheid vo der Versicherig. Si het no nid entschiede, öb Heinz itz i d Schwiz chönn oder nid. Sie entscheidet o, i weles Spital er muess. Si entscheidet o, öb ig der Heinz begleite, oder öb das e frömdi Pärson isch. U wenn der Heinz i d Schwiz flügt, entscheidet si uf welem Wäg u WENN.

Mer hei aber no anders z tüe. Mer müesse e sichere Unterstand für ds Kamel ha. E g’sichereti, wenn mügli deckti Garage. Da git es zum Glück bis itz mehreri Müglechkeite.

Der Vormittag düre tüe mer Gepäck sortiere: was näh mer i d Schwiz, was blibt da. Mer wei ja wyter reise.

Zum Zmittag göh mer zwöi Hüser wyter. Dert louft ds glyche Prozedere wie gäng ab. «Vegetarisches Ässe? «- «Das hei mer nid! «Ris, Härdöpfu, Salat?» – «Ja, das gieng!»

Nam Mittag reiche n ig ds Kamel uf me g’schützte, aber tüüre Parkplatz u fahre dermit vor ds Hotäl. (Bi chley stolz.)

Dert ruume n i d Läbesmittel usw. use u Gepäck iche.
Heinz passt uf, dass nüt vergässe geit u zwüschedüre muess ne brämse. 😠
Am sächsi chunnt eine, wo es Garage het. Mal luege.

I der Zwüschezyt isch dä Termin uf halbi achti useg’schobe worde.
So Zwüschefäll wie dä mit Heinzes Bei zeige eim, wie abhängig, ja mängisch o usg’lieferet me isch.
I dänke nid, dass mer morn flüge. Villicht am Mittwuch oder Donnschti, mal luege.

I schliesse dermit die Serie a B’richtli u fahte de wyter, we dä Bruch verheilt isch. Bis denn, tschüss!

Im dritte Stock z logiere bietet Usblicke. I g’seh der Himmel häller wärde u g’höre ds Rägeli uf em Dach.
Datum: 23.02.2025
Ufenthalt: La Paz

Umgäbig:

Erläbnis:

Es geit wyter. O we mir La Paz no lang nid erkundet hei (es Jahr würd nid länge); – mer mache e Reis, u nid Ferie.

Viertel vor siebni: Heinze gah wecke für ds Zmorge.

Dä fluechet nume. (Näb üsne Zimmer im dritte Stock vom Bellmond Hotäl isch no es Baño, es WC mit Dusche. Vor der Türe het es es Filzdecheli.) Also, Heinz isch nächti no gsi Bähnli fahre. Är isch em elfi vo sim Usflug zrügg cho. Wo n är na de eis uf d Toilette isch, het das Filzdecheli z G’füehl g’ha, es müess mit ihm Schlitte fahre. (Der Holzbode isch aber o z guet putzt.) Heinz isch uf em Rügge g’landet u het der Fuess g’hörig verknackst.

Er het de d Nacht düre g’wartet u g’litte u nüt g’seit. Hüt Morge göh mer i d Clinic Medica Lausanne, gah luege, was da isch. … u das a me Sunntig! (anschinend heissi ds ganze Viertel Lausanne)

Gäg die halbe nüne bringt is ds Taxi dert häre. D Ungersuechig duret, es git wahnsinnig viel z schribe, z läse u wieder z schribe. De wird das Fuessg’länk g’röntget. (Der Rötgespezialischt macht das ohni Schutz u wislet de mit em Bild ab.)

Heinze wird i ds Zimmer 204 verfrachtet.
Ja, u de chunnt der B’richt.

Ds Wadebei het e Bruch!

U itze?
Loufe cha n er schlächt, fahre cha n er nid.
Mer beratschlage, was z mache wär. Schlussäntli entschliesst sech Heinz, die nötegi Operation i der Schwiz lah z mache. Das bringt e Reihe vo Änderige vo all üsne Plän.

Da mis Spanisch ame chlyne Ort isch u sicher nid längt für allei ungerwägs z sii, wirde n ig d Reis o abbräche u i d Schwiz zrüggcho.
Wenn, isch no offe u chunnt uf d Versicherig vom Heinz a. I wett öppe zur glyche Zyt zrüggcho wie är.

Heinz blibt bis am halbi drü i däm Zimmer. I gah de gah spaziere u isse Zmittag. Wo n i zrüggchume isch no immer glych wyt. Am drü gah n i gah frage, was itz göng. D Ärzti seit, der medizinisch B’richt sig g’macht, itz wart si uf ne Stämpel vo der Administration u – de o no uf passendi Socke. Es göng no e Stund.

