Datum:      15.07.2025
Ufenthalt:  Fiambalà

 

Umgäbig:

Erläbnis:

Der Tag laht sech ruehig a, hie im Hostel. I stah em sibni uf, cha warm düschele u de mache mi hinger die fählende Byträg. Die meischti Zyt geit mit de Bilder druf. I ha massehaft Bilder, wo de ersch i d Galleroe chäme. E Uswahl z träffe isch nid eifach.

Relativ spät göh mer zum Zmorge. Es het aber no g’nue für üs.

Nachhär si mer uf em Zimmer am Computer. nah de elfe geit Heinz gah Itrittsbilie für Therme choufe. Mir wei Nami i ne bekannti Thermalquelle i de Bärge gah bade.

Da äuä d Nachfrag isch überwältigend g’sy, het me im Dorf unger a’gfange Itrittsbilie z verchoufe. Also, Heinze geit u bringt die Biliee. Kurz nach dem Mittag sind wir mit dem Kamel unterwegs.

D Fahrt geit nid so lang. I re grosse S-Kurve chöme mer däm Bad necher. Allerdings schocket is d Outokollonne vor em Igang. Es isch de aber nid halb so schlimm, wo mer chöi losfahre.

Em Hang nah obsi di Becki mit unterschiedlech warmem Wasser a gleit. Das faht bi 30°C unger a u hört obe bi 45°C uf. Mer föh unger im Becki mit 36°C a u blibe öppe e halb Stung drinne, dernah wächsle mer i ds nächscht wärmere.Das brucht mängisch ziemli Überwindig.

Irgendeinisch bi n i z oberscht, wächsle wieder ganz ache u gah ga dusche, chalt. (O das brucht Überwindig.)

Schad het es söfu Lüt hie. Ganzi Gruppe, Familie u vieli Einzelni, mache das Bade mängisch chley gränzwärtig.

Am fügi si mer de wieder im Hostel mit em Kamel. Zum Abschluss wei mer no i d Stadt gah ässe. D Suechi nach me offete Reschturant isch gar nid so eifach.

Mer finge eis, z trinke git es, z ässe ersch ab de sächse,? Es wird de fasch siebni, bis mer chöi b’stelle.

Wieder zrügg im Hostel, wette mer am Compi schaffe, aber d Natelverbindig u ds Wifi streike. Tja Südamerika!

 

• Location: 27° 43′ 57.8891″ S 67° 33′ 52.6391″ W

 

 

Datum:      14.07.2025
Ufenthalt: Flambala

 

Umgäbig:

Erläbnis:

Jede Morge ohni Sunne isch es Problem. Mer übernachte i me Täli, wo d Sunne sehr spät achunnt. Heinze b’schisst e Stung, Är wott sech hüt nach der chilenische Zyt richte; – brint aber weni.

Em halbi elfi fahre mer los u si gly im übleche Trott ungerwägs. Scho bim Zmorge hei mer g’merkt, dass mer hüt müesse ichoufe. Belen isch e grosse Ort. Dert het es sicher Läde zum kömerle.

Will es schwär zum Abschetze isch, wo ds Ichoufe gäbig geit, halte mer bi eim vo de erschte Lädeli a. ( Villicht wär es angersch besser g’sy.) Mer choufe, was üs zum Zmorge fählt.

Leider wärde mer ersch am Abe merke, dass der g’chouft Schinke gar nid im Ichoufssack isch.

I der Beckerei gägenüber choufe mer Brötli u e chlyni ‹Belohnig›. Es süesss Stückli, es Cornet konzentriert i me Bletterteigmöckli wo o nach zwe Stung no a de Zähn chläbt.

D Strass isch hüt usserg’wöhnlech g’rad. Kilometer um Kilometer, mit em Massstab planet. Es g’seht ganz usserg’wöhnlech us u isch o es Erläbnis, so z fahre.

So am drü finge mer in Tinocaste e Finca, wo mer chöi ässe. Es isch zwar chley tüür, aber mer habere wunderbar. Natürli kenne si vegetarisch u d Spyse si lokal.

