Ds Erwache im Camp Lena het positivi Site! D Infrastruktur laht wieder einisch e warmi Duschi zue.
Datum: 07.02.2025 Ufenthalt: Cusco –
 |
 |
 |
 |
 |
 |
Erläbnis:
Dä Ort hie isch ganz b’sundersch. Mir si obe, bim Igang vom G’länd. Da isch e Müglechkeit, Camping z mache. Nach bim Wohnhus vo de B’sitzer isch e Ufenthaltsrum sanitäri Irichtige u o g’nue Platz. Hie wärde mer o mit viel Zueneigig vo dreine grosse Golden Retriver umwädlet. Jede het ds G’füehl, är müess Blettli oder Stäckli umetrage.
Im undereTeil isch ds Projekt Oyelena. Behindereti u armi Chind wärde hie betreut. Das Projekt louft über Belgie.
Ds erschte Ziel uf üsem wyte Wäg isch Limatambo. Dert het es e grosse Sportplatz. Derhinger hei d Inka vor unändlech langer Zyt a me Hang Muure i d Höchi zoge. Da dertür si Terrasse entstande, wo si bepflanzt hei. Mer blibe nid lang. Es isch heiss. Ds Dorf isch sehr längzoge. Mer beschliesse, gah Zmittag z ässe. Im Restaurant El Mirador chehre mer i. Ds Ässe isch guet u het e äberächti Grössi. Dernah tüe mer no chley Frücht kömerle, i de Lädeli gägenüber.
Mer fahte wyter i Richtig Lomatambo. ( ig bi chley abg’länkt, will i am Heinze e Ledlampe wott flicke). Hie in Limatambo g’seht me Inkabouwärch vom Feinschte. Muure, wo o nach drütuusig Jahr fasch niene e Spalt isch. Das Bouwärch heig si für ne Mondgottheit g’macht.
Uf em Wäg gäg Cusco chöme mer in Anta verby. Am Wäg het es e grosse Märit vo de Iheimische. Da müesse mer natürli gah luege. Fasch e Stung tribe mer is zwüsche de Ständ desume u tüe Fötele. Mängisch zum Goudi vo de Iheimische.
Der Wäg bis Cusco isch nümm wyt. Churz na de Füfe chöme mer a. Die nöie Teile vo Cusco g’falle nid so, der alt Teil aber de scho. Im Camping Qäuinta Lala übernachte mer hüt.
PS: d Ortsbestimmig funktioniert nümm.