Uiii uiuui. Der Tag faht für mi scho so um die sächse a. So vo Mitternacht a hei d Güggle zäntume Tagwacht g’chrähit.
Datum: 30.1.2025 Ufenthalt: Nazca –
Erläbnis:
Irgendeinisch ha ni g’nue u stah uf. liislig für Heinze nid z wecke, stige n i us em Kamel u gah ga düschele. Leider wott der Warmwasserhahne nume chalt Wasser spände.
Wo ni wieder use chume, het Heinz scho Kafi g’macht.
Bim Zmorge verzellt er, dass e Bekannte, der Urs, ihm g’schribe heig, wo me «Wüeschtewalskelett» fingi. Nach em Zmorge packe mer zäme u mache üs uf e Wäg i Richtig Nazca. Hie si die wältberüehmte Linie u Zeichnige em Bode. Die z luege, reserviere mer für morn.
Dür ändlosi Wüeschtegebiet fahre mer i Richtig Süde. Idrücklech, die Hügle u Bärge, aber o d Äbene – u d Farbe vo allem. nach ere g’wüsse Zyt het me aber ds G’füehl, es wiederhol sech chley?
Mer fahre nach Urses Agabe u lande bim «Museo de Sacaco». Sälber finge mer kener Chnoche. Mer beschliesse, em Urs siner Agabe no besser z befolge, drum fahre mer i ds Fischerdörfli «Lomas.». «Dert müesst e mer eme Wassercamion nache fahre, die wüsste, wo die Chnoche sige».
Leider g’seh mer kener Wassercamion. Nach langem finge mer e Ma, der Raphael «Pizza», wo üs zum Fundort begleitet. Will er kes Outo het, verbringe n i die Fahrt hinger im vollpackte Kamel.
Mi düecht, är wüssi ’s› o nid so genau … die erschti Strass zu de Chnoche fingt er nid, d «Chosefina», wo chönnt hälfe isch nid daheim, also fahre mer wyter. Irgend einisch halte mer de, u loufe i d Wüeschti. Scho währed der Fahrt merke n i, dass dä Raphael e faszinierte Hobbyarchäolog isch. Hie i dere Wüeschtesänki fingt er es urtümlechs u versteinerets Walskelett. Ifrig faht er a, der Sang wägwüsche, dass mer d Grössi vo däm Tier chöi ermässe. Es isch beidruckend.
Leider chöi mer is nid die Zyt näh, wie mer gärn würde. Der Wäg u d Irrwäge hüt hei üs d Zyt g’frässe. Es isch scho nah de füfe, wo mir der Raphael hei bringe u n is de uf e Wäg nach Nazca chöi mache. Dert wei mer i me Camping-Hotel übernachte. Ds ‹Hotel la Maison Suisse› wird als guet beschribe. Leider stellt sech nach unzählige Versueche, ’s z finge use, dass es ganz ame angere Ort isch, als beschribe. Dert wo’s itz isch steit, isch es no, isch aber scho lang g’schlosse.
Viel z spät finge mer e Ungerkunft u chöi üs i der ‹Nazca Lodge› vom Tag erhole.
Mer si chley fertig, ässe öppis, mache Büro u göh de gah pfuse.