Es geit lang, bis alles g’seit u g’lost isch, bi dere Verabschiedig. Die beide Hoteliers si üs chley a ds Härz g’wachse.
Datum: 15.02.2025 Ufenthalt: Checacupe –
Erläbnis:
So um nüne fahre mer ab in Ollantaytamo. Mer umfahre Cusco nordöschtlech. Die allgemeini Richtig isch der Titicacasee.
Itz si mer i der Nechi vo Pitumarca, 3500 Meter über Meer, uf me Art vo Campingplatz, muetterseel allei, u mir g’friere d Finger bim Schribe fasch ab! Der Heinz seit, das isch Reise, nid Ferie! Geschter hei mer Ferie g’ha! Nu de.
 |
 |
 |
Vo der Fahrt git es weni z verzelle. Mer si rächt schnäll vorwärts cho. In Urubamba göh mer uf e Märt u decke üs wieder mit Läbesmittel i.
Zmittag hei mer in Urgos g’gässe, fein isch es g’si, aber wieder viel z viel. (Üs isch verzellt worde, dass d Peruaner anschinend sehr viel uf e Täller tische u de o viel ässe.)
So um di viere träffe mer uf em Camping i. Mer richte n is für d Nacht i, ässe öppis u nachdäm es dunkel worde isch, schlötterle mer e Tagesb’richt. Tschüss