17. August 2023 17:22

Rrugë pa emër, Çajlë, Nordmazedonien | 29°C

 

Neuer Tag, neue Caffeteria.

Mer fahre, nach ere guete Nacht, wieder i ds Morgekaffé. D Ritual si die glyche, d Gespräch äuä o. Übrigens si ne Teil vo de Chöpf o due glyche wie geschter. I stune, – hei die ächt abg’macht?

Vor em Kafi isch so ne Art Dorfplatz u dert wird d Milch vo de Buure i g’sammlet. D Seniore a de Tische mache mi ufmerksam, dass das müess g’fötelet wärde. 😏

Nach em zweite, g’spändete Kafi göh mer für d Mesibe gah kömerle. Die blibt hüt daheim.

 

Es geit uf Tetovo, dert isch hüt Märit. I der Stadt git es e Platz mit G’stell. Dert chöi d Händler e Teil miete zum Verchöif z mache. I de Sitestrasse u gäge Rand vo der Stadt wird d Mieti gäng wie billiger u o ds Angebot angersch. Uf em Platz mit de G’stell si viel Chleideehändler, oder Schueh, oder Hushaltswaare. I de Sitestrasse het es de d Läbesmittelhändler. Am Rand witd alles verchouft, was Gäld chönnt bringe.

Zum Teil isch o Ramsch u kaputte Züüg derby. Es git äbe o viel armi Lüt. Was nid total unbruchbar isch, probiert me zu Gäld z mache. I wet bi me Teil vo de Ware nid wüsse, wohär si chöme. Nu de. Es git es interessant’s Bild vo däm Volk hie. Handwärk isch weni verträte, Produktion o. Viel isch eifach Wiederverchouf vo türkische u chinesische Produkt. Schad.

I gloube, dass Nordmazedonie dür die Uswanderig nach Europa e Teil vo sire Identität verlore het.

 

O in Tetovo b’sueche mer die bunte Moschee. Da isch e Hufe Handwärch u Kunscht z g’seh. Nu guet, das Gebäude isch i der osmanische Zyt b’boue worde, aber d Handwärker si äuä scho vo hie g’sy. Ds ganze Hus isch inne u usse bemalt u verziert u o ds Holzhandwärch het ds Beschte g’gäh.

Das het Hunger g’gäh. Mer göh gah Börek ässe. Der Gafur trinkt «Dhallb», es Joghurtgetränk. So wyt gah n i nid, für mi isch Wasser besser.

 

Am Nami fahte mer de zum Chloschter Sankt Anastasius in Lesochka. (Bitte d Googleübersetzig für d Website wähle.)

 

 

 

Der Gafur zieht sech zrügg u geit sim Gloube nache. I mache e fotografische Usflug. Bi der eltere Chilche us em zwölfte Jahrhundert wirde n i de aber g’stopped vo me Mitarbeiter wo mi mazedonisch zrächtwyst. I bi ihm z lut, i bi am falsche Ort u fotografiere sött i o nid. So interpretiere ig ihn. Also zieh n i mi zrügg. Aber der Wäg, wo n i ischlah, passt ihm o nid. Wie n es Hüeterhüngli schücht är mi bis zum Igang vo dere Alag. Nu ja, g’fötelet ha n i. Auso de.

Mer fahre vo Leshok wieder ache. E Bekannte vom Gafur lütet no a u mer fahre nach Ulqin. Mir wärde zu Kafi u Chueche i g’lade. Nachhär, nach eme Abstächer zu me Fluss-Mineralquelle-Spa oder Bad ir Nechi vo Tetovo fahre mer der ganz Wäg zrüg bis Balin Dol.

 

Znacht ässe mer später im La Vita in Gostovar. Am nüni ändet o dä Tag. (Natürli si im La Vita o wieder Verwandti u Bekannti wo eim ilade u wei wüsse, wie ’s mer g’falli.) 😀