Schlagwort-Archive: Ässe

Argentina Tag 24


Mittwoch, 30 Juli 2025

1 Antwort

 

 

Datum:      30.07.2025
Ufenthalt:  Palmira

 

Umgäbig:

Erläbnis:

So, itz het der letscht Tag also a g’fange. Wo mer ufstöh, isch der Valentin scho lang am Wärkle. Scho geschter het er g’seit, dass er es Abschiedsässe wöll mache. Geschter het er de o Härdöpfu g’chochet u so.blankMer zmörgele u churz dernah chunnt e Cousin mit sire Fründin verby. Mer wärde ‹argentinisch› begrüesst. Das git eis Hallo, u si höckle de zäme.
Heinze muess hüt wieder i ne Wärchstatt. Der Tank isch ja no gäng undicht. Er verschwindet.

I nime mer no einisch Zyt zum düschele u dernah probier i no n es Mal, i mire Täsche Ornig z mache. Irgendeinisch düecht mi, es wär schön, no chley z pfüsele. I richte mi uf em Bett i u – wusch, bi n i wäg!
Am Nami, halbi zwöi, chlopfet’s u Heinze rüeft. Wo n i de i d Chuchi chume, si die drü Argentinier u Heinze scho voll am Ässe u Trinke. Der Valentin het e Tischgrill ufg’stellt, si brätle Fleisch u für mi het er vegetareschi Empanadas g’macht. (Zum Glück isch er mal Beck g’sy.)blankVerschlafe, wie n ig bi, probier i, bi däm Fescht mit z halte.
Die Empanadas si sehr guet u der Härdöpfusalat o. I bi mer aber eifach nid so g’wanet, us em Bett z cho u diräkt z ässe. Da i am Vormittag g’meint ha, das Ässe sig ersch am Abe, ha mer wäg em Schlafe o nid so Gedanke g’macht.
Es wärde unzählegi Salut’s g’macht, es wird sehr viel Fleisch g’gässe, u d Wyfläsche wärde fasch läär. Vo de G’spräch berchum i nume e Teil mit. We Argentinier unter sich si, wird sehr schnäll g’redt.
Em halbi vieri isch dä B’suech wieder wäg, mer wäsche ab u nachhär isch «Siesta».

Um die sächse si mer de wieder z dritt i der Chuchi. Es git no viel z b’richte, ab z rächne u z veribare. Derzue git es e Kafi us Peru, wo n ig nümmi ds Gepäck cha näh.
Speter wird ds Kamel no g’reicht. I mache der B’richt.
Morn bringt mi der Valentin zum Flughafe.

Argentina Tag 22


Montag, 28 Juli 2025

Hinterlassen Sie eine Antwort

blank

 

 

Datum:      28.07.2025
Ufenthalt:  Palmira

 

Umgäbig:

blank blank blank
blank blank blank

Erläbnis:

Hüt isch der Tag vo Mendoza. Heinze het e Termin für ds Kamel lah z schmiere u ig wott de no chley i der Stadt ume schlürme. – Mer föh der Tag wie gäng mit zmörgele a. I lege de no e Rundi düschele i u so gäge Mittag zue fahre mer i die ‹grossi› Stadt.
Mendoza isch würkli goss. Scho gly nach Palmira föh die erschte Industrieboute a. U de wärde d Geböide gäng wie hüfiger. Ds Gebiet zwüsche Palmira u Mendoza isch praktisch zueb’boue. Palmira g’hört de aber scho zum Kreis San Martin u nid zu Mendoza.
Mer farte über d Outobahn u si ziemli tifig dert. D Garage, wo Heinze e Termin het, isch im Zäntrum. Ds Outo eifach am Strasserand abstelle u wäg gah, wär ziemli fahrlässig. Z liecht würd es ufb’broche u g’chlauet, was me chönnt bruche. Mer stelle ds Kamel, wenn mügli, uf ne bewachte Parkplatz. Vo dene het es in Mendoza vieli.
Da mer vor däm ‹Schmiertermin› no wei ga ässe, löh mer o hüt ds Kamel uf so me Parkplatz.

Vo dert us sueche mer e gueti Beiz. Näb em Plaza Independencia finge mer ds ‹Bocca-Mendoza-Argentina›. Hie git es gueti, solidi Choscht. Nach em Ässe trenne mer is. Heinze geit zum Termin i der Garage u ig uf e Plaza Independencia. Es het so öppis wie e Handwärkermärit. Viel Schmuck wird a bote. Dernäbe aber o Strickware, Lädersache, Bilder u viel, viel Plastikspielzüüg. I fötele, mache no Usflüüg uf anger Plätz u scho bal isch Zyt, zu Heinzes Garage z gah.
Na de viere träffe mer is dert im Kafi näbedrann. Heinz cha no nid alles abhägle, was er het wölle lah mache. We d Fettpress kaputt isch, cha me nid schmiere. Drum steit morn e wytere Termin a.
Anschliessend göh mer i n es Lädeli für Matetee -Utensilie. We me in Südamerika isch, muess me sech da dermit befasse. In Argentina isch das, für e Teil Lüt, fasch es Nationalheiligtum.
Guet, es brucht e chlyni Kalebasse, e Art es Sugrohr, natürli ds Chrut vo däm Struch u heisses Wasser. Eigetli ha n i nid wölle, – de choufe mer die Utensilie de doch; – als Erinnerig. Heinze deckt sech o i.

blank

Ja, u de geit es zrügg nach Palmira. Der Valentin erwartet üs scho. – I mache no mi B’richt u verzieh mi früech i ds Bett.

