Nach ere wunderschöne Reis in Indonesie u Timor, de ere ‹Dürquerete› dür ds Outback in Oustralie u re tolle Kubatour (ohni Kamel) steit es nöis Abetür dür Südamerika uf em Programm.
Datum: 24.1.2025 Ufenthalt: Lima –
Erläbnis:
Itz bi n i also da. Erwache in Lima i me Ibis-Hotäl u zum Fänschter us isch es zwar häll, aber milchig. – I kämpfe a verschiednige Internet-Fronte. Das Handyabo wo n ig g’chouft ha, het zwar i der Beschribig guet tönt, aber e Internetverbindig het es no nid uf boue. Die WLAN-Verbindig hie im Hotäl hänkt o geng wieder ab. Nu de, – me liidet. 😜
Geschter ha n ig e chley e verruckti Reis g’macht:
Am Morge, am halbi sächsi bi n i ds Rappi wäg, de am nüni in Klote nach Amsterdam g’floge u vo dert de, i me unändlech länge Flug am Abe gäg die sächse in Lima g’landet. Klar da chunnt no e ‹halbe Tag› Zytverschiebig derzue. Genauer, i ha itz zäh vor siebni u i der Schwiz isch zäh vor eis am Mittag.
Mi Reis isch guet verlüffe, geschter. Überall het es hilfsbereiti Geischter u Mitreisendi g’gäh, wo zue mer g’luegt hei. Klar, es het o Ufreger g’ha, öppe die Gruppe elter Froue, wo im Flugzüüg z viel Wy trunke hei…
Aber, ‹Schnee vo geschter›! Hüt wott i chley d Stadt lehre kenne.
Das Hotäl, wo n ig erwache, isch in Miraflores. Das isch e ‹Bezirk› vo Lima. Hie isch o d Schwizerschuel vo Lima un es isch o sicher. I bi geschter am Abe no gah Wasser choufe: kes Problem. Kener Röiber oder so. 😉
Ds Houptproblem isch hie aber o der Verchehr uf der Strass. Outo het es massehaft u si fahre wie – d Röiber. Als Fuessgänger hesch hie ke Brot uf der Fahrbahn.
Der Heinze isch scho sid Tage bim ‹Kamel› u wärklet da drann ume. Das steit itz im Areal vo der Schwizerschuel u het verschiedeni Liide. Der Eifachheit halber übernachtet äar o dert.
So, es isch siebni g’sy, i muess gah zmörgele u de faht dä Tag richtig a.