Äntlige es isch öppe lang g’gange. Hüt si mer ds erschte Mal so richtig ungerwäg’s.

Datum: 29.1.2025 Ufenthalt: C.P. las Antillas Umgäbig:

Erläbnis:

Mer stöh scho na de sächse uf. G’nächtiget ha n i guet uf de Turnmatte, allerdings isch de ziemli warm u stickig g’si.

Also, ufstah, düschele, Zmorge mache u nachhär zmörgele. (Mer hei ja geschter i g’chouft.) Zwüschedüre u dernah tüe mer packe.

Gäg die nüne isch alles wieder abg’wäsche, packt u ig’lade. Itz faht d Reis a. Vo Lima geit es gäge Süde u meischtens em Meer na. Zytewis het es Sangdüne bis a ds Meer häre.

D Landschaft isch brun. Sälte g’seht me grüeni Flächene. Dert wird de meischtens o intensiv Landwirtschaft betriebe.

Mir fallt uf, dass hie sehr viel Bouprojekt irgendwo si blibe stecke. Me het als erscht’s e Muur rund um ds Awäse g’macht, dernah afe ds Ärdg’schoss ufg’muuret, u de fertig. Es isch aber o mit Industrieprojekt so, – afa u de eifach ufhöre u äuä o eifach vergässe.

Mer fahre i ne Naturpark. Grossartig, was d Natur hie für n es Schouspiel bietet. Wunderbars Wasser, wunderbari Steiformatione, e wunderbare Himu; – was wott me no meh.

Zwüschedüre hei mer scho uf me Campingplatz in CP las Antillas reserviert. Uf der Fahrt us em Park ässe mer in Santa Cruz wunderbar Znacht.

Der Abe vergeit de mit «Büroarbeit».