Hüt isch Cusco Tag! Mer si ja scho geschter da häre g’fahre, im Camping ‹Quinta Lala› izoge u hei de e Nacht erläbt, wo n es richtig g’schiffet het. (äxcüsi der Usdruck).
Datum: 08.02.2025 Ufenthalt: Cusco –
 |
 |
 |
 |
 |
 |
Erläbnis:
Em Morge hei mer is afe verschlafe. Denn het Heinze e Chochattakke g’ha. Us Härdöpfu, Tomate, Chäs u Chnobli het er es Zmorge bäschtelet. Na de übleche Hushaltsufgabe si mer de i d Stadt ache. Was es da alles z g’seh git! Zwar hei d Spanier alles dra g’setzt, ds Erb vo de Inka lah z verschwinde. Me g’seht vor allem no Muure, wo vo de alte Bouwärch si, u d Spanier i ihrer ‹Prachtboute› integriert hei. Was isch da für Unrächt tah worde u me het nie probiert, das wieder guet z mache. D Spanier hei die Länder plünderet, zäme mit der katholische Chilche. Wo isch all dä Riichtum, das Guld verschwunde? We me Spanie als Land aluegt, so si da kener Riichtümer me sichtbar, ehnder im Gägeteil. U bim Vatikan weiss me’s nid…
D Stadt isch riesig, – der alt Teil de aber nid eso. Vom Camping här, vom Hoger obe ache, löh mer is zersch zu re erschte Kathedrale lah tribe. Die isch i der Zwüschezyt es Museeum. Interressant isch, dass d Stützmuur hinger em Platz us der Inkazyt stammt. Dür Stäge u Gässli geit es nidsi. Mer lande uf em ‹Plaza de Major de Cuzco›. Es isch scho imposant, weler Bouwärch da um dä Plaz stöh;- aber alles spanisch.
Vo itz a tribe mer is i de Strasse vo alt Cuzco ume. I der Altstadt si em Sftrasserand nah all müglech Lüt, wo mit Erzügnis wei händele. Irgendeinisch göh mer i me Reschturant gah ässe. Es isch guet, aber zviel. (I ha Nudle, mit Schwümmli u G’mües☺️) Vo dert us geit es wyter. Mer lande i me Grossmärit, i re Märithalle, wo riesig isch. Mer tüe chley kömerle, fötele, g’schoue. (Heinz chouft Pupi Demono chlyni, üsserscht scharfi Chili, wo n er wott heibringe.😅) Irgendeinisch si de aber gäng öppe wieder glychi Ständ.
Mängisch g’seht me vo der spanische Pracht o nümm viel i de Strasse. E Teil vo de Hüser si boufällig worde: schad. I de Innehöf ahnt me d Pracht vo de Spanier. Mer verlöh dä Märit, schlendere wyter (Edi chouft no es Frottiertüechli) . Am Schluss göh mer i me alte Kolonialhus, uf em Dach es Kafi gah trinke. D Ussicht isch gigantisch!
Für wieder i Camping z cho, bueche mer wieder einisch Uber. Der Abe verlouft de mit Büro.