Z säge, die geschterig Nacht sig luschtig g’sy, wär g’loge. Es het g’schi****, die ganz Nacht u isch chalt g’sy.

Datum:      16.02.2025 Ufenthalt:  Sicuani Umgäbig:

Erläbnis:

Ja äbe, mer mache e Reis, u de faht der Tag nah de sächse a. Es Bananebirchermüesli isch nid zverachte. Bis mer alles abg’wäsche u ipackt hei isch es nah de achte. So öppe em halbi nüni verlöh mer dä Camping, wo ussert üs niemer isch g’sy.

D Richtig isch klar, Ziel isch irgendeinisch der Titicacasee.

In Checacupe verlöh mer aber d Houptrichtig. Mir wei zu de Rainbow Mountains. Ds Tal düruf isch wunderschön. Mer chöme ds Pitumarca verby, später de in Uchullujllo. Avisiert isch der Parkplatz vo dene Rägebogebärge.

Eigetli hei mer es guet’s G’füehl, mer si früech g’startet, mer begägne fasch kene Tourischtebösse, ds Wätter isch rächt, was wott me. – Natürli tüe mer ungerwägs fötele.

Ja, u de chöme mer uf dä Parkplatz. Fasch chley e Schock. Meh als es Dotze Bösse. D Tourischte scho die meischte uf em Bärg. U dert obe zieht vo hinger em Bärg e Näbuwand uf.

Also nüt wie los! Cocabletter i d Backe (mer si über 4000 Meter obe) u loszottle. (Näbeby, e grosse Teil vom Tourischtetross isch scho am Abstieg. )Währed däm Ufstieg, wo mer itz z Fuess mache, chöme mer höcher ueche, als der höchscht Bärg vo der Schwiz (Dufourspitze 4634m) u o höcher als der höchscht Bärg vo Europa (Mont Blanc 4810m).

Der «Vinicunca» isch uf 5036m u dert si mer g’sy! 😲

Zu üsem Leidwäse het der Näbu (oder si n es Wulche) scho währed em Ufstieg zuetah. Vo de Rainbow Bärge berchöme mer nume weni mit.

Chum dobe, faht es a Isch rägne. Zersch hocke mer afe chley (u die übrige Tourische speede ab) aber es wird nid besser. Im Gägeteil, innerhalb chürzeschter Zyt isch zringsetum wyss. Es donneret u wird biissig chalt.

Also Abstieg- u zwar schnäll! Dür die wissi Pracht ache duret’s, es wott ja kene e Unfall. U mer si i der Zwüschezyt mueterseel allei? Aber es geit alles guet, bis uf chalt Häng. D Fahrt dür ds Tal dürab isch o nid ohni, Kamel u Kamelriter si g’forderet u mache ihri Sach guet.

Wieder uf üser Houptroute, fahre mer bis Sicuani, dert ässe mer u sueche n is es Hotäl.

Mer übernachte im Hostal Sicuani. Guet Nacht.