U de faht scho bal wieder ds Sueche nach ere Unterkunft a. Im Flambala si mer öppis nah de viere. Mer hei beschlosse wieder einisch i me Hostel z sii. I de Rüüm vo Cabañes de los Andes bezieh mer so es «Hüsli». O für hie wieder einisch ds Internet nache z schaffe.

 

• Location: 27° 48′ 28.7351″ S 67° 39′ 58.8456″ W

 

 

Datum:      13.07.2025
Ufenthalt: Termas Hualfin

 

Umgäbig:

 

Erläbnis:

Heinze het es Mailproblem, wo sech nid so eifach laht löse. U wie das so isch, es frisst Zyt, regt uf u me rennt im Kreis. Da isch der Umstand, dass es Ross e Stoffsack vom Zält a g’frässe het fasch e Näbesach. Ds Übernachte hie im Camping Colalao del Valle isch guet g’sy, trotz der Discomusig, wo me die ganzi Nacht g’hört het. Ersch fasch am Mittag starte mer.

Hüt isch Wyterbildig a g’seit. Mer b’sueche ds Informationszäntrum über ds Volk vo de Quilmes. Einersit’s het es Ruine vo de Hüser vo me grosse Dorf, anderersit’s het es es Museum, wi viel im zytleche Kontägscht zeigt.

Das Volk, wo eigetli viel älter als d Inka isch, het de spanische Eroberer ds Läbe nid eifach g’macht.

Uf em wytere Wäg sueche mer es Resturant. In Santa Maria probiere mer so eis z finge. Aber alli si zue. Mer finge o später nüt, Lädeli si offe, aber e Beiz, -nada

D N40, wo mer ja scho einegi Zyt druf fahre, isch i der Zwüschezyt vei e Strass. Zwar zwöispurig,aber guet usb’boue u zytewys bolzegrad über vieli Kilometer. We ds Kamel pfift fahrt es hundert. Mi düecht, es pfift nume nono.

Der Strecki nah si die grosse Landwirtschaftsbetriebe verschwunde. E Zyt lang het es de Wygüeter g’ha, riesegi Ländereie u nume Trube druf. Itze, hie isch wieder Busch- u Dorneland. Es het der Strass nah Herde vo Geisse u Schaf wo Chlynbure g’höre.

Irgendeinisch lande mer uf em Camping Termas Hualfin. Mer hei no Ässensräschte vo geschter, wo mee chöi warm mache, drum chöme mer de doch no zu Öppis zwüsche d Zähn. Heinze geit gah bädele u i probiere, dä Tägscht da z schuehschtere.

 

 

 

Datum:      12.07.2025
Ufenthalt: Colalao del Valle

 

Umgäbig:

Erläbnis:

Der Start i di nöii Tagestour faht uf em Camping Municipal de Angastaco a. Es geit bis um die zähne, bis alles büschelet, g’macht, vor- u nachbereitet isch.

Der grösser Teil vo der Fahrt füehrt dür «las flechas». Das Gebirge, oder dä Gebirgszug besteit us luter Spitze, oder «flechas», äbe Pfile.

Es isch e einzigartegi Umgäbig, wo mer dürfahre. Eigetli isch das es Gebiet, wo dür Erosion entstange isch. Alles Material zwüsche de «flechas» isch wägg’schwemmt worde u isch itz äuä im Meer, oder so.

Quebrada de las flechas isch eine vo de Talabschnitte.

Bim Witerfahre trifft Heinze in Oda las flechas e Familie, wo Schwizerwurzle het. D Familie Zurbriggen isch o i däm Parkgebiet ungerwägs. D Urgrosseltere si us der Schwiz nach Argentinie cho. Ds Interview-Projekt chunnt wieder zum Trage. Heinze macht es Interview mit em Herr Zurbriggen.

Mer si gäng no uf der Stoub- u Rüttelstrass N40 ungerwägs. Heinze planget em Teerbelag etgäge. In Los Sauces ässe mer, total uf em Land. D Chefi tuet sech schwär mit «ke Fleisch», i berchume de e Salat.

D Wyterfahrt füehrt nach Cafayate. Bal chunnt die ersehti Teerstrass. Hie isch E Art Märit uf em Houptplatz. Mer bummle dertür u gönne üs e Kafi.

Übernachte tüe mer igangs Colalao del Valle uf me Camping.