We me Hüng het, de sött me o Znacht zue ne luege. We.me zäh Hüng het ersch rächt?

Datum:      03.02.2025 Ufenthalt: Pacucha Umgäbig:

Erläbnis:

Öppe em vieri g’höre n ig dä ‹Wolfshundverschnitt› vo der Campingb’sitzere ds erschte Mal. Vo denn a macht er es Bällkonzärt vor em Kamel zueche. Em halbi gah n i use u säge n ihm bärndütsch, was i vo n ihm halte. De chunnt e zwöite derzue, nah parne Minute verzieh si sech. I gah no einisch i Schlafsack, aber schlafe chah n i nümm.

E halb Stung später stah n i uf. Zmorge zwägbrösele u de zmörgele. Apropos brösele: Heinze het, in Ermangelung vo Brot, e Art Zwieback g’chouft. Das git es churzwyligs Schnitteli striche. Zmingscht si mer verusse u luege uf d Stadt Ayacucho ache.üse Camping liegt meh als hundert Meter über der Stadt uf ere Art Terrasse. Uf em Campingg’länd het ds Feschte am nüni ufg’hört. Dunger i der Stadt isch bis am Morge Fescht g’sy (u d Hüng hei o die ganzi Nacht es lutstarchs Fescht g’ha.)

Um die nüne fahre mer los i Richtig Cusco. Mer si gäng no em Zitufhole, dä Tank het is Tage g’choschtet. Ds Cusco choufe n i no Brötli (Brot hei si nid) u später no e Bung Banane. Mer fahre bis Chumbes. Der ässe mer Zmittag i re Art Tourischtebeiz. Es het Care, drum näh mer a, es sig guet. Isch es de o, i ha Riis u druf e ‹Tortilla verdura›, chley troche, drum no es Tee derzue.

Bim Wyterfahre chöme mer in Pajal verby. Dert stöh Ruine näb der Strass uf ere Äbeni. Mer vermuete, si sige us der spanische Zyt. Es chönnt durchus es Chloschter si gsy. Mer frage im Dorf. Die wei aber eigetli nüt wüsse u meine, dert wohni scho lang niemer meh.

Üses nächschte Ziel isch Chincheros. Mer beschliesse aber, no g’rad wyter z fahre bis zur Laguna Pacucha. Der Wäg dert häre geit no einisch uf 4200m ueche. Zersch wird es dunkel, de faht es a rägele, rägnet, brieschet u schneit! Der Übergang über e Pass isch e Usflug i Winter. Es wird wiss. Itz im T-shirt use z müesse, wär e Horror.

Zum Glück hei mer ds Kamel wo allne Widrigkeite zum Trotz die Strecki meischteret. Ds Talavera, wyteri hundert Kurve später, si mer wieder uf unger 3000m, d Strass isch no chley nass. Ds Huduwätter isch Schnee vo geschter.

Zwüsche Andahuaylas u San Jeronimo het es e Reihe Dörfer. Alles würkt wie ei riesegi Siedlig. Vo dert geit es de der Hoger düruf u hinger wieder chley ache zu der Laguna. Dass mer der ‹Camping› finge, isch es Wunder.

Es isch total ruehig, d Hüng si no ziemli wäg, es isch suberi Luft u d Infrastruktur g’seht rächt guet us. Guet Nacht!