Mi Tag i der Oase faht wieder vo de sächse a. Mir logiere uf me betonierte Innehof. Öppis nah de füfe faht es Telefon bim Igang a lüte un es hört nümm uf. So gäg die halbe wird’s mer z blöd. I g’ragge us mim Tubeschlag im Kamel u gah ga dusche.
Datum: 24.1.2025 Ufenthalt: Huaytara –
 |
 |
 |
 |
 |
 |
Erläbnis:
Bis mer de zmörgelet hei, alles wäggruumt u so, isch de fasch nüni. A der Sunne isch wyt über 20 Grad. Vo itz a geit es i d Höchi (3800M.ü.M.) u n es wird chelter.(9°C)
In Ica müesse mer no e ganzi Reihe vo Ichöif mache. Ds Wasser het g’mingeret, ds Brot isch g’gässe, ds Joghurt o wäg… mer göh i ne Supermärit. Dert cha me o g’rad Gäld wächsle. Öppe am halbi zwölfi, nachdäm mer no e Pizza g’gässe hei, geit üsi Reis wyter. Vo Ica us fahre mer gäge Oschte i d Ande. Scho relativ gly het es nümm so viel Outo uf der Strass. D Umgäbig isch zuenähmend steinig u wachse tüe immer meh Kakteee.
Die Fahrt isch o es Ag’wöhne a d Höchine im Andegebiet. Das Tal, wo mer dri fahre isch mängisch ziemli breit, teilwys isch es äng u ne V. Am Afang wird rächt intensiv Landwirtschaft betriebe; – grossi Fälder g’stalte der Talbode. Wyter obe si d Fälder chlyner u unregelmässiger. D Strass, isch teeret u guet. Si isch zwar äng u ds Chrütze isch mängisch schwierig, aber es geit.
Mer winde üs höcher u höcher, chöme bi Dörfer u Einzelhöf verby. Irgendeinisch isch de mit em Teerbelag o fertig. Der Usblick i ds Tal use isch teilwys ateberoubend.
Irgeneinisch si mer uf der Krete. Ds «Passchrütz» steit e Bitz schreg u was nach der Kurve chunnt… Scho hie rägnet’s. Bi wyterfahre wird es nid besser, es het Näbel u brieschet zytewys. Unger däm lidet o ds Strässli. Ds Wasser frisst Gräbli u Gräbe. Guet, dass mer ds Kamel bi n is hei. Mit Bravour meischteret der Kameltriber Heinze die schwieregi Fahrt.
Bis mer in Huayta Wasy iträffe, git es mänge Grabe, mängs Loch, mänge Hangrutsch u Steine uf em Wäg. Un ig, i schlücke mängisch, – ha n es flau’s G’füehl im Mage u häbe mi…