Datum:      30.07.2025
Ufenthalt:  Palmira

 

Umgäbig:

Erläbnis:

So, itz het der letscht Tag also a g’fange. Wo mer ufstöh, isch der Valentin scho lang am Wärkle. Scho geschter het er g’seit, dass er es Abschiedsässe wöll mache. Geschter het er de o Härdöpfu g’chochet u so.Mer zmörgele u churz dernah chunnt e Cousin mit sire Fründin verby. Mer wärde ‹argentinisch› begrüesst. Das git eis Hallo, u si höckle de zäme.
Heinze muess hüt wieder i ne Wärchstatt. Der Tank isch ja no gäng undicht. Er verschwindet.

I nime mer no einisch Zyt zum düschele u dernah probier i no n es Mal, i mire Täsche Ornig z mache. Irgendeinisch düecht mi, es wär schön, no chley z pfüsele. I richte mi uf em Bett i u – wusch, bi n i wäg!
Am Nami, halbi zwöi, chlopfet’s u Heinze rüeft. Wo n i de i d Chuchi chume, si die drü Argentinier u Heinze scho voll am Ässe u Trinke. Der Valentin het e Tischgrill ufg’stellt, si brätle Fleisch u für mi het er vegetareschi Empanadas g’macht. (Zum Glück isch er mal Beck g’sy.)Verschlafe, wie n ig bi, probier i, bi däm Fescht mit z halte.
Die Empanadas si sehr guet u der Härdöpfusalat o. I bi mer aber eifach nid so g’wanet, us em Bett z cho u diräkt z ässe. Da i am Vormittag g’meint ha, das Ässe sig ersch am Abe, ha mer wäg em Schlafe o nid so Gedanke g’macht.
Es wärde unzählegi Salut’s g’macht, es wird sehr viel Fleisch g’gässe, u d Wyfläsche wärde fasch läär. Vo de G’spräch berchum i nume e Teil mit. We Argentinier unter sich si, wird sehr schnäll g’redt.
Em halbi vieri isch dä B’suech wieder wäg, mer wäsche ab u nachhär isch «Siesta».

Um die sächse si mer de wieder z dritt i der Chuchi. Es git no viel z b’richte, ab z rächne u z veribare. Derzue git es e Kafi us Peru, wo n ig nümmi ds Gepäck cha näh.
Speter wird ds Kamel no g’reicht. I mache der B’richt.
Morn bringt mi der Valentin zum Flughafe.

• Location: 33° 3′ 26.4707″ S 68° 32′ 54.0492″ W

 

 

Datum:      29.07.2025
Ufenthalt:  Palmira

 

Umgäbig:

Erläbnis:

Mer si gäng no in Palmira u d Tage wärde weniger. Übermorn bi n ig scho i der Luft. Es eigenartig’s G’füehl, we n ig dra dänke.

Bim Ufstah isch der Himmel scho blau, bim Zmorge schynt d Sunne. Wie wenn Argentina würd zeige, dass es o andersch cha. Der ganz Tag het chley oppis vo Früehlig.

Nach em Zmorge geit Heinze mit em Kamel zum ‹Schmiere›. Ig mache mi uf e Wäg zu de Bahngleis. Das G’länd da het öppis vo G’schicht, Verfall, Wirtschaft, öffentlechi Institution, wichtig u de glych morbid.

D G’schicht vo der argentinische Isebahn isch läng. Was einisch e grossi, staatlechi G’sellschaft isch g’sy, isch hüt fasch nume no Güeterverchehr u vo der Argentinische Diktatur privatisiert. Nume in Buenos Aires git es no ne Pärsonetransport mit der IIsebahn.

Guet, i gah also zu de Bahngleis, mache miner Föteli u stune, dass de da doch no einiges louft. Zersch bi n i überrascht, dass ds G’länd vo re Polizischtin überwacht wird. Die isch aber nätt u zeigt mer die schönschti Ussicht uf d Ande. I stune aber o, wieviel Güeter da bewegt wärde. Der morbid Astrich berchunnt dä Ort aber dür die umg’stürzte, ufbockete, kaputte Isebahnwäge, wo n es überall het.

Am Mittag gah n iwieder zrügg zu Valentins Hus. I ha mit em Heinze abg’macht, dass mer nach San Martin göh ga Zmittag ässe.

