Oder ömu: «Es trabet scho fasch»!  Technik het Hääge, u d Peruaner hei Zyt. Das brucht Närve.

Datum:      24.1.2025 Ufenthalt: Lima Umgäbig:

Erläbnis:

Der hütig Tag isch g’spickt mit Useforderige g’sy. Zersch ha n i am Morge mit em Internet uf em Handy g’kämpft (u g’wunne), de ha n i ds Brichtli vo geschter a g’richtet u bi dernah zu Heinze i d Schwizerschuel.

Das geit de aber nid so eifach, hie:

Me muess a g’mäldet sy. De muess me bim Igangstor säge wär me isch u was me wott. Eventuell brucht me no e Uswys. U de wird me vom ‹Torwächter› zum Heinz begleitet. (Wächter het es bi jedem Tor vo der Alag u die hei hie Polizeifunktion.)

Die Schwizerschuel hie isch e ganz eigete «Bezirk», riiiisig. Ds ganze Gebiet isch vo höche (7-8m) Muure umgäh u drin si de mehreri Schuele (vo der Spilgruppe  bis zum Gymnasium).

Im Ougeblick isch Feriezyt. Es het weder Ching no Lehrer da. Im ganze G’länd si Masse vo Arbeiter; – Handwärker da u renoviere, flicke, verschönere, boue nöi.

Z hingersch i däm Komplex, i me Unterstand, het ds Kamel sid der letschte Tour vom Heinz si Ungerstand g’ha, näb de Schuelouto zueche u de drü Outo vom Fässility-Mänäger Hector.

Nu, sider fasch zwo Wuche tuet der Heinz, mit tatchräftiger Ungerstützig vom Hector u me Mechanikertrupp o flicke u renoviere. Eifach am Kamel.

D Peruaner, wo n ihm hälfe, si liebi u hilfsbereiti. Si wölle o ke Lohn. Derfür chöme si; – jaja, soso lala… (für Teili, Schrübli u so, fahre si stungelang i ds Umland, für se z finge.)

E schlächti Usgangslag, we me sött chönne ‹verlange›. Momentan isch eine vo de Diseltänk us b’boue (und ds Iboumaterial, Dichtige u Schrübli fähle.)

Itze; – der einzig wo sech ufregt, wil er wyter wett, isch Heinze. D Peruaner hei ja Zyt.

Mi hütegi Hilf het da drin bestange, dass ig d B’stecktrucke düreputzt ha. (Löffeli putze, Gäbeli putze, Tällerli o u meh.) 😂 Kenne mer doch vo Oustralie.

Speter si mer guet gah ässe (will d Handwärcher wäg si u eh nüt geit)  u no speter si mer i ne Handwärkermärit. I Sodimac Angamos. Es brucht par Sache, wo kaputt, oder nümm z flicke si im Hushalt vom Kamel. E Fahrer us der Schuel bringt is häre. Mer sueche i me wahnsinnige Agebot (Obi mal zäh) u finge sogar e paar Sache.

Nachhär geit der Heinze i ne CLARO Shop. Är wott e lokali SIM choufe. Uii, de chunnt die gröschti Useforderig für hüt. Die Dame, wo ihm die verchouft, bruucht sehr viel Zyt u eigetli löst si ihm ds Problem nid. Derfür het si superlängi Fingernegel wo si d SIM charte fasch nid i ds G’rät bringt. Am Schluss het er zwar e SIM, aber no ke Guethabe druf…

Zrügg zur Schuel fahre mer mit ‹Uber›. Was in Peru sehr verbreitet sig u g’rüehmt wird. (D Täxeler rächne mängisch ziemli überrisse ab.) Mir isch Uber zwar gar nid symphatisch, aber was söll’s. Zrügg loufe isch ke Option. Es göng dür gaaaanz usicheri Gägede…

I der Schuel, bim Outo isch niemer. – So gäg die sächse gah n i zrügg i ds Hotäl. I ha no e paar anger (Informatik-)boustelle. (Itz g’seht me ömu wo n i bi. Ömu hinech.)

Öb mer ächt morn, wie planet, chöi wyterreise?