I cha mi nume wiederhole: Lut Plan … aber es isch o hüt nüt! Derfür wird’s e «verschissne» Tag.
Datum: 26.1.2025 Ufenthalt: Lima – 
Erläbnis: Ufstah, Compi, zmörgele, – wie di letschte Tage. I packe, für de parat z si, we Heinze chunnt.
De chunnt dä mit der Mäldig, dass der Tank rünni. Also nüt vo abreise. I packe wieder us u gah ga ds Hotäl verlängere. Mi nächscht Usflug geit zum ‹Won› – kömerle: Wasser u Deo (i stinke wie ne Iltis). Vo dert geit es wyter zu däm ‹Cafe› wo n ig mit Heinze abg’macht ha. Es Kafi, viel b’richte u zwo eSIM Charte vo Heinze mache z gah…
Mer beschliesse, no einisch i d Altstadt vo Lima z gah. Diesmal aber mit em Schnällbus. Dä het hie e abtrennti Fahrbahn, wi es Bähnli oder so. (Si fahre o entsprächend.) Dertür spiele d Stous ke Rolle. Me isch i relativ churzer Zyt wyt. Lima isch äbe scho e g’waltegi Stadt. Mit 2672 km2 isch si weni chliner als d Flächi vom Kanton Tessin. 😮 (U da läbe schetzigswys ähnlech viel Lüt wie i der ganze Schwiz.)
Es isch i der Zwüschezyt Mittag. Relativ gly stüre mer uf ne Chifa zue, wo mer wunderbar, aber mit riisige Portione ässe. Ds Servicepärsonal organisiert de e chlyni Fotosession u mir zottle mit volle Büüch wyter.
Teil Wäge si mer scho geschter g!’gange. Uf em Plaza de Armas de Lima si mer geschter o g’schuehnet u g’rad dernäbe steit ds Museo catedral de Lima. Die alti Fassade finge n i faszinierend, drum sueche n i o hie nach Fotomotiv. I stah zueche, fötele u päng, – het mi e Tube verwütscht! Uf d Hang, ds Händy, ds Shirt, es isch im wahrschte Sinn e Sch…dräck, wo mi da verwütscht het. Zersch bi n i eifach baff u de faht ds Sueche vo me WC a, für mi wieder e Bitz z putze. (Übrigens het es hie, im Zäntrum, wahnsinnig viel Tube. Sie finge äuä g’nue z frässe.)
Der Räschte vom Nami geit de ohni grösser Unfäll über d Bühni. Mer loufe Chrütz u queer dür dä historisch Teil u fötele. Will hüt Sunntig isch, si ussert üs no sehr viel Lüt ungerwäg’s. Es isch Märit, Chilbi, Tanz u G’sang un es git ganz viel Fotomotiv. Uf em Plaza de Armas wird Heinze vo me chlyne Meiteli a g’redt, wo meint är sig der Samichlous. Drum wird o är zum Fotomotiv. 😊 Das het me de vom wisse Bart.
Später geit Heinz no i ne Claro -Lade wäg sinere SIM. Dert stellt me fescht, dass ds Handy vo n ihm sid Equador als g’stohle g’mäldet u drum g’sperrt sig. Heinz chah sech das nid erkläre. Er muess bewyse, dass das iPhone rächtmässig ihm g’höri, de wärdi das i öppe zäh Tag wieder entsperrt. «Claro, die Allmächtigen übers Telefoniegeschäft in Südamerika.» Drum isch die SIM bis itz nie g’gange!!!
Der Schnällbus bringt is de um die Achte wieder i üses Quartier: Miraflores. Der Wäg zum Hotäl isch nid wyt. Hüt bi n i aber froh, chönne d ‹Füess ueche z lege›, i bi sehr viel g’loffe.