I ha besser g’schlafe, als i dänkt ha. Villicht isch es die früschi Bärgluft uf über 2700 Meter in Huayta Wasy.
Datum: 2.2.2025 Ufenthalt: Ayacucho –
 |
 |
 |
 |
 |
 |
Erläbnis:
Ds Grosi, wo üs geschter iche g’lah het, wärklet o hüt scho i aller Früechi. I stah um die sächse uf u denn schwirret si o scho ume. Ir Zwüschezyt isch zwar d Familie vo ihrem Suun vo Lima hei cho, aber ds Grosi isch wichtig für ihre Betrieb. Dä isch mal grösser g’sy. Wahrschinlech het ne Corona e Strich dür d Rächnig g’macht. Dert wo früecher ds Reschturant isch g’sy, het itz ds Kamel e Parkplatz g’funge.
Üse hütig Wäg füehrt üs vo Huayata Wasy nach Ayacucho. Das isch e ziemlegi Strecki. D Strass isch zwar meischtens guet, aber sehr gebirgig. Üse höchscht Punkt liegt uf 4700 Meter über Meer. Das git nid nume em Kamel, sondern o üs z chyche. (Dufourspitze 4.634 m)
Die Verbindigsstrass isch andersch g’fährli, als die geschter. Vielne Orte geite es unändlech ache. Mer chöme bi me Ort verby, wo im letschte Jahr e Car überus isch (müglecherwys isch der Chauffeur i g’schlafe). Der Car liegt immer no im Grabe u am Wägrand stöh Chrützli.
Dernäbe isch die Landschaft wunderbar farbig. D Felse si vo Metall i allne mügleche tönige ig’färbt. Zwüsche de Felsechettene vo de Ande si Äbene, Täler, wo verschiedenschte Tier Nahrig biete. (Lama, Alpala, Vikunja u aber o Puma u angeri Wildchatze)
Der Wäg het unzäjlegi Windige u Chehre es geit ueche, de ache u wieder ueche… es wott kes Ändi näh.
Irgendeinisch si mer da in Ayacucho. Mer sueche üs die usg’suechti Ungerkunft. Wie a angerne Orte isch dert es Inkafescht im Gang. Uf me grosse Sportplatz zeige Lüt us verschiedenschte Dörfer Darbietige (Tänz, Theater u Spiel) zu Ehre vo «Der Mueter Ärde – Pacha Mama».
Das geit o die nächschte füf Sunntige eso.
Mit me schlächte Internet beschliesse n ig der Abe.