Der hütig Tag faht o wieder früech a. I g’höre wieder e ganzi Reihe vo Güggle.Ds Düschele isch e ganz früschi Erfahrig, es weckt ömu.
Datum: 31.1.2025 Ufenthalt: Huacachina –
Erläbnis:
Es isch scho beruehigend, we me nid alles mues i b’schliesse. Über Nacht hei d G’rätli tiptop verusse uf em Tischli chönne lade. Am Morge müesse si der Platz ruume für Zmorge. Heinze chunnt chley später.
Gly packe mer zäme u mache n üs uf e Wäg. Ds erschte Ziel isch Cantalloc. Dert het es vo de Nazca es tolls Wassersystem mit Brünne wo me spiralförmig uf Wägli erreicht. Es isch e ganz interressante Ort, wo mer viel Rätsel ufgit u mer aber g’fallt.
Hie wärde mer o vo zwöine Zürcher a g’redt. Es Ärzteehepar wo es Jahr ungerwägs isch redt üs a u wott äuä wieder einisch schwizerdütsch rede.
Die nächschti Station si Cahuachi Pyramide. Der Wäg dert hare zieht sech no u mer chömme zur fasch heissischte Zyt dert häre. E alte Päpu hüetet dä Ort. D Bouwärch oder die renovierte Ruine (wo d Italiäner hei g’hulfe usgrabe) si imposant. Mer wandere dür die Muure u me cha fasch nume ds Mu offe vergässe. Der Wäg zrügg bietet no G’lägeheit zum chley Filmli z drähie, wie ds Kamel dür ne Furt fahrt.
Uf em Rückwäg gäg Ica, wo mer de wei übernachte, chöme mer wieder bi de Nazca-Linie verby. Es isch verruckt, dass me die Linie total guet g’seht, we si uf ein zue oder wäg füehre. D Tierfigure erchennt me aber praktisch nid. Mit em Flüger chöi u wei mer nid i d Luft. Also stige mer uf n es chlyses Bärgli. Dert g’seht me Linie. E Kilometer wyter steit äxtra e Turm. Vo dert obe cha me drei Figure g’seh. Die Übrige si wyt ume i der Äbeni u de Bärge verstreut.
Wie hei das d Nazca überhoupt chönne mache? Denn (vor 2000 Jahr) isch me nid g’floge, e so höche Turm hei si o nid chönne böue, d Bärge si wyt wäg. U die Figure si öppe so vierzg bis füfzg Meter gross. Verblüffend!!
Zur Entdeckig vo dene Linie u Figure het d Marie Reiche massgäblech bytreit.
Am Abe si mer töif i Tourismus i toucht. Üse Übernachtigsplatz isch i der Oase vo Huacachina? Das isch es Topusflugsziel für Peruaner.
Hoffentlech chöi mer schlafe.