Das mache mer de o u lande: im Café de la Patria. I ha hüt e argentinische G’müeställer. Schad hei si so viel Öl zum Brate b’brucht, aber toll, dass es überhoupt so öppis git. Nach chley umeloufe, eme guete Kafi mit me süesse Stückli u paar Föteli fahre mer wieder zrügg nach Palmira.

Der Räschte vom Nami geit mit fulänze, Kamel irume u B’richtli schribe düre. Am Abe göh mer no i Atomo übere u so schwindet o dä Tag.

 

 

Datum:      28.07.2025
Ufenthalt:  Palmira

 

Umgäbig:

Erläbnis:

Hüt isch der Tag vo Mendoza. Heinze het e Termin für ds Kamel lah z schmiere u ig wott de no chley i der Stadt ume schlürme. – Mer föh der Tag wie gäng mit zmörgele a. I lege de no e Rundi düschele i u so gäge Mittag zue fahre mer i die ‹grossi› Stadt.
Mendoza isch würkli goss. Scho gly nach Palmira föh die erschte Industrieboute a. U de wärde d Geböide gäng wie hüfiger. Ds Gebiet zwüsche Palmira u Mendoza isch praktisch zueb’boue. Palmira g’hört de aber scho zum Kreis San Martin u nid zu Mendoza.
Mer farte über d Outobahn u si ziemli tifig dert. D Garage, wo Heinze e Termin het, isch im Zäntrum. Ds Outo eifach am Strasserand abstelle u wäg gah, wär ziemli fahrlässig. Z liecht würd es ufb’broche u g’chlauet, was me chönnt bruche. Mer stelle ds Kamel, wenn mügli, uf ne bewachte Parkplatz. Vo dene het es in Mendoza vieli.
Da mer vor däm ‹Schmiertermin› no wei ga ässe, löh mer o hüt ds Kamel uf so me Parkplatz.

Vo dert us sueche mer e gueti Beiz. Näb em Plaza Independencia finge mer ds ‹Bocca-Mendoza-Argentina›. Hie git es gueti, solidi Choscht. Nach em Ässe trenne mer is. Heinze geit zum Termin i der Garage u ig uf e Plaza Independencia. Es het so öppis wie e Handwärkermärit. Viel Schmuck wird a bote. Dernäbe aber o Strickware, Lädersache, Bilder u viel, viel Plastikspielzüüg. I fötele, mache no Usflüüg uf anger Plätz u scho bal isch Zyt, zu Heinzes Garage z gah.
Na de viere träffe mer is dert im Kafi näbedrann. Heinz cha no nid alles abhägle, was er het wölle lah mache. We d Fettpress kaputt isch, cha me nid schmiere. Drum steit morn e wytere Termin a.
Anschliessend göh mer i n es Lädeli für Matetee -Utensilie. We me in Südamerika isch, muess me sech da dermit befasse. In Argentina isch das, für e Teil Lüt, fasch es Nationalheiligtum.
Guet, es brucht e chlyni Kalebasse, e Art es Sugrohr, natürli ds Chrut vo däm Struch u heisses Wasser. Eigetli ha n i nid wölle, – de choufe mer die Utensilie de doch; – als Erinnerig. Heinze deckt sech o i.

Ja, u de geit es zrügg nach Palmira. Der Valentin erwartet üs scho. – I mache no mi B’richt u verzieh mi früech i ds Bett.

 

 

Datum:      27.07.2025
Ufenthalt:  xxxx

 

:

Erläbnis:

Dass es hüt wieder so chalt wird, da dermit hätte mer nid g’rächnet.

Der Tag faht mit Sunne a. Nach em Zmorge isch es richtig warm, we me a der Sunne steit. U ja, es isch no dises u äis, wo z putze isch. Heinze weiss genau, was er no wott, oder muess mache.

I bi hüt uf der fülere Site. Teppichli wäsche, der Verschluss vom Wassertank putze; – ja u de d Vorbereitige vom Zmittag u Znacht mache. Dernäbe tue n i fulänze, chley im Handy grüble u lah d Zyt vergah.

Ab em Mittag tuet es zue u wird wieder chalt.
Heinze rumt putzti Sache i ds Kamel, u chunnt zwüschedüre iche, sech cho wärme.
Nam Znacht wei mer no schnäll i ‹Atom›, i Supermärit näbedrann; – dä het aber zue, es isch ja o Sunntig.
Über d Strass het aber es Lädeli offe (abierto), dert chöi mer Verschiednigs für morn Morge choufe.

U ja, es isch gäng no mo…chalt.

• Location: 33° 3′ 26.5284″ S 68° 32′ 54.3588″ W