So, hüt wär wieder Abreisetag. Öb mer das ächt schaffe? Es het ömu no hüt g’nue Stolpersteine.
Datum: 28.1.2025 Ufenthalt: Lima –
 |
 |
 |
 |
Erläbnis:
Ufstah, düschele, Zmorge ässe, isch wie g’wohnt. Dernah chunnt umefulänze, bis sech Heinz mäldet. Em halbi zähni chunnt die schlächti Nachricht:
Bevor si ne iboue hei, fülle si Wasser i u voilá: er tropfet a me nöie Ort. Also ds Wasser wieder use u der Tank ernöit uflade, zum ne löte. Bis denn bi n ig o däne u erläbe der Abtrandport?
Heinze het hüt nume vo Kafi g’läbt, drum göh mer über Mittag zur «Gipfeli-Frou»; – isch zwar o nid so wahnsinnig gsund, aber besser sls nüt!
Vo dert ga ni i ds Hotäl, mis Gepäck gah reiche u Heinze geit zum Outo. Ganz g’müetlech check i us u loufe mit Rucksack, Fototäsche u Chleidertrolly zur Schuel übere.
Sider sige d Handwärcher scho mal mit em Tank da g’sy, – es tropfet wieder u si tröpfele ab.
Hector, der Organisator
I fah a, das Brichtli schribe. Si chöme, boue der Tank i un er tropfet wieder. Es hilft nüt, dä Cheib muess me wieder lääre u usboue.
Ig hocke bi me Boum, wie b’stellt u nid abg’holt, pfuuse zwüschedüre; – häfle cha n i ja nüt. Wenn der Tank hüt dinn wär, chönnte mer no gah i choufe. Ig schlafe hinech ds erschte Mal wieder im Kamel. Ja, u de chunnt es angersch. Üses Gepäckrüümli isch näb em G’rätruum vo der Turngalle. Dert het es Matte. I pfuuse am Nami bi de G’rät u beschliesse, hinech da z nächtige; – also nüt Kamel.
Irgendeinisch chöme si mit em Tank zrügg, aber dä rünnt gäng no. Itz göh si zu me angere Mech gah löte. So gäg die füfe hei si der Tank wieder i boue un er schiint dicht. Mer chöi’s fasch nid gloube.
So um die sächse fahre mer i ne Supermärit, i ‹Wong›, gah für d Reis ichoufe. Heinze muess gäng wieder luege, öb’s nid tröpfelet.
Aber, – es schiint z ha!