Titicacasee, wär wett de nid es mal uf e Titicacasee. Scho als Ching ha n i dervo g’hört u g’läse.
Datum: 19.02.2025 Ufenthalt: Puno Umgäbig:
Erläbnis: Am Morge, em füfi erwache n i, sürmle no chley ume u stah e halb Stung später uf. Zum bim Düschele lah n ig ds Wasser füf Minute früecher a? 🤪 Warm chunnt süsch nie. Em halbi sibni git es Zmorge. Eigetli guet, nume der Instant Nescafé wott kem passe.
Em siebni chunnt ds Taxi für a Hafe. Dert wartet es Usflugsboot.
Mer hei üs ere Usflugsgruppe a g’schlosse, für einisch uf so ne Schilfinsle (Totoraschilf) z chönne. Die si wältberüehmt, will letschti Volksgruppe uf dene läbe. Klar, es isch alles touristisch u zwar rächt. Handchehrum cha me niene so nach eme frömde Volch hälfe. Der See, das wird schnäll klar, isch nümm, was er mal isch g’sy. Scho im Uferberich g’seht me, dass ds Wasser überdünget u verschmutzt isch. Teilwys schmöckt me’s scho vo wytem. Mer lande zersch uf re Muschterinsle. Hie hei si alles vorbereitet, für em ‹Touristikus normalos› das hiesige Läbe hie nächer z btinge.
Zersch zeige si eim, wie di Insle überhoupt ufboue si. Dä ganz Untergrund ‹läbt›, u zwar ungefähr 60-70 Jahr. I dere Zyt wärde obe Schilfstängle g’chrüzt, g’schichtet. Unger fulet die Torfschicht wäg (das schmöckt me o). Uf de Schilfstängle chäme de d Hüsli z stah. O a dene isch sehr viel us däm Schilf. Mer si ig’lade worde, i so n es ‹Familiehus› (natürli im Gägezug für öppis z choufe): chlyn, ei Ruum, eis Bett, füecht.
Pär Schilfboot wärde mer uf ne Nachberinsle g’ruederet. (nid inbegriffe) Überall geit es um Souveniers, die si zwar schön u farbig g’macht, aber einisch het de alles es Ändi. Mit em Motorboot geit es zur Insle Taquile. Die gilt als uralte Pflanzezuchtort (Wie überhoupt ds Ufer vom See.). Hie sige die erschte Härdöpfu züchtet worde, o Quinoa het me hie zoge, lang bevor es überhoupt Inka g’gäh het.(me nimmt 13’000 Jahr a.)
Hie ässe mer ganz obe uf der Insle Zmittag u loufe de die ganzi Insle ab. Für d Verdouig e gueti Sach. Zwänzg ab zwöi wärde mer am angere Ändi abg’holt u de geit es zrügg i Richtig Puno. Na zwene Halte, chöme mer öppis nah de Viere hie a.
Heinz u ig göh no i d Stadt. Im Café Mercedes tüe mer üs öppis guet’s. Nah de sächse si mer im Hotäl.
E Halbstund später isch es Gwitter über der Stadt.