Argentina Tag 17


Mittwoch, 23 Juli 2025

Hinterlassen Sie eine Antwort

blank

 

 

Datum:      23.07.2025
Ufenthalt:  Palmira

 

Umgäbig:

blank blank

Erläbnis:

Bächerli, Tällerli, Löffeli putze, Gäbeli, Mässerli o.
Abwäsche steit hüt uf em Programm
Nach em Campe geit das eso.
Nach Wuche vo Ässe u mängisch abwäsche
Isch Zyt dass’s richtig passiert
Nid dass’s bim Ässe eim plötzli tuet gruuse
Wil ds B’steck bim Ässe no schmiert.
(Eduard der Verslischuster)

Die letschti Rundi vo der Reis het a g’fange. Der Valentin, wo Heinze ds Kamel cha i si re Schwizerpouse ungerstelle, het üs geschter Abe allei g’lah. Mer si itz Hüeter vo me sehr grosse Hus, mit no grösserem Garte. (Im Garte stöh übrigens e ganzi Reihe vo angerne Reisemobil, wo hie abg’stellt si.)

Hüt Morge, nam Brunche, hei mer a g’fange mit ufrume u putze im Kamel. Es isch erstunlech, was da i Schränk, Trucke u Truhe alles i g’lageret isch.
Mis Tagesprogramm isch g’gäh. Zum Zmittag probiere mer, im Ort öppis z ässe z finge. Resturant si hie rar, u we mer eis g’seh, isch das zue. Wahrschynlech müesste mer öppe am zähni afah sueche, oder de wieder am Nami am vieri. Denn si si de wieder offe.

Nu, mer finge öppis. Es isch de aber scho nah de drü, bis mer is wieder uf e Heiwäg mache. D Dischtanz wo mer da derfür müesse zrügglege, isch gross. Wieder i Valentins Hus hei mer scho fasch wieder Hunger.

Später göh mer no gah kömerle, o na de viere, mer bruche Wöschmittel.
I ha mis Tagesziel «Chuchiutensilie» putze erreicht.

Argentina Tag 7


Sonntag, 13 Juli 2025

Hinterlassen Sie eine Antwort

blank

 

 

Datum:      13.07.2025
Ufenthalt: Termas Hualfin

 

Umgäbig:

blank

 

Erläbnis:

Heinze het es Mailproblem, wo sech nid so eifach laht löse. U wie das so isch, es frisst Zyt, regt uf u me rennt im Kreis. Da isch der Umstand, dass es Ross e Stoffsack vom Zält a g’frässe het fasch e Näbesach. Ds Übernachte hie im Camping Colalao del Valle isch guet g’sy, trotz der Discomusig, wo me die ganzi Nacht g’hört het. Ersch fasch am Mittag starte mer.

blankHüt isch Wyterbildig a g’seit. Mer b’sueche ds Informationszäntrum über ds Volk vo de Quilmes. Einersit’s het es Ruine vo de Hüser vo me grosse Dorf, anderersit’s het es es Museum, wi viel im zytleche Kontägscht zeigt.

blank blank blank blank

Das Volk, wo eigetli viel älter als d Inka isch, het de spanische Eroberer ds Läbe nid eifach g’macht.

Uf em wytere Wäg sueche mer es Resturant. In Santa Maria probiere mer so eis z finge. Aber alli si zue. Mer finge o später nüt, Lädeli si offe, aber e Beiz, -nada

D N40, wo mer ja scho einegi Zyt druf fahre, isch i der Zwüschezyt vei e Strass. Zwar zwöispurig,aber guet usb’boue u zytewys bolzegrad über vieli Kilometer. We ds Kamel pfift fahrt es hundert. Mi düecht, es pfift nume nono.

Der Strecki nah si die grosse Landwirtschaftsbetriebe verschwunde. E Zyt lang het es de Wygüeter g’ha, riesegi Ländereie u nume Trube druf. Itze, hie isch wieder Busch- u Dorneland. Es het der Strass nah Herde vo Geisse u Schaf wo Chlynbure g’höre.blank

Irgendeinisch lande mer uf em Camping Termas Hualfin. Mer hei no Ässensräschte vo geschter, wo mee chöi warm mache, drum chöme mer de doch no zu Öppis zwüsche d Zähn. Heinze geit gah bädele u i probiere, dä Tägscht da z schuehschtere.