18. August 2023 15:59

Kuzman Kapidan 30, Ohrid, Nordmazedonien | 29°C

 

Was für nes Hundeläbe!

Jede Abe, we n i im Bett bi, brüele Hüng. Mängisch bis spät, oder de o wieder zmitts i der Nacht. Das si nid Nachbers Wachhüng. In Mazedonie hei d Lüt sälte e Hung. Rund um vieli Hüser si Muure, oder Zün u ussedrann läbe Masse vo meh oder weniger wilde Hüng. In Balin Dol het es im Durchschnitt pro Hus sicher vier bis füf so Tier. Es git Lüt wo se jage, es git ere, wo se fuettere.

Sicher isch, dass es armi Viecher sy. Vieli humple, si a g’fahre worde, si chrank u me g’seht ne a, dass si lide. Vermehre tüe si sech unkontrolliert, so dass geng nöii derzue chöme.

Das isch hie es unerkannt’s u ung’löst:s Problem!

Mer si o hüt i ds Kafi u dernah ungernähme mer woeder e längeri Tour. Die füehrt üs gäge Süde. Üses Ziel isch Struga, Ohrid (Ochrid) u der Ohridsee

Es isch Fritig u i musimischem Gebiet e freie Tag mit dämentsprächendem Verchehr. (Natürli nid überall u für jede.) U will’s o em Wucheändi etgäge geit, si o d Mazedonier ungerwägs i ds Feriehus.

So öppe am halbi zähni starte mer u si de nach öppis meh als ere Stung am See. Ungerwägs hei mer no einisch käfelet u Wasser g’chouft. Struga isch es Badeparadis für die, wo gärn viel Lüt hei. Es het hüt viel Lüt, wo tüe sünnele u bade. Wenn aber Feeiezyt isch u alli wo im Usland sy zrügg chöme, muess das e furchtbare Fleischmärit sy. Vo der Landschaft här u der Natur, isch Struga wunderbar g’läge. Dr See git der Ortschaft viel.

Mer loufe e  Zyt lang em Ufer nah. Natürli het es eis Resturant nach em angere;- aber das g’hört halt derzue …

Im Vanilla Plaza warte n i, bis der Gafur vo der Moschee zrügg chunnt. Am Stdtrand vo Struga göh mer de gah Zmittag ässe.

Am halbi drü fahte mer bis zur Stadt Ohrid (Ochrid). O hie isch sehr touristisch, aber Ohrid het Vergangeheit, het Kultur.

Zersch b’sueche mer ds römische Theater, oder das wo no übrig isch. Nnachhär gah n ig zu der Peribleptos Chilche. Mir g’fallt d Architektur u d Ornamäntik. Iche gah n i nid.

Als Abschluss vo däm B’suech hüt loufe n ig uf e Hoger ueche. Dert steit e Feschtig, wo vo usse no sehr intakt würkt.

Es git für mu wieder e ganzi Reihe vo Aha-Erläbnis i der G’schicht. Eis dervo isch der Bezug gäge Bulgarie.

D Ussicht isch grandios vo da obe.

 

 

Nah de Viere mache mer is de uf e Heiwäg gäg Balin Dol. Am Abe git es no Pizza u die isch guet: Funghi.