Es geit wyter, mer verlöh der Campingplatz in Cuzco u fahre i Richtig Machu Pichu.
Datum: 09.02.2025 Ufenthalt: Ollantaytambo –
Erläbnis:
Wie geng ässe mer ziemli früech Zmorge. So em haubi siebni dampfet der Kafi. Mer zmörgele i aller Rueh. Ussert üs isch no niemer uf. Bis mer de alles abg’wäsche hei u n es wieder am Platz isch es de Viertel nach nüni. In Cuzco hei mer zersch im Sinn, no e Tämpel a z luege. Wo mer de aber g’höre, dass der Itritt siebezg Sol pro Pärson choschti, tüecht is, das sig z viel.
Vo Cuzco fahre mer i Richtig Maras. Es wyt’s Stück füehrt über Naturstrasse.. Nid wyt dervo in Checkok hei d Inka, a der Inkastrass Vorratshüser b’boue. Hie hei si landwirtschaftlechi Erzügnis g’sammlet u de i schlächte Zyte über d Strass im Riich wytervermittlet. Einersits isch beindruckend, wieviel vo dene Hüser da ufg’stellt worde si. Anderersyts stuun ig, dass sogar e Belüftig für ds Getreide g’macht worde isch.
Die näschschti Station isch in Moray. Oh hie si Bouwärch us der Inlazyt. Kreisförmig hei si Terrasse a g’leit u da druff Pflanze versuechswys a b’bout. Si d Erträg z friedestellend g’sy, het me die Pflsnze im Land ume a b’boue. Pflanzeversüech vom Feinschte. Leider het mi wieder einisch e Ougemigräne päcklet. I blibe im Kamel u schlafe. Heinze geit allei uf Besichtigung. Später, wo n är zrügg isch u verzellt, gah n i o no gah luege.
In Maras, eme Dörfli i der Nechi wei mer Zmittag ässe. E Iheimische verzellt üs vom La Portadas. Vegetarisch: kes Problem, feins Ässe: kes Problem? Ganz feini Wirtslüt, mit viel Härz u Verstand, wo üs unwahrschynlech viel erkläre u zeige. Mer ässe chley tüürer, aber es isch jede Sol wärt. I ha es super Süppli (obschon i sälte Suppe isse) u dernah Riis mit G’mües u Schwümmli. Anschliessend zeige si üs d Produkt, wo si verwände u si begeischteret, dass mer d Salzg’winnig wei gah a luege.
Das Tal mit de Salzbecki isch nid wyt ewäg. Obe, am Afang vom Tsl entspringt e warmi Quelle mit salzhaltigem Wasser. Das isch scho vo de Kulture vor de Inka g’nutzt worde. E Teil vo de Wasserbecki stammt us dere Zyt. O zur Inkazyt, aber o später, si nöii Becki a g’leit worde. Das Wasser wird also i die Becki g’leitet, komplizierti Gräbli mache das mügli. Die siebe Cantimeter Wasser verdunschte u z’rügg blibt e Salzchruschte, wo g’ärntet wird.
Lang blibe mer nid da, mer kenne ja das Prinzip. Vo Maras us fahre mer i ds Ccapac Inka Ollante Boutique Hotäl. Das isch üse Usgangspubkt für Machu Pichu.