Es isch schliessli nah de füfe, wo mer us em Spital chöme u i ds Hotäl fahre.
So, itz bi n i trotzdäm müed. Tschüss bis morn.

I starte hüt i der g’wohnte Früechi. Interressant, wie der Näbel mit La Paz spielt. Wie im Theater zeigt er einzelni Szene.

Datum:      22.02.2025
Ufenthalt:  La Paz

Umgäbig:

Erläbnis:

Am halbi achti göh mer gah Zmorge ässe u gäh de Wösch uf. Bürobüez beschäftiget is fasch der ganz Morge.
Mer hei üs vorg’no, La Paz mit de Seilbahne z erkunde. Die Riesestadt isch die höchschtg’lägeni Metropole u het e Wahnsinnsmasse vo Lüt.
Ganz i der Nechi vo üser Ungerkunft isch e Bahnstation vo der gälbe Gondelbahn.
La Paz het e ganzi Reihe vo so Seilbahne, – farblech trennt?

Es isch äuä eini vo de g’schydere Lösige, für das Chaos uf de Strasse azgah. Als Fuessgänger hesch o in Bolivie absolut kener Rächt. Fuessgängerstreife si e Wunschtroum, u we’s eine het, bisch glych nid sicher. Fuessgängerzone git es nid, o i de Tourischtestrasse verchehre die gröschte Chärre; – mit entsprächende Uswürkige für d Luft.

Mit de gälbe Gondle fahre mer i d Höchi, zu me ‹Mirador›. Vo dert näh mer de die graui u anschliessend die violetti Bahn. Dermit lande mer im historische Zäntrum.
Das isch e extrem farbegi Gägend. Es het Masse vo Läde u Lädeli, wo Produkt i jeder Güeti, Priisklass u Sinnhaftigkeit abiete. Masse vo Touristiksrtikel si der Strass nah uftischelet.

Usserdäm kündiget sech der bolivianisch Carneval a. D Koschtüm si e Ougeweid. Lutstarchi Musig verlangt nach Ufmerksamkeit.

I me alte Hus isch es Resturant, wo mer Zmittag ässe. Anschliessend zum bolivianische Coiffeur isch o es Erläbnis für sich.
Der Räschte vom Nami geit mit loufe, lädele u fötele z schnäll verby.

Zrügg fahre mer de wieder mit de Gondle. Schad, we n i hät chönne, hät i der Tag verlängeret.

Me cha o uf em Camping nid geng i aller Früechi starte. I der Ecolodge in Copacabana isch das o so.
Datum: 21.02.2025
Ufenthalt: La Paz
Umgäbig:

Erläbnis:

Mer starte spät. Nach em Zmörgele u müehsam abwäsche (werum het es kener Abwäschtrög mit warmem Wasser i de Camping), göh mer ds Stedtli Copacabana gah a luege. Ängi Gässli u schynbar g’sperrti Strässli präge dä B’suech. Mer si, sider letscht Nacht, in Bolivie u das ungerscheidet sech weni vo Peru. Kes Wunder, hei die Länder ja o e g’meinsami G’schicht.

Bis lang i Nami iche si mer geng meh oder weniger um e Titicacasee. I me hingere Zipfel müesse mer sogar no mit ere Fähre über ds Wasser. (U der Fährima het is äuä b’schisse.) D Landschaft isch angersch als in Peru. Rund um e See het es Bärgli. Grösser Hügle u Täler. Wyter vom See ewäg wird ds Land äbener. Grossi Flächine Gras u Bure, wo Viehzucht betriebe. Mir si uf em Wäg gäg La Paz. D Strass isch irgendeinisch breit u rächt guet, fasch e Outobahn. I me Dörfli a der Strass, in Huarina ässe mer chley öppis. Dernah geit es wyter. In Batallas choufe mer schnäll es nöis Bodetecheli.

Je nächer dass mer La Paz chöme, deschto meh Hüser het es der Strass nah u o geng wie meh Outo. In La Paz geit es de nume no schrittwys vorwärts. Mängisch steit me, we me de a fahrt presche garantiert ‹Colectivos› vo allne Site i ne vermeintlechi Lücke. Sicher si d ‹Colectivos› e Teil vom Verchehrsproblem in La Paz. Nach zwöi e halb Stung, totalem Stuune ab der Grössi vo dere Stadt u no totalerem Stuune ab de Lüt i de Strasse, chöme mir i der hütige Ungerkunft a.

Nachdäm mer ds Gepäck i dritt Stock ueche b’bugglet hei, si mer afe chley flach.

Em halbi achti göh mer über d Strass e Pizza gah verdrücke.

Ja, u de vorbereite für die Riesestadt, – u morn de erfahre.