Der Morge isch ver…rägnet! Zmorge ässe mer hinger im Kamel. Isch nid übel, aber äbe…

Datum:      18.02.2025 Ufenthalt:  Puno Umgäbig:

Erläbnis:

Gäg die achte laht der Räge nah u mer si de parat zur Abreis. Vom B’sitzer vo däm Awäse fählt jedi Spur. Heinze hingerlaht ds Gäld uf em Fänschtersinzel.

Mer fahre stracks uf Puno ine. Das isch e grossi Stadt, wo me vo der Sicherheit här ungerschiedlechs g’hört. Vor allem ds Hafeviertel heig’s in sich. Üses Hotäl isch diräkt näb der Universität. E riesegi Irichtig. U ganz diräkt am Titicacasee. Üs düecht es vei sicher, ds Kamel isch i me grosse Hingerhof versorget u mir erkunde d Stadt. Mit em ‹Colectivo‹ fahre meri ds Zäntrum.

Heinz brucht e Damestrumpf, für Diesel z filtere. Dä z choufe, brucht ne vei Überwindig. Nach mine ‹G’frörliattake› choufe n i e Alpacadechi. Usserdäm ässe mer i re Chifa, plündere üser Bankkonte u luege däm Tribe i der Stadt zu.

Em halbi füfi fahre mer mit mit em «Colectivo» zum Hotäl zrügg.

Hinech heisst es früech i d Fädere. Morn git es sächsi drissg Zmorge. Mer wei uf e See.