Lut Plan wät itz also Abfahrt in Lima g’si. Aber nüt isch, der Tank isch gäng no nid richtig i b’boue.

Datum:      25.1.2025 Ufenthalt: Lima Umgäbig:

Erläbnis:

Dritte Tag in Lima. Ds Hotäl isch mer scho ziemli vertrout. No vor em Zmorge gah n ig gah luege, öb ig no e Nacht chönn blybe. Das isch alles kes Problem, i zahle u ha für ne wyteri Nacht es Bett.

Ds Zmörgele isch de umso schöner. D Frücht, ds Yoghurtmüesli u d Schnitteli si aber o fein.

Nachhär grüble n i no es Mal am Compi: ds Bluewin-Mail funktioniert wieder u d Standortazeig wenigschtens zitewys.

So uf die halbi zähni gah n i wieder zur Schuel übere. Uf em Wäg wott i no Campinggas im Campinglade choufe. Dä het aber no zue. I gah de um die elfe gah luege u choufe i.

Da ig bi dere Tank’revision› sowieso nid cha hälfe, tue n ig wieder e Rundi abwäsche. Ds G’schirr isch ja itz e ganzi Zyt eifach g’stande u ziemli verstoubet.

Der Tank hei si i der Zwüschezyt i boue u der Diesel i g’füllt. Leider wird aber der Füllstand nid a zeigt. Also lang palavere, der Tank wieder usboue u lääre.

Gäg die eis göh Heinze u n ig i ds China Reschturant , wo mer scho geschter si g’sy: Chifa Kam Mey My. Mer ässe wie d Fürschte. Uf em Rückwäg choufe mer no nöii Chopfchüssi.

Wieder zrügg i der Schuel hei d Arbeiter useg’funge, dass si der Füllstandsazeiger verchehrt i boue hei. – Aber d Verlötig vo me Drah het itz g’litte: nöi löte!

Um die Viere isch der Tank wieder montiert u der Disel drin. Jaaaa, u es funktioniert! Die handwärkende Schuelgeischter verschwinde nach u nach i ds verdienete Wuchenändi, eine putzt no wie wild der Platz u Heinze wird langsam ruehiger. Das isch die letschti G’lägeheit g’sii. Wär es nid g’gange, hätte mer ds ganze Wucheändi in Lima müesse blibe. Am Sunntig wird in Peru nid g’schaffet.

Für ds Kamel no chley z teschte, ob würkli alles funktioniert, mache mer e Fahrt i ds historische Zäntrum vo Lima. ‹Lago mia› het das Verchehr. Mer parkiere uf me bewachte Platz u göh de no z Fuess chley wyter. Was aber uf der Strass d Outo, si hie d Fuessgänger. Het das Lüt da uf de Plätz. Es düecht eim jung u alt sig am Samschtigabe alli uf de Bei u im Usgang! Nach re guete Stung mache mer is wieder uf e Rückwäg u öppe em achti setzt mi Heinz vor em Ibis ab.

Morn geit es wyter, wäg vo Lima! ☺️