Am Sunntig isch gar nümm am Kamel g’gange. Der Tank het vor sech häre tröpfelet. – Aber o der hütig Tag isch eifach nume verlore. Ömu mi düecht das eso. Umesürmle, nüt mache, warte!
Datum: 27.1.2025 Ufenthalt: Lima –
Erläbnis:
Der Morge verlouft, wie üblech: ufstah, zmörgele, warte. Der Heinz wartet uf e Willi. Mit däm isch em siebni abg’macht. Der Antonio seit, är chöm am achti. Wo n ig am zähni i d Schuel gah, isch geng no niemer da.I der Zwüschezyt ha n ig im Hotäl e nächschti Nacht verlengeret?
I blibe nid lang bi Heinze. Eigetli bi n i nume g’gange, dass i chley Bewegig ha. Nach ere Viertelstung gah n i wieder. Heinz seit, dass er itz bim Outo blibi, bis ‹ds Züüg g’flickt sig›. I gah zrügg i ds Hotäl gah Wösch ufgäh.
Der Angestellt dert seit mer aber, dass die ersch morn Abe zrüggchäm . I hätt se bis am zähni müesse ufgäh. Nu de, die nächschti Lavanderia isch nume par hundert Schritt vom Hotäl entfernt. I gah dert u hoffe, das klappi bis hüt Abe. So uf die halbi zwöi gah n i no einisch übere i d Schuel, – es isch ja nume e Chatzesprung. G’meinsam mit em Hector göh mer i der Chifa gah Zmittag ässe. Wieder i der Schuel merk i dass i da eigetli nume cha warte.
Der Tank isch usb’boue. Anschynend rünne die obere Schweissnäht u die wei Willi, Antonio u Konsorte i re externe Bude gah flicke. Mache cha n i nüt, also gah n i i ds Hotäl zrügg. Eigenartig, dass o d Hotälchüssi spannendi G’schichte wüsse.
Em füfi erwache n i u gah de i d Wöscherei übere. Miner Hose u so si fertig g’wäsche. Itz isch sächsi, vo Heinze ha n i nüt g’hört. I packe mal wieder. We ds Kamel fertig wird, wott Heinz sicher morn am achti starte.
E halb Stung später telefoniert er. Der Tank liegt, zämebrate hinger em Kamel. Nüt vo achti; – we mer am Mittag chöi fahre, hei mer Glück! 🥺
Mal luege …