We me so me bequeme Ort isch, laht me ds früeche Ufstah b’sungersch gärn lah sii. Es isch nah de siebne, wo mer d Fädere verlöh.
Datum: 13.02.2025 Ufenthalt: Ollantaytambo –
 |
 |
 |
 |
Erläbnis:
Hüt sött wieder einisch öppis gah. Mer wei zu re warme Quelle in Laras. Mer fahre am halbi zähni in Ollantaytambo wäg. Scho gly si mer wieder i töife Täler inne. Währed em obsi fahre entschliesse mer is, e.archäologeschi Fundstätt gah z b’sueche. Dä Fund besteit us re ganze Siedlig, wo äuä älter isch, als d Inka. Pumamarca, wie das hie heisst, si ei- u mehrstöckegi Hüser, uf me Bärgrügge, boue wie ne Verteidigungsalag, am Rand vo me Abgrund. Wyter obe a de Bärghäng, isch Landwirtschaft betriebe worde. Eme Teil vo de Hüser g’seht me a, dass es b’brönnt het.
Öppe drei, vier Kilometer wyter unger si nöii Hüser, nöii Dörfer. Im Tal wärde hüt Maschtmunine g’halte.
Üse wyter Wäg geit gäng wie meh i d Höchi. (er wird üs wieder uf rund 4500 MüM füehre). I dere Gäged hie g’seh si nid so hüfig usländeschi Tourischte. Bi me toll bemalte Huus halte mer a u fötele. Verusse hocke, d Mueter u ne Tochter u tüe e Art stricke, oder wäbe. Der Ma u der jünger Suun hocke derby. Nach längere ‹Verhandlige› chouft der Heinze e Chappe us Alpakawule?
Später erreiche mer en Art Passhöchi, da obe wärde i grosser Azahl Alpaka g’halte. Ds Läbe hie isch verglychbar mit däm vo Senne, abg’schiede, einsam. Es chlyses Buebli, wo vo üs e Bäremani g’schänkt berchunnt, weiss nid so rächt, öb’s söll g’ränne vor Angscht, oder lächle us Fröid.
O hie obe, «uf em Gade vo der Wält», si d Lüt fründlig u interressiert. Guet, ob würkli alli öppis mit däm «Suiza» chöi afa, wo si als Antwort überchöme, we si frage wohär mer chöme, isch fraglech.
Im Louf vom Nami erreiche mer Laras. I däm Ort het es heissi Quelle, wo hie zu me Badebetrieb usb’boue worde si. I mehrere Becki, mit verschiedene Tämperature plantsche Lüt. Mer si vo de sältene, usländische Tourischte u blibe öppe e Stund. Nachhär ässe mer churz öppis u mache n is de uf e Rückwäg.
Will mer nid wieder die ehnder schlächti Strass vom Nami wei näh, fahre mer e nöie Wäg über Calca. Mer lande aber fasch vom » Räge i der Troufe», ( näbscht däm, dass es die ganzi Zyt würkli rägnet). D Strass isch äng u kurvig u i der Zwüschezyt isch Nacht. Ersch öppe vo Calca a cha Heinze chley rüehiger fahre. Derfür het es itze Brämsschwelle i de Siedlige uf der Strass u hüfig isch d G’schwindigkeit uf 30 bis 35 Kilometer begränzt.
Em halbi zähni si mer de wieder in Ollantaytambo zrügg, riich a Idrück u müed.