Das slowenische Wappen zeigt einen blauen Schild mit zwei blauen Wellenlinien und darüber den Berg Triglav, der durch drei goldfarbene Sterne ergänzt wird. (Mitte)

Slowenie isch es Land, wo vo üs us ganz am Afang vom Balkan liegt. Mit ere riiche G’schicht wo über langi Zyt vo B’setzige u B’setzer prägt worde isch.

Föteli vo hüt:

 

Datum: 27.8.25
Übernachtig: im Zug zwüsche Züri u Lubljana
Erläbnis:

Erschte Abe: Mer si afe bis Züri cho. Das isch für Landeier fasch e angeri Wält.Nüt vo bärnischer Gmüetlechkeit im Bahnhof.

Mer wei währed üsem Ufenthalt öppis habere. Also use uf e Platz u dert zu re Beiz. Dass das e Pizzeria isch düecht mi e guete Zuefall.

Mer löh üs lah berate, b’stelle ei Pizza u wei se de teile. Was de b’bracht wird überrascht. E Riiiisepizza wird uftischet. Si isch zwar guet, aber i ha no gly einisch g’nue. Zum Glück mah Beätel chley meh.

D Fahrt im Nachtzug gei pünktlech los. Mer hei es 3er Abteil. Nach chley braschte zieh mer is so em elfi zum Pfuuse i d Koje zrügg.

Es touche viel Erinnerige a mi letschti Nachtfahrt in Vietnam uf. Es schüttlet, pfuset u pfiift öppe glych. Es waggelet alles, wo nid niet u nagufescht isch. Jedes Iseli wo uf me Iseli ribt, git e lute Ton vo sech. Wie söll me da schlafe? Erstunlecherwys geit das de sogar, – ömu so